台灣俗語鹹酸甜
1999.04
1999.04.27 姻緣到，m7 是媒人gau5 。（姻緣天註定，m7 是媒人腳gau5 行）
1999.04.26 早睏早起床，才be7 頭昏昏，腦頓頓。
────────────────────────────
1999.04.21 食著藥，青草一葉；食無著藥，人蔘一石。
────────────────────────────
────────────────────────────
1999.04.30 不漳不泉。
漳是漳州，chiong-chiu，抑是chiang-chiu ；泉是泉州，choaN5-chiu ，抑是 choan5-chiu。漳州是中國清朝時代e5 漳州府，ti7 龍溪縣；泉州是清朝時代e5 泉州 府，ti7 晉安縣。
唐山過台灣，心肝結歸丸e5 台灣鶴佬人唐山祖公，大部分攏ui3 chit 兩所在來，過去 為著討趁顧腹肚，為生存顧生命，來自chit 兩位地頭，因為生活風俗e5 無仝kap 語言 腔口e5 差別，bat 引起真濟誤會kap 冤家，m7-chiah 到kah 戰後猶有人為著腔口e5 無仝互相相笑phe2-siuN3。其實chit 款漳州腔、泉州腔e5 差別逐家攏聽有，攏是鶴佬 話e5 方音，親像「來街仔買瓜仔hou7 雞仔食」，漳州腔講：「來ke-a2 be2 koe-a2 hou7 ke-a2 chia7 」；若是泉州腔就按呢講；「來koe-a2 boe2 koe-a2 hou7 koe-a2 chiah8」，你認為啥人有腔？永靖人講：「枝仔pian ，lian2-lian2 tian7-tian7」， 你敢會聽無？宜蘭人講「食puiN7 配鹵nui7 ，腳骨nui2 -nui2 suiN -suiN 」；關 廟腔青菜講「seN-sai3 」，彩色講「sai2-sek 」，臭臊草講「sau3-so-sau2」，除了 趣味以外，敢有啥麼thang 好相笑- - e3 。因為he 著是父母話，父母生成- - e3 。
chit-mai2 時代進步，交通發達，人也卡開通，啥麼漳州腔、泉州腔、關廟腔、宜蘭腔 攏已經lam7-lam7 做一夥，而且閣因為嫁娶互相學習透濫，鶴佬話已經由「不漳不泉」 進步到「亦漳亦泉」e5 互相諒解。
語言e5 流通會通達，對新e5 台灣人非常要緊，不漳不泉嘛好，亦漳亦泉嘛好，攏是方 音差e5 小異，若是kap 客家語、北京語做比較、就差大碼- -lou3 ，因為chit 兩種語 言kap 鶴佬話，雖然有真濟相通，卻是有真濟無仝嘛無才調對翻（譯）e5 所在，beh 全部用漢字來表達，閣卡無可能，講鶴佬話是北京語（國語）e5 方言，是講 be7 通- -e3 ，講漢文（文音，讀冊音）是中原古音，有伊e5 證據ti7- -leh ，但是台語 鶴佬話並m7 是kan-na7 讀冊音nia5 ，平常時對談e5 台灣話就m7 是hiah 呢簡單，應 該包含文音、白話音、南島語、外來語…。
台灣是多語e5 族群，真向望台北華語、鶴佬語、客語、原住民語攏會成做官方語言， 得著政府e5 認定保障，按呢逐家互相尊重，互相學習，發展出多彩多姿e5 台灣文化， ti7 世界上得著o-lo2 ，建立家己e5 自尊。###
【註解】：
phe2-siuN3 ：諷刺批評。／透濫：thau3 來thau3 去，lam7-lam7 做夥。[混合]
─Siau Lah-jih
1999.04.29 一年培墓，一年少人。
阿叔，敢beh 閣等落去？大概無轉來- - a3 啦！敢m7 是kap 阿伯In 約ti7 十點半， taN .已經十一點半卡加，閣等落去，中晝拜公媽就傷晏。
唉！景致一下bai2 ，人講「一年培墓，一年少人」煞有影- -koh，往過見若清明，無 培墓，嘛有掃墓，ka7 祖先kuI3 墓紙，hit 時陣墓前人是that-that-tiN7 ，五房頭人 馬齊到，鬧熱滾滾，祖公祖媽ti7 天頂若有靈聖，一定感覺歡喜安慰。
五六年前，恁大伯In 搬去頂頭扑拼，雖然無真捷轉來，但是見若清明一定會歸家伙仔 專工轉來掃墓，想be7 到chun5 - -年生理一下bai2 tng2-seh8 ，煞kan-na7 恁大伯家 己轉來- -nia5 ，今年e5 景氣chiah-nih8 衰微，我看大概無心情thang 轉來，hioh ！連恁屘叔仔嘛扑算無beh 轉來會款，哪會無看？少年人chiah-nih8 m7-bat 禮數， 未結婚敢著會chhin3-chhai2 - -chit hioh ！莫怪「一年培墓，一年少人」。
好啦！果子、鮮花ka7 排落去，先拜土地公，連鞭才拜祖先，逐家愛會記得，「慎終追 遠」是一項真有意義e5 孝道，教咱著愛會記得祖先，m7-thang 忘本，比如講為過往祖 先做忌，做九月tiang5 -liang5 ，tng7 著年節拜公媽，攏是誠好e5 傳統風俗，只要 誠心誠意，祭祖親像祖ti7-leh，拜公媽就設想公媽有來食，按呢就非常有意義。
除了面頂所講e5 風俗以外，咱chit-mai2 趁清明來掃墓、培墓、kui3 紙嘛是真好e5 儀式，ka7 祖先e5 墓仔掃掃咧，雜草khau-khau 咧，抑是卡功夫準備一寡腥臊來拜， 順紲蓋kou2-a2 紙，表示蓋厝頂e5 意思，hou7 祖先ti7 透風落雨e5 時陣嘛會凍得著 安歇。
