台灣俗語鹹酸甜
2000.02
01、 九月風吹，滿天飛。（九月九，風吹滿天吼。）
2000年1月30日，農民曆十二月廿四，對阮崁頂庄e5 叔孫來講，是一個大日子，全庄總動員辦一層chiaN5 sui2-khui3 e5 大代誌，「2000年社區親子活動」ti7 阮庄內辦，辦kah chiaN5 成功，m7 但得著等級上司e5 o-lo2 ，閣卡予阮家己庄裡e5 叔孫弟兄，chiau5 tin2 動起來，帶來活leng3 - leng3 e5 生活趣味，會用得講比冬尾戲辦桌請人客猶閣卡有意義，這攏著感謝里長蕭文宗kap 社區理事長蕭萬福，帶領全庄里民分工合作，相keng7 扑拼e5 成果。
阮是利用蕭家祖厝做會場，廟內展覽字畫古物，廟前進行各種民俗表演，弄獅、跳舞、娶新娘陣頭，放天燈、放風吹、掠h¢-liu （魚溜），現場寫春聯…廟邊廟後e5 園仔，提供30幾個炕窯hou7 人kop 窯仔，嘛有消防隊表演救生活動…真正鬧熱滾滾，hou7 文建會e5 官員o-lo2 kah tak 舌，講從來就m7-bat 看過chiah-nih8 成功e5 社區活動，嘛h¢ 來參觀e5 其他社區負責人感覺為難，chit 款e5 場面阮哪會敢辦呢？
當leh 放風吹e5 時陣，社區理事長走來問- - 我，蕭老師！俗語m7 是有一句「九月風吹，滿天飛。」ah chit-ma2 也m7 是九- - 月，而且beh 過年- - a，哪會風吹放kah suh-suh 叫，閣抑飛kah hiah 呢懸？敢講俗語講了有問題？
「九月九，風吹滿天吼。」講了無m7 著，九月九降風，有風風吹m7-chiah 飛會懸，今仔日雖然已經到冬尾，北風猶原sngh-sngh 叫，beh 放風吹嘛是會使chit ，當然啦，m7 驚寒，閣愛有閑工，beh 按怎sng2 ，由在你。
敢按呢？
理事長！ah 你m7-leh 三八，俗語是古早人傳落來，古早人beh 哪有hiah-che7 閑工thang 放風吹消遣做gi7-niu7 ？你是作田人，應該知影，頭冬粟仔若收成隨時就播第二冬e5 秧仔，二冬稻仔若割，chiah 種che7 蕃薯、番麥、菜蔬卡be7 厚工e5 穡頭，伸落來e5 時間m7-chiah 有可能hong7 食、消遣、chhit-tho5 ，親像吹碗粿、挨米篩目，kap chit -ma2 leh 放風吹、kop 窯仔，攏嘛是ti7 九月以後e5 出頭。
唉！有影to-tioh8 ，chit-ma2 e5 人實在有影好命，食、穿、toa3 富足，心適趣味好sng2 - - e5 滿四界，可惜單單文化方面有卡欠缺，特別是咱家己台灣e5 ，廟內hit 隻hiN -kui bat 看過- - e5 已經無幾個，啥物用途閣卡免講。
【註解】：
風吹：[風箏]
chiaN5 sui2-khui3 ：[非常漂亮]
kop 窯仔：chit-ma2 時行講（炕窯khong3-io5 ），實在m7 著，khong3 肉、khang3
鹵卵是khong3 ，pu5 蕃薯哪著用khong3 ，[疊土塊，悶燒蕃薯的疊
土塊]，台語叫做kop，kop 窯仔即著。
hong7 食：[鬧哄哄的]討論食e5 代誌。
hiN -kui ：織布
02、 有人山裡趁食，有人海裡趁食。
二水鄉文化志工研習營ui3 2000年2月12日~15日ti7 二水鄉圖書館舉行，二水鄉公所主辦，賴許柔文教基金會kap 二八水文史工作室承辦，目標是：