「一年培墓，一年少人」，原因真濟，攏是功利主義kap 迷信，事業若有順利，是祖先 有保庇，當然祭祖、培墓照規矩，歡歡喜喜。若是be7 順序，無出（壯）丁，心情若 be7 輕鬆，啥麼拜公媽做忌，清明掃墓，有人去就可以，敢有差我一個人，敢m7 是？ 功利，迷信，台灣人，滿滿是。###
【註解】：
kui3 墓紙：掛墓紙。／that-that-tiN7 ：[塞得滿滿]／五房頭：[五個房族分支]／頂 頭：頂港，北部。／真捷：常常。／見若：[若遇到]／chun5 - -年：前年。／bai2 tng2-seh8 ：歹周轉。／慎終追遠：sin7-chiong tui- oan2。／過往：去世。／九月 tiang5 -liang5 ：九月重陽。／khau ：薅，拔。／腥臊：chheN-chhau，有魚肉e5 料 理。／kou2-a2 紙：墓紙。
─Siau Lah-jih
1999.04.28 豬，m7 肥，肥toh 狗去。
時勢轉變，有人變了卡文明，對生育子女e5 觀念有卡新，生查甫抑生查某攏無要緊， In 所期待- -e7 m7 是男女輕重e5 問題，只是希望有男有女e5 平衡生活品質。
高老師有三個囡仔，兩個查某囝乖閣gau5 讀冊，屘仔kiaN2 愛sng2 m7 讀冊，雖然m7 是浪浪liu3-liu3，望beh 將來會考著好大學，高老師是m7 敢向望，腳倉後人替高老師 怨嘆伊e5 囡仔是「豬，m7 肥，肥toh 狗去。」無疑誤煞去hou7 高老師娘聽見，人高 太太真正開化，m7 但無受氣，反倒轉按呢講：
恁e5 觀念已經toe3 be7 著時代- -a7，查甫查某攏是囝，siang2 gau5 、siang2 會攏 共款，當然咱做父母- -e3 攏嘛愛In gau5 讀冊，不過生著頇慢讀- -e3 怨嘆嘛無路 用。過去e5 觀念重男輕女，講啥麼生著查某囡仔是了錢貨，飼大漢別人e5 ，著是因為 大漢別人e5 ，所以咱著愛卡注意教示咧，查某囝若gau5 ，卡khiang3 腳淡薄- - a3 ，嫁了後m7-chiah 免ka7 煩惱；若是查甫囝，頇慢一屑仔無要緊啦！大漢以後嘛猶 會凍教示。
Chit 款新觀念，實在是頭一擺聽著，「豬，m7 肥，肥toh 狗去。」chit-ma2 m7-tioh8 愛改做「狗，m7 肥，肥toh豬去。」其實按呢嘛m7 著，男女平等，尤其是子 女，查甫、查某攏是心肝肉，gau5 - -e7 愛疼，頇慢飯桶- - e3 特別愛惜命命。 「豬，m7 肥，肥toh 狗去。」「狗，m7 肥，肥toh豬去。」攏m7 是正確e5 思想，栽 培囝，心肝著掠hou7 正。###
【註解】：
豬，m7 肥，肥toh 狗去：重男輕女e5 觀念，意思是講查甫囝m7 gau5 ，煞gau5 對查 某囝去。／siang2 gau5 、siang2 會：[誰賢能，誰利害]
─Siau Lah-jih
1999.04.27 姻緣到，m7 是媒人gau5 。（姻緣天註定，m7 是媒人腳gau5 行）
「阿福伯- - a3 ，你實在gau5 - -neh ！阿明仔嫂In chau-a2-kiaN2 美娜 e5 親 成，閣hou7 你做會成，有影無簡單to-tioh8 ！」
Che 哪有啥thang o-lo2 - -e3，你無聽人講「姻緣到，m7 是媒人gau5 。」人美娜 e5 婚頭已經浮，姻緣線五百年前註tiaN7 -tiaN7 ，我只不過ka7 兩頭牽相黏，哪有啥麼 撇步，哪有啥麼thang o-lo2 gau5 - -leh ！
「若無阿福伯- - a3 chiah-nih8 腳輕，男方女方kut-lat8 行踏，chit 門親事哪有 thang chiah-nih8 緊就決定，福伯- - a3 福伯- - a3 敢leh 叫假- -e3。」
oa5 ！愈講煞愈ham3 古，若m7 是In 兩個少年- -e7 意愛在心內，偌gau5 講，偌gau5 話，做你啥麼媒人嘴胡lui3-lui3，共款是無卡choah8 ，beh ka7 美娜做媒人- -e7 有夠濟，逐家ka7 紹介e5 對象嘛攏be7-bai2 ，為啥麼做be7 成？猶m7 是無四配無合 意，chit 擺做會成功，總講一句是「姻緣天註定，m7 是媒人腳gau5 行」啦！
阿福伯- - a3 講- -e3 實在有道理，想起當初時，tu2 做兵轉來，媒人就相爭beh ka7 咱介紹查某囡仔，兩kou2 月中間看卡無一打，結果看有合意chit 個，ui3 相親、teh 定到結婚，講khit 來你m7 相信，前後才短短兩kou2 月，而且hit 個媒人誠貧惰，兩 方家庭m7-chiah 行五六choah8 - -nia7-nia7，汰做會成？朋友就按呢消遣hit 個媒人 ：「姻緣到，m7 是媒人gau5 。」「姻緣天註定，m7 是媒人腳gau5 行」啦！
婚姻大事，chiah chhin3-chhai2 就決定，雖然阮e5 生活過得美滿，無怨嘆無後悔， 總是m7 是好樣，並無鼓勵逐家愛學阮e5 樣，「乾柴烈火，一個beh 娶，一個beh 嫁。」就按呢完成婚禮，有夠ham3- -e3！###
【註解】：
婚頭：結婚e5 徵兆。／ham3 古：[八卦]／teh 定：訂婚。／chhin3-chhaI2 ：隨便。 ／有夠ham3- -e3！：真正[不可思議]
Siau Lah-jih
1999.04.26 早睏早起床，才be7 頭昏昏，腦頓頓。
往過阮學校規定，早起時著七點到學校做自修，若無著愛算『遲到』車糞斗，會hou7 老師罰khioh 垃圾、掃便所，khioh 垃圾、掃便所對阮學生囡仔來講，是一項足嚥氣足 見笑e5 代誌，所以hit 時陣，為著mai3 『遲到』，每一工透早peh 起床就hou7 阿母 趕緊緊，「卡緊，卡緊，be7 赴- - a3 ！be7 赴- - a3 ！」趕kah 活beh 緊張- - 死。
自從學校新規定，早起時到學校e5 時間會凍卡晏，規定七點半晉前到位，會赴掃土腳 就無算『遲到』了後，chit-mai2 早起時去學仔就加足輕鬆- -e，因為阿母kap 我攏已 經習慣早起，早起時「去學校e5 路裡」chit 段時間，煞變做好sng2 好chhit-tho5 ， 輕鬆閣be7 囉嗦e5 趣味經驗。
「oa5-a2！」日頭公公笑咳咳，一chun7 溫暖ti7 心內，看著四邊風景真精彩，腳步踏 緊大hoah8 來。路邊樓仔厝排歸排，公車、轎車（kio7-chhia）、kap ou-touh1-bai2，一台一台閣一台，pi-pi pouN1-pouN1 鬧chhai-chhai 。
「褲襪仔一雙五十，買一領送一領，大買大贈送，穿了包你sui2-tang-tang ，無買你 會後悔一世人。」親像機關槍聲leh 喝俗貨，聽kah 我bu7-sa3-sa3 ，sa3-sa3-bu7。 隔壁彼e5 賣『甜不辣』kap 魷魚羹- -e，生理嘛真ka-iah8，頭家舞kah 歸身汗， khat-a2 一khat 閣一khat ，碗一kai5 閣一kai5 ，頭家娘收錢收kah 嘴仔裂鰓鰓，嘛 hou7 我看kah 無nih 目，o-lo2 In 實在利害。
行- -a3 行，繼續行，行過田岸邊，稻仔真古錐，青sim3-sim3，搖來搖去。看著菜股 e5 青菜，sui2-tang-tang ，好收成，感謝作穡阿伯e5 無閒，予阮聰明頭殼teng7。雄 雄飛來一隻鳥，歇ti7 頭前，原來阮已經行來到hit 坵果子園，透早鳥仔就khit 來食 早頓，kap 阮共款早睏早起床。風一下吹，草仔閣頭khi-khi，露水ti7 hit 頂峘一粒 一粒那珍珠，閃閃sih-sih。
離開田園來到公園，有音樂聲，嘛有跳lang3-suh，運動e5 人一大堆，有e5 扑太極 拳，練氣功 ，有e5 跳土風舞，比拳頭拇，逐e5 腳手攏 liu2-liah8 ，歡頭喜面，精 神清爽，紅膏赤chhi7 著是健康e5 表示，一工e5 開始，ui3 遮起。
oA5-a2！時間無早- -lou3 ！上班e5 阿伯阿叔，大兄大姊，有e5 精神飽tiN7 ，有e5 目睭猶sa-bui sa-bui ，行路- -e7，騎鐵馬- -a3，駛ou-touh1-bai2 - -e3，攏做夥 來去，一步一腳印，為著前途，無phah-piaN3 be7 使chit 。
「去學校e5 路裡」，阮母仔囝鬥陣行，沿路行，阿母沿路教示，一路歡歡喜喜，行過 綠色e5 田園，行過鬧熱滾滾e5 運動公園，早起是有活力- - e3 ，早起是有向 望- -e7，早起予阮精神爽，早起予阮有理智，早起e5 生理人趁有食，早起e5 鳥隻有 蟲食，「早睏早起床，才be7 頭昏昏，腦頓頓。」實在有道理。###
【註解】：
大hoah8 ：大步。／鬧chhai-chhai ：熱鬧非凡。／ka-iah8 ：[門庭若市]／khat-a2 ：[杓子]／青sim3-sim3 ：[綠油油]／頭殼teng7 ：[不是頭硬]，是聰明e5 意思。／ 跳lang3-suh ：跳舞。／腳手liu2-liah8 ：[手腳伶俐]／紅膏赤chhi7 ：[紅光滿面] ／精神飽tiN7 ：精神飽滿。／sa-bui sa-bui ：[睡眼惺忪]
Siau Lah-jih
1999.04.23 蜈蜞咬蛤。
田中國校慶祝建校八十五週年e5 活動，今仔日進入高潮，上蓋鬧熱，學校內一四界攏 是人聲，老師當leh 討論連鞭e5 表演節目，beh 按怎入場；主辦運動會e5 訓導處同 仁，猶leh 煩惱chiah-nih8 亂操操e5 場面，是beh 如何控制；學生囡仔上歡喜，都 猶未開始leh ，就leh 家己練習beh 按怎為選手加油，一直喝咻『加油！加油！』「愛 拚才會嬴！愛拚才會嬴！」；嘛有hit-lo7 kau2-koai3 e5 猴囡仔thiau-kang kap 人 無仝味，一直喝講「漏油！漏油！嚥氣！嚥氣！」惹人氣kah beh 死。總講一句，今仔 日e5 運動會猶未起鼓，就到處「蜈蜞咬蛤」為chit 場表演leh 心適，未演先轟動，註 定今仔日e5 慶祝一定成功。
運動會一開始，先有各種表演，學生囡仔e5 節目算阮四年級e5 大會舞上精彩，馮老師 kap 阮遮e5 級任，流汗扑拼總是無了工，得著誠濟phok8-a2 聲；上hou7 人感心- - e5 是啟智班e5 師生合作比賽，經過老師愛心e5 設計，In e5 運動充滿挑戰，若無說 明，hou7 人叫是老師非常酷刑，囡仔都leh 頇慢- -a7，猶閣叫In toh 土腳爬，原來 這是為遮e5 學生未來，特別設計e5 教學，啟智班e5 老師實在愛ka7 o-lo2 。