一、 熟似在地人文、地理、歷史kap 文化傳統，做一個有尊嚴、有文化氣質e5 台灣人。
二、 訓練地方鄉土文化解說員，拓展地方觀光旅遊產業，用休閒知性e5 chhit-tho5 遊覽方式來帶動地方發展。
「在地e5 花蕾，在地e5 種子」：
這是一e5 特別行業
無論山頂抑海墘
攏有人為伊
走chong5 拚命
出生入死
這是一e5 受尊敬e5 行業
無論保衛溪河抑護持古蹟
攏有人為伊
大聲喝咻搶救
這是一e5 可愛e5 行業
走chhoe7 文化
發覺歷史
留紀錄做參考
建設故鄉e5 田園
誠懇邀請你
轉來探望咱故鄉
咱過去行過e5 腳跡
著按怎安排kap 計劃
thang 開展未來e5 向望 ###
營隊e5 執行長賴宗寶校長ti7 致辭時講：
咱二八水是一e5 散鄉，俗語按呢講：「有人山裡趁食，有人海裡趁食。」咱二八水是有山閣有水，山是八卦山，水是養飼咱彰化平原囝孫e5 濁水，就是濁水溪。可惜山是崎那壁，東旁e5 八卦山坪，kan-na7 會使chit 種樹仔kap 一寡仔果子nia5 ，經濟利益並無大。濁水溪雖然ti7 咱身邊，八堡圳致蔭咱二八水人並無濟，因為西旁平地真狹，hou7 鐵路、公路、圳溝佔去足濟面積，chhun 落來會凍耕作e5 農地嘛有限，溪埔地有影be7 少，總是he 是靠天田，大水若來，就一切化為烏有，beh 做長期計劃有卡無穩，所以長期以來，外流e5 人口非常濟。
咱二八水人beh 靠啥物趁食？這是咱ai3 思考e5 問題？二水交通四通八達，有縱貫鐵路、集集支線、員集公路經過，未來e5 高鐵kap 第二高速公路攏ti7 咱附近經過，che 是m7 是會凍帶來咱二水鄉e5 發展？ng3 望咱遮e5 少年有志，逐家來tau3 想看覓，「有人山裡趁食，有人海裡趁食。」咱二八水人beh ui3 叨位來趁食？希望透過chit 擺e5 研習，hou7 咱有一e5 計劃e5 方針，感謝恁e5 參與。
【註解】：
走chhoe7 ：[尋找]
二八水：ji7-pat-chui2，現在叫二水。
散鄉：[窮鄉]
崎那壁：[山勢陡得像牆壁]
03、 食飯皇帝大。
二水鄉文化志工研習營e5 課程、排kah chiaN5 chat8 ，ui3 早起8點到下晡5點半，來講課e5 教授一律台語發音，聽著不止仔搭心，在地文化使用在地語言是天經地義e5 道理，這是趨勢，這是必然，台灣人已經有leh 覺醒，嘛已經ti7-leh 實踐。
講課e5 教授攏chiN5 認真，才調儘展，kan-na7 驚你m7 吸收，驚你食be7 落去nia5 ，絕對be7 ang3-tou7 be7 khng3 步，這實在是一項真oh 了解e5 台灣人心理，無關心家己文化e5 人，卡按怎ka7 講嘛be7 chhun-chhia ，一旦若潦落去研究，就那慈善家hit 一樣，只要有人beh-tihN8 ，一定全部功夫beh 放hou7 你。正課第一節由吳成偉老師講「古蹟之美kap 人文內涵」，排定時間是10：10~12：00，結果因為伊e5 熱誠kap 阮e5 用心，煞講kah 下晡點外猶m7 煞，阮be7 記tit 食晝無要緊，害著下晡第一節課e5 康原老師ti7-hia 等，雖然點半時間已經到，伊嘛m7 敢接落去伊e5 出頭。