另外嘛有社區e5 社團表演，跳舞、比劍、太極拳、外丹功攏有，攏是leh tau3 鬧熱， 囡仔無感覺稀奇。學生囡仔上趣味ti7 走相jiok ，十點三十分開始六十公尺、一百公 尺、兩百公尺e5 走輸嬴，槍聲一下響，「蜈蜞咬蛤」隨時變做人聲喊喝，司令臺頂黃 老師一直助聲喝I -o，樂隊e5 鼓聲嘛toe3-leh lin3 -long3 叫，加添鬧熱e5 氣氛， 運動埕做一下chhiang7 -chhiang7 滾，日頭當中晝，曝kah 汗那流，啥麼都be7 記 得- -a3 。
最精彩- -e3 ti7 下晡時，各年級e5 大隊接力，男女各十五個，一人走一百米，競爭 誠劇烈，有時領先做頭前，無外久煞落ti7 第五等，輸嬴起起落落，輸- -去，講話就 囉哩囉嗦，嬴- -e5 班級歡喜kah giong7-beh 掠be7- tiau5 ，輸- -e5 e5 班級煞 leh 起au3 -siau5 ，好佳哉無起冤家，kan-na7 「蜈蜞咬蛤」hoe7 be7 完，歡喜e5 一工ti7 發獎品獎狀了後結束。
講歡喜是學生囡仔leh 歡喜，阮老師實在是thiam2 kah beh 死！###
【註解】：
蜈蜞咬蛤：／kau2-koai3 ：[調皮]／au3 -siau5 ：[面無表情，滴咕不停]／hoe7 be7 完：[爭論不休]／thiam2 kah beh 死：[疲倦得要死]
Siau Lah-jih
1999.04.22 第三查某囝，食命。
喂！蕭老師請問一句俗語：「第三查某囝，食命。」是啥意思？
亦煞m7 知影講第三查某囝卡好命。
敢按呢？俗語m7 是講阮查某囡仔菜籽命，liam3 頭飼都會活，重男輕女e5 社會，做人 e5 第三查某囝，哪有可能會好命咧！無合『邏輯』啦！
講嘛有影，ah 汰會定定聽人按呢講呢？
……
周大嫂，請教一句俗語，「第三查某囝，食命。」啥意思？
亦煞m7 知影講第三查某囝卡好命。
敢按呢？敢有一定是第三- -e？
薛仁貴kap 王寶釧e5 故事著是按呢搬，王寶釧是第三查某囝，後來伊做皇帝娘，享受 榮華富貴，m7 是誠好命。m7-chiah 講「第三查某囝，食命。」著是按呢e5 意思啦！
m7-ku2 王寶釧苦守寒窯十八冬，敢be7 傷苦憐，toa3 害磚仔窯，食野菜蕃薯葉，哪是 好命人羹頓，翁無ti7 厝裡，受盡人e5 欺負，che 是歹命。好佳哉伊運氣好，後來做 皇帝娘，若是好命，應該就免經過chit 段苦難，世間第三查某囝滿四界，有伊chit 款 命底到底有幾個？食命，m7 是好命，是靠運氣，運氣若好是好命，運氣若bai2 是歹 命，好命歹命無一定是第三查某囝，「第三查某囝，食命。」其實kap 「查某囡仔，菜 籽仔命」猶m7 是共一款命。###
【註解】：
liam3 頭：[摘下頭]／toa3 害磚仔窯：[住破磚窯]
─Siau Lah-jih
1999.04.21 食著藥，青草一葉；食無著藥，人蔘一石。
「¢h！哪會chiah-nih8 苦？我 吞be7 落去！ah！ah 我beh 吐出來- -a3 啦！」 - - u2 一聲，已經吐kah 歸土腳，有影chak 死人，活beh - -氣死！
藥仔keN2 -tiam3 嚨喉e5 滋味，逐家一定bat 經驗過，真正是「艱苦無人知，目屎吞 落去腹肚內。」
講著食藥仔，每一個囡仔攏會驚，有e5 驚kah phih8-phih8 -chhoah ，有e5 驚kah 青 sun2-sun2 .面反色，有e5 講著食藥仔，著走kah pun3-keng，上hou7 人愛笑- -e5 著 是牛聲馬喉ma3-ma3 吼，吼kah 足大聲，有夠歹聽，嘛有hit-lo7 牙齒根咬an5-an5， 隨在阿娘按怎大細聲，伊攏m7 聽，最後著人tau3 掠，才有法度將藥仔灌落喉，實在 bai2 -chai5。
我e5 食藥經驗無hiah 呢au3 腳數，m7-ku2 講khit 來猶是感覺歹勢歹勢，taN，beh 來漏豆仔爿hou7 恁聽，拜託恁著m7-thang ka7 我笑。
大概是阮老爸是醫生e5 關係，食藥仔e5 經驗我上濟，見擺若感覺身體小可無拄仔好， 阮老爸一定著叫我愛食藥，講著食藥我就面憂面結，一定就三推四推講無愛食藥，理由 歸大堆，阿爸攏無beh 相信，講「細孔m7 補，大孔叫苦」，小可艱苦若m7 治療，若 hou7 伊嚴重著會害，姑不將只好鼻孔teN7 -leh，雄雄像灌tou7-kau5 按呢灌落喉，阿 爸實在是名醫，真正藥到病除，無外久就感覺人已經thiau3-iah8 ，爽快ni-ni。
有當時仔阿爸開e5 藥仔是藥丸，有夠歹吞落喉，連配三四甌冷滾水，藥仔猶ti7 嘴 裡，不得已，阿母將藥丸geng2 做藥粉，叫我ham7 嘴瀾做夥吞，啥知藥粉苦teh-teh， 落喉無外久，又閣吐kah 滿四界。Hou7 阿母著閣無閒洗土腳，有夠歹勢。阿母e5 應話 是：「有影chak 死人，活beh - -氣死！」hou7 我聽著足嚥氣。