吳老師不得已結束伊e5 課，m7 敢閣拖，執行長賴校長馬上發落康老師著繼續教，mai3 延chhian5 ，因為賴校長知影康老師e5 囡仔歌有研究，m7-chiah 叫阮逐家那食那聽康老師唱歌，有影be7-bai2 。不過康老師猶是感覺chiaN5 歹勢，「食飯皇帝大」，按呢ka7 恁攪吵那好勢？做恁慢慢仔食，beh 聽m7 聽攏無要緊，我就先講一寡bang-gah ，haiN 一寡無字曲仔hou7 逐家罔參考，theng3-hau7 逐家若食飽chiah 來講正題。
無- - nou3 ！阮真知，康老師對彰化平原有研究，做你照計劃講落去，阮beh 了解- - e5 是故鄉e5 代誌，時間寶貴，m7-thang 浪費，「食飯皇帝大」e5 觀念已經是古早e5 代誌，chit -ma2 食穿chiah 富裕，m7 免閣注意，來參加chit-e5 研習，致重- - e5 是咱e5 地理、歷史，腹肚枵著愛食，咱嘛會使chim-mih8 食chim-mih8 聽，有興趣自然聽be7 倦，做你講落去無要緊啦！
康老師m7 但是文學家，閣是音樂家，伊e5 歌喉一流，伊e5 記持嘛是一流，那講那唱，攏免看稿，趣味欣賞中間，二點鐘時間一目nih 仔就過去，也無看人leh tuh-ku 。
【註解】：
chiaN5 chat8 ：[很擠]
搭心：[貼心貼切]
趨勢：chhu-se3。
才調：[才華能力]
ang3-tou7 ：[包藏禍心]
khng3 步：[留一手]
be7 chhun-chhia ：[不通，不瞭解]
haiN ：[哼]
無- - nou3 ！：[不可以啦！不是這樣啦！]
chim-mih8 食chim-mih8 聽：[邊吃邊聽]
記持：ki3-ti3，[記憶]
tuh-ku ：[打瞌睡]
04、 樟仔gau5 吼，瓊仔gau5 走，拔仔柴摔死狗。
康原老師e5 「走揣彰化平原」講煞，續落去是蔡榮捷老師e5 「ui3 台灣kan-lok8 看鄉土文化」，kan-na7 看題目，hou7 人感覺「扑kan-lok8 敢有啥物thang 好pho3-tau7 兩點鐘久e5 題材？」m7-koh 看蔡老師e5 工作經歷kap 專長，應該be7 hou7 人失望即著。
蔡老師是二八水e5 在地人，ti7 社頭國小教冊，除了台灣干樂教學研究以外，音樂體育伊攏有興趣閣有- - 二步七a3 ，bat 去過chiaN5 -che7 國家表演，見識廣闊，經驗豐富，莫怪伊家己臭iang7 講伊講話chiaN5 臭屁，有影to-tioh8，揚揚得意無夠顧謙，少年出名，講著話充滿自信自然be7 se3-ji7 。
講桌頂囥一堆無仝款e5 kan-lok8 ，有大粒有細粒，本土- - e5 外國- - e5 ，有釘- - e5 無釘- - e5 ，用手攆- - e5 用索仔纏- - e5 ，大概是beh 表演用- - e5 ，未講晉前蔡老師先放兩首台灣味chiaN5 重e5 音樂予阮聽，然後講kah 一大堆，啥物「文化國家主義」，啥物鄉土觀念著ui3 「屬人主義」轉變到「屬地主義」，予我聽kah bu7-sa3-sa3 ，扑台灣kan-lok8 敢有影有hiah 呢濟學問？也m7 表演che7 來看巧咧，kan-na7 臭彈有啥物路用？到底是leh piN3 啥物bang2 ，sa 攏無，最後伊歸納鄉土文化愛有下面八項內容：
（一） 鄉土語言kap 文學。
（二） 鄉土地理。
（三） 鄉土歷史。
（四） 鄉土藝術：音樂美術。
（五） 鄉土自然：環保、城鄉關係。
（六） 民俗宗教。
（七） 民間技藝。
（八） 鄉土教育e5 課程kap 教材教法。
經過半點鐘，愈講愈著重點，伊問講，為啥物我m7 講陀螺（to5-lo5 ），beh 強調講kan-lok8 （干樂）？這就是鄉土文化所致重- - e5 ，咱囡仔時代leh sng2 e5 「top」就是kan-lok8 ，無人講做陀螺（to5-lo5 ），敢m7 是？早當時e5 kan-lok8 有圓釘kap 扁釘e5 無仝，i7 扁釘e5 kan-lok8 叫做「釘kan-lok8 」，有攻擊性、技術性kap 危險性，m7 知吸引著joa7-che7 台灣囡仔e5 趣味，陪伴joa7-che7 台灣囡仔過著心適有ng3 望期待e5 童年。Kan-lok8 釘破去會使得家己閣thai5 閣削來製作，所以除了sng2 e5 講究以外，猶有製造e5 經驗kap 技術，beh thai5 kan-lok8 e5 木材著研究，「樟仔gau5 吼，瓊仔gau5 走，拔仔柴摔死狗。」e5 俗語，就是ka7 咱講樟仔柴thai5 e5 kan-lok8 khah-gau5 houN ，瓊仔柴削- - e5 gau5 轉閣走真遠，拔仔柴be7 使chit 做kan-lok8 ，因為拍be7 轉，原因可能是拔仔柴生做扁扁，柴紋無圓e5 關係，chiah-e5 知識攏ti7 父囝兄弟中間代代相傳落來，這就是台灣咱家己e5 文化。
oa~5，蔡老師確實厲害，確實臭屁，為著咱台灣e5 文化，咱家己e5 自尊，其實伊m7 是leh 臭iang7 ，伊是leh hiau-pai ，hiau-pai 咱台灣e5 kan-lok8 有家己e5 特色，m7 是陀螺，m7 是中國人講e5 陀螺- - 呢！
問蔡老師哪會有chit 款e5 認bat ？伊講過去出國攏ka7 人講陀螺，煞hou7 外國人感覺bu7-sa3-sa3 ，到底恁台灣kap 中國e5 top 有啥物無仝呢？煞hou7 我一時gang7-gang7 m7 知影beh 按怎回答？所以hit 擺轉來了後，我就一直思考一個問題，啥物是本土，啥物是台灣家己e5 ？歹勢，無將表演當作重點來kap 逐家交陪，liam5-mih8 chiah 扑兩套仔hou7 恁做參考，若beh 欣賞我e5 技術，二月十八，咱遮圖書館開幕hit 工，chiah 招招來tau3 鬧熱，無頭無總講kah 不答不七，m7 知影會合口味無，請多多指教。
「樟仔gau5 吼，瓊仔gau5 走，拔仔柴摔死狗。」扑kan-lok8 e5 趣味，朋友！你敢猶會記得，是kan-lok8 ，m7 是陀螺，這kap 阮崁頂庄leh kop-io5-a2 仝款，阮嘛特別ka7 參觀e5 朋友講，m7 是khong3-io5 [炕窯]，是kop 窯仔。愛故鄉、愛土地，請會記得用台灣思考，請用台灣e5 名。
【註解】：
臭iang7 ：臭屁，[臭美]
也m7 表演che7 來看巧咧：[怎不表演一些讓人瞧瞧奇巧呢]
i7 ：sng2 [玩][遊戲]
閣thai5 閣削來製作：製造kan-lok8 用刀仔削，叫thai5 kan-lok8 。
gang7-gang7 ：戇戇[楞楞地]
|
|
|