雖然食藥仔chiah 麻煩，親像頂面講e5 chit 款囉嗦嚥氣e5 代誌，對我來講並無濟， 為啥麼？m7 是講膨風- -e7，實在是因為阿爸開e5 藥方太讚咧，藥量閣無濟，beh 吞 beh 哺攏be7 感覺苦。有一擺我問阿爸講：
看別人食藥攏歸大包，阿爸你開e5 藥方哪會chiah-nih8 少？
阿爸應我講：「食著藥，青草一葉；食無著藥，人蔘一石。」醫術卡要緊，診斷若正 確，食藥m7-chiah 會li7-lau5。Tong5-ng2 大包e5 藥仔，內面m7 是顧胃- -e7，著 是bi5 -tah-beng2 A .B .C。對食藥仔e5 人來講，遮，攏是安慰藥品nia5 。
我上愛食e5 藥仔著是有糖衣e5 藥丸，kap 食khit 來那蜜e5 糖漿 （thng5-chiong ），胡蠅貪甜，m7 是kan-na7 我趣味，恁嘛真趣味，敢m7 是？
猶有一項藥，是leh 補身體，m7 是leh 治病痛，就是中醫e5 補藥，紅棗、當歸、四物 仔，參雞肉、鴨肉做夥tim7 ，芳kong3-kong3 ，kong3-kong3 芳，未食就siaN5 人流 嘴瀾，chit 種e5 補身湯，我上合意，一碗閣一碗，食到過癮為止，在座各位，恁有 leh 流嘴瀾水- -無？
講著中藥，就閣hou7 我想起阿媽破病hit 段日子，使人心悲，giong7-beh 目屎滴。仁 慈好量e5 阿媽，做查某囡仔時，是咱彰化e5 「大美人」，溫柔謙虛，親切人人好，逐 家o-lo2 。伊上蓋疼我這e5 查某孫，逐日陪我chhit-tho5 ，教我講台語，鼓勵我愛讀 冊，不管時都ka7 我疼命命，想be7 到一場病痛，煞來chhoa7 走阿媽e5 生命，留hou7 孫- -e7 心肝iN2 -a2 不時leh 疼痛。
阿媽ti3 癌症hit 段日子，是我上心酸e5 生活，每擺看阿媽食he 苦teh-teh e5 草藥 仔，吞be7 落喉，我攏khia7-tiam3 阿媽身軀邊，嘛thin5 一甌陪阿媽tau3 鼓勵，看 阿媽痛苦e5 面色，我lun2 be7 -tiau5 ，硬將目屎吞落喉。阿媽- -o7，你就小忍耐， 我來拜託媽祖ka7 咱tau3 保庇，保庇阿媽e5 病會緊緊好khit 來。想be7 到無外久， 阿媽就放阮做伊轉，來過身。回想過去陪阿媽食藥仔e5 日子，又閣惹起目屎滴。
講食藥仔e5 經驗，實在m7 是輕鬆，罔講罔笑，無啥thang 好計較，上好是身體勇健 健，無煩無惱免食藥，祝各位身體康健第一，逐家勇勇健健食百二。###
【註解】：
食著藥：[吃對藥]／chak 死人：[煩死人]／keN2 -tiam3 嚨喉：[哽在嚨喉]／走kah pun3-keng ：走kah 無看人影。／牙齒根咬an5-an5 ：[牙根咬得緊緊的]／ ai2 -chai5 ：歹看樣。／au3 腳數：[不上道的角色]／漏豆仔爿：[據實以告]／ eN7 -leh ：[捏住]／灌tou7-kau5 ：[灌蟋蟀]／爽快ni-ni ：[爽快得很]／geng2 ： [研磨]／li7-lau5 ：對病體有幫贊。／Tong5-ng2 大包：[好大一包]／ i5 -tah-beng2 ：vitamin／tim7 ：燉。／siaN5 ：引誘。／過癮：koe3-gian3。／ thin5 ：斟，倒。／lun2 be7 uti?u5 ：忍不住。
─Siau Lah-jih
1999.04.20 龜腳趖出來。
TaN .mai3 閣編落去- -a3，「龜腳趖出來」都猶m7 知影，真正加講加漏氣- -e3，瞞 者瞞不識，識者不能瞞，mai3 做就無chit 款嚥氣代？
邱老兄，做人上實在，be7 lim be7 開，啥麼pok薰哺檳榔，伊攏be7 曉，伊攏無愛， 人講人.愛有一步破，邱老兄著是破ti7 愛poah8-kiau2 ，啥麼薰、酒、檳榔、茶，查 某、唱歌、跳舞，伊攏m7 、無興趣，單單chit 項poah8-kiau2 ，伊扑死無走，講著 poah8-kiau2 伊就氣（去），著是邱老兄伊。
Hit 一工，人又招伊『三缺一』，起先，伊m7 敢講beh 去，因為m7 知影beh 按怎ka7 某講原因，古意人，beh 出門總是愛有理由，taN .敢會使chit 講beh 去 oah8-kiau2 - -hiouh1 ，無編一個理由敢會通？某.ti7 厝裡，哪有可能出門兩三點鐘 扑麻雀sim-sek 。好友- -e3 幫伊想撇步：抑be7 曉ka7 恁某講我beh 招你去探病，來 去彰化chhian5 - - 兩三點鐘，是合人情，chit 步上讚，做你ka7 用（落去）。
兩點出門，五點才入門，三點鐘久是走去toeh？
Ah 都ka7 你講憨忠仔兄招我去彰化看阿筆仔兄。
阿筆仔兄按怎？
Ah 都破病leh 入院！
破病leh 入院？
m7 -sian3 ，你抑be7 曉去問憨忠仔兄？
講人人到，講鬼鬼到。憨忠仔ui3 外口lok8 -som7 lok8 -som7 行倚來：
taN，免閣編，免閣遍 - -a3，「龜腳趖出來」- -a3 啦，tu2-chiah 阿筆仔去阮兜才 ka5 漏氣- -nia5 ，伊講四點腳兜來恁兜chhoe7 你pho3-tau7 ，拄拄仔你出門去，差 一sut8 仔lo7 hou7 恁某詈kap put 。
忠仔兄！後擺若beh poah8 ，做你家己，mai3 定定leh 水鬼招跛遂，阮翁攏hou7 恁 chhoa7 歹去，猶有，拜託你講著話m7-thang 空嘴哺舌，歹代誌做傷濟，「龜腳趖出 來」- - a3，煞牽拖人leh 罵- -恁詈- -恁，按呢就歹意思，敢m7 是！
代誌著做正經，瞞騙行為sian m7-thang ，因為總有一工會「龜腳趖出來」就嚥氣漏氣 死死。###
【註解】：
加講加漏氣：[越描越黑]／嚥氣代：[丟臉失面子的事]／be7 lim be7 開：be7 lim 酒 be7 開查某，[不喝酒不嫖妓]／sim-sek ：心適，趣味。／chhian5 ：延，拖時間。／ 憨：做代誌bong2-tong2 ，m7 是戇。／m7 -sian3 ：m7 信。／lok8 -som7 lok8 -som7 行：[走起路來若無其事的樣子]／詈kap put ：詈罵兼掃地出門。／水鬼 招跛遂：歹人招歹人e5 意思。／chhoa7 歹去：[帶壞了]／牽拖：khan-thoa，[牽連] ／sian m7-thang ：千萬m7 好。／漏氣死死：非常漏氣。
─Siau Lah-jih
1999.04.19 龜皮龜內肉。（龜腳龜內肉）
週休兩工，亦無出外chhit-tho5 ，亦無chhoe7 朋友、親成講心內話，交換人生e5 酸 lam 、苦chiaN2 ，kan-na7 tiam3 厝裡罔ho7-li2 ho7-so7 ，報紙罔掀，電視罔看， 電腦罔拍，掀kah 手酸，看kah 起濛霧，拍kah 腰脊骨be7 直，閣淡薄仔酸軟， ko2-put-ji7-chiong 厝邊隔壁罔行踏，chhoe7 著隔壁kam2 仔店頭家周先生，kap 對 面修理冷氣、冰箱e5 林大兄，罔話罔pho3-tau7 ：
卡講嘛是恁做老師- -e 卡好，上班有錢，無上班嘛有錢，閣會凍一禮拜歇睏兩工，哪 像阮逐日都拚kah beh 死矣！
會haiN 才會醫得，罔haiN 罔過日，猶m7 是看恁逐日歡歡喜喜，嘴仔笑gi-gi！
¢h ！紅炸彈兩粒，又閣siong-tiong7 - -lou3 ！
上無嘛著了兩千，一張帖仔包一千。
一千會准過得？普通客戶包兩千會使chit ，若是大主顧，五六千都著包- -ou3 ！
A5 ！he.對周先生是小可代誌，猶m7 是「龜皮龜內肉」，chit-mai2 e5 人極膨風，娶 新娘攤，見辦著四五十桌，大攤- - e chiaN5 百桌- -e3 ，kan-na7 kam2 仔店貨來你 遮款，上少嘛beh ka7 lian2 - - 萬外箍a3 ，穩趁無了- - e3。
趁是會趁啦，無影恁所想- - e7 hiah 呢好趁。Beh 趁人e5 錢hiah 簡單？無交陪，無 送禮，人be7 曉去別位交關？大月時，紅包包be7 了，beh 斂閣be7 liam2 得，有夠硬 斗。
「龜皮龜內肉」嘛好，「龜腳龜內肉」嘛有人講，che 攏是恁生理人e5 生理步數，啥 麼買一送一，抑是買一千送五百，這也送，he 也送，其實是癮痀- -e 落崎----心內 知知咧，『羊毛出在羊身上』，敢m7 是？「龜皮龜內肉」，了錢生理是無人beh 做- -e5 啦！###
【註解】：
酸lam 、苦chiaN2 ：[酸甜苦辣]／ho7-li2 ho7-so7 ：[無所事事]／腰脊骨be7 直： [腰直不起來]／haiN ：哼。／siong-tiong7 ：嚴重。／了兩千：損失兩千。／龜皮龜 內肉：[羊毛出在羊身上]／lian2 ：趁，[賺]／beh 斂：[要縮減]
─Siau Lah-jih
1999.04.16 話，卡濟貓毛。
一個囡仔愛講話，到底是leh 講啥麼貨？
講天講地講koan5 低，講烏講白講大細，
講啥麼？講啥麼？講啥麼貨？
愈講愈濟，愈講愈濟，m7 知leh 講啥麼貨？
講kah 一布袋。
這是阮半線地區，員林鎮e5 施福珍老師寫e5 囡仔歌，講囡仔人厚話，愛講話，有- - e7 無- -e7 講kah 歸大堆，閒話廢話歸布袋，實在m7 是好習慣。
人e5 頭殼有七孔，目睭、耳仔、鼻孔各雙，單單嘴一kai5 ，意思真明顯，叫人 m7-thang 厚話，目睭、耳仔雙雙對對，斟酌看斟酌聽，mai3 批判，鼻一支有雙個鼻 孔，hou7 咱suh 空氣，清氣- -e3 入來，垃圾- - e3 出去，順紲鼻芳做the2-ge7 ， 芳臭mai3 議論，mai3 hou7 嘴孔講出聲影，好bai2 免辯解，自然be7 心悶。
可惜人e5 嘴，雖然孤一支，但是人e5 厚話，猶原十e5 鎮八九e5 ，m7 但囡仔愛講 話，連大人都大舌閣heng3-thih8 ，尤其是大人物，「話，卡濟貓毛」，愛講、heng3 講、閣gau5 講，講kah 有影有跡，有赴人聽，phok8-a2 聲一下扑，煞講kah bu7-sa3-sa3 ，m7 知影thang 煞；有e5 真正愛thih8-siong5，有- -e7 、無- -e7 胡 白膨風，人汽水開leh choaN7 ，伊猶m7 知影。「話，卡濟貓毛」，家己若m7 知影節 制，腳倉後一定hou7 人ge-se2。
m7-sian3 拍開TV ka7 恬恬仔聽，廣告藥材，風水、八卦、迷信、議論，股票分析，攏 講kah chheN 真chheN 真有影有跡；若是政治人物，國是論壇，講kah 嘴瀾全波，事實 做- - e5 ，有幾個照行；call in e5 功夫閣卡seng5 戰國，你講你e5 ，我講我e5 ， 管汰伊有人聽、無人聽，講若會song2 就toe3 會著時行，「話，卡濟貓毛」，講了 講，無衛生嘛無路用，何必爭論，講kah 歸布袋，何用？
嘴尖尖beh 講人，敢be7 使嘴合合，認份看家己？mai3 惹人講（我），電視節目e5 主 持人，建議你一個議題，邀請gau5 講話e5 國會議員、民意代表，抑是機關首長，做一 個另類e5 對話，叫出席人o-lo2 別人，指責家己，看啥人「話，卡濟貓毛」，見講都 是別人著，家己- -e7 m7 是，可能真趣味- - ou7。###
【註解】：
貓毛：niau-mng5。／七孔：chhit-khong2 ，chhit-khang。／垃圾- - e3 ：[骯髒的] ／做the2-ge7 ：體藝[體會藝術]做gi7-niu7 消遣。／十e5 鎮八九e5 ：[十之八九]／ thih8-siong5 ：愛講話。／汽水開leh choaN7 ：[噓聲四起]／ge-se2 ：批評諷刺。 ／m7-sian3 ：m7-sin3 ，[不信]／chheN 真chheN 真：[活生活現]／時行：流行。
─Siau Lah-jih
1999.04.15 鷹仔虎，haN2 死烏鶖。
鷹仔ti7 台灣人e5 心目中，無啥好印象，大概是受ba7-hioh8 （lai7-hioh8）e5 連 累，ba5-hioh8 著是大冠鷲（toa7 koan-chiu7），俗名叫蛇鷹，愛食蛇kap 蜥蝪 （sek-tong7 ），蜥蝪，著是像杜定、狗母so 蛇、母舅蛇hit 類e5 冷血動物啦，嘛時 常飛來人家厝偷咬雞仔囝，阮細漢時，若看著ba7-hioh8 飛來leh 空襲，就趕緊ka7 雞 仔囝關khit 來。有tang 時仔嘛bat 看過雞母為著顧雞仔囝，kap ba7-hioh8 輸嬴e5 鏡頭，hit 當時，阮攏會去hou7 雞母感動著，母愛e5 偉大，連動物世界都無輸咱人。
Ba7-hioh8 愛偷咬雞仔，是小人行為，所以ba7-hioh8 若去hou7 烏鶖看著，註定愛 hou7 烏鶖jiok kah 走無路，講嘛奇怪，烏鶖比ba7-hioh8 細隻濟- - lou3 ，卻是 ba7-hioh8 若tng7 著烏鶖，就哪見著皇帝按呢，甘敗下風，「烏鶖皇帝，ba7-hioh8 乞食」e5 簡單唸謠，chiong5 按呢ti7 阮囡仔e5 嘴口唸無停，看著烏鶖追 a7-hioh8 ，追kah 糞間去e5 鏡頭，阮囡仔攏會扑phok-a2 tau3 歡喜。
著是一下緣故，ba7-hioh8 、鷹仔黏做夥，「三隻鳥，一隻鷹；三個囡仔，一個海瑞 兵。」鷹，煞變做歹鳥hit 類，非非擅做，親像lou5-moa5 共款。其實台灣鷹仔誠濟 種，除了ba7-hioh8 以外，赤腹鷹（chhiah-pak ）、蒼鷹（chhong-eng ）、松雀鷹 （siong5-chhiak-eng）、林鵰（na5-tiau ）、蜂鷹（phang-eng ）、熊鷹 him5-eng ）kap 上歹運上衰siau5 ，愛hou7 台灣人拆食落腹e5 南路鷹（灰面鷲）， In 嘛m7 是攏會偷掠雞仔栽去孝孤。
因為鷹仔生性凶猛，閣去hou7 ba7-hioh8 害著，煞擔著歹名聲，有一種鷹仔，會ti7 半空中掠鳥仔食，凶猛超過其他e5 鷹族，鷹仔虎將按呢tiau5 名，伊是鷹族e5 老大， 歹chheng3-chheng3 ，kap 人類社會e5 大哥lou5-moa5 仝一樣，專門欺負弱勢，有e5 卡猛- - e5 ，嘛會控制政治人物，黑道haN2 白道，白道hou7 伊haN2 kah giong7 beh 死，親像「鷹仔虎，haN2 死烏鶖」按呢，食kah 油se2-se2 。
che 是公權力無能e5 時代，才會去hou7 黑道作威作福，「鷹仔虎，haN2 死烏鶖」， 歹人得意。若是有一工，白道道德勇氣chheng3 -koan5 e5 時，真真正正法律前人人平 等，hit 時陣e5 「鷹仔虎，haN2 死烏鶖」chit 句俗語，著愛重閣解說，按怎解說？ 「鷹仔虎，haN2 死死烏鶖」，是haN2 「死烏鶖」，m7 是haN2 「活烏鶖」。###
【註解】：
虎：[嚇唬]／haN2 ：[嚇唬]／烏鶖：大捲尾。／人家厝：住宅區。／jiok ：追逐 （tui-tiok8）。／凶猛：hiong-beng2。／tiau5 名：[被叫定了]／重閣： teng5-koh，重來。
─Siau Lah-jih
1999.04.14 南路鷹，一萬死九千。（鷹揚八卦）
「各位房長，各位兄弟：逐家閣勞煩巡巡看看咧！看有toe3 無著陣、身苦病痛、傷過 thiam2 頭- -e5 無？一路飛- - 來誠勞苦，taN.已經來到中部地界，下面著是出名e5 濁水溪，濁水溪過- - 去逐家就小chheng3 卡koan5 淡薄- -a3 ，借著春天e5 風勢， 然後放hou7 伊輕鬆仔飛，像『滑翔機』『三角翼』按呢慢慢仔chhu - - 落去，連鞭 就到半線地頭。八卦山脈e5 地形位置掠hou7 好，掠hou7 準，遐有一仙大佛為記， m7-thang be7 記得。
A-eng2 ！你做頭前趕去八卦山頂探- -一下，看有啥麼動靜無？是m7 是有鳥仔踏，抑 是天羅地網，趕緊轉來報告。」
「Eng5 - -a3 叔公！我知影，阮隨時就來去！」 負責探路顧安全e5 A-eng2 隨時 chhoa7 五六個兄弟，向北一直衝，負責e5 精神hou7 總領隊A-eng5 - -a7 感覺真放 心。
無一tah 久仔，探路先鋒A-eng2 In 已經斡倒轉來：
「報告Eng5 - -a3 叔公！天氣誠好，風誠順，八卦山頂好光景，今仔日閣是禮拜日， 有足濟人來ti7 大佛邊附近leh 散步chhit-tho5 看景緻，逐家攏笑微微，歡歡喜喜， 無啥麼thang 掛慮，而且樹林內無看著鳥仔踏kap 鳥網仔，做咱放心ka7 紮營無問題。 報告完畢！」
「猶有其他koh 樣e5 狀況無？」
「有人e5 所在真鬧熱，無人e5 樹林內kan-na7 有一寡鳥隻ti7 遐chhi-chhi chhu7-chhu7，唱歌lah8 曲、phong7-chhiak 跳舞，快樂e5 心情比人無卡輸。」 想 be7 到A-eng2 觀察chiah 入心chiah 詳細。
「各位房長，各位兄弟：逐家注意聽，紮營e5 營地八卦山tih-beh 到，大佛ti7 頭前 遐有看著- - houN3 ，各房隊長隊伍小整理一下，chhoe7 卡iap-thiap e5 樹林內紮 營，m7-thang oa2 車路邊，車路邊人濟、車濟誠危險，而且傷chhap-chap8 傷鬧熱會 hou7 囡仔驚- -著，按呢知影- -houN3？準備紮營…」
一路飛來千外里，有夠thiam2 ，Eng5 - -a3 想beh 小歇睏一下，無，遐e5 猴囝仔連 鞭又閣吵beh 聽講古，就無thang 歇喘- -lou3 。
「喂！慢且是- - leh lah ！危險- -ou3 ！各位隊長，趕緊叫逐家閣飛koan5 ， m7-thang 落基地，有聽矣無？危險啦…」開路先鋒A-eng2 hit 五六個兄弟緊張kah 凊 汗一直流，喝kah giong7 -beh sau 聲：
「Eng5 - -a3 叔公！卡緊khit 來！你看he 體育場東旁，遐e5 人群是leh 創啥？ i- i o- o，喊喊喝喝，亦有chhai7 旗仔，亦有搭布篷仔，有人提望遠鏡，有人ki2-ki2 指指，每粒頭殼攏khian3-thian khian3-thian 向ui3 咱遮來，大概無好空e5 款- -ou7，看破趕緊斡方向，徙ui3 別位- - 來去！」
「張持無蝕本，恁e5 顧慮誠著，m7-ku2 TaN.臨時臨iau7 beh 徙去toeh？…小等一 下，緊事khoaN 辦，mai3 急mai3 緊張，hou7 我斟酌看詳細，才做決定。」
「hou3！」
Eng5 - -a3 有影是老經驗，總領隊著是總領隊，實在無簡單，看伊老神在在，飛tiam3 半空中，thian2 開伊利劍劍e5 鷹仔目，巡視著八卦山頂每一跡，尤其是人濟e5 所 在，伊特別注意，特別注神ti7 人e5 穿插kap 面腔目神，看In 逐家穿kah sui2-tang-tang ，m7 是休閒服，著是運動衫褲，面容像春天e5 花蕾，歡頭喜面，不 時都看對有鷹仔e5 所在，嘴笑目笑，比比指指；ah .有- -a7 ！『鷹揚八卦』 e5 橫 批隨風 phiat8 來phiat8 去，ah .he 是leh 迎接阮來到chit 啦！
是leh 迎接阮，無m7 著！著！猶有幾個仔熟似面- -e7 ，著！he .著是愛阮鳥仔族e5 『鳥盟』 人士，ah！嘛有外國人- - neh ，攏是leh 迎接阮！攏是leh 歡迎阮！莫怪 chiah-nih8 鬧熱，人chiah-nih8 濟，比舊年有卡濟無卡少。
Eng5 - -a3 kui-e5 心肝頭開了了，心情做一個輕鬆khit 來，taN .免驚，kap 舊年共 一樣，有驚無危險：
「Eng2 - -a3 ！趕緊廣播，請逐家免著驚，放心仔安營，he.是leh 歡迎咱- - e3 ， 做您免驚，be7 ka7 咱害啦！In chiah-nih8 大陣人集合ti7 遮，著是等beh 看咱e5 風釆，beh 欣賞咱e5 技術，飛行e5 美姿。
交代落去，叫逐家慢且是歇睏，表演hou7 In 看，看咱鷹仔族e5 hiau-pai ，無論飛 koan5 飛ke7 ，孤一隻抑是掠相排，thian2 sit8 飛向天，抑是iap 尾飛衝落地，seh8 圓箍仔、車糞斗，若歡喜就做恁ki！ki ！ki ！唱出歌聲hou7 In 聽，免客氣免驚惶， 隨在恁chong5 ，隨在恁kek khong，人客看了若爽，就無枉費咱來chit-choah8，來遮 ka7 In chak-cho7 - -lou3 ！」
自按呢天頂kap 地上做夥hi-hi hoa-hoa，喊喊喝喝，歡喜寫ti7 面像，天頂飛kah chhiang5 -chhiang5 滾，八卦山頂e5 每一人攏笑bun2-bun2 。Eng5 - -a3 叔公In鷹 仔族今仔日上歡喜，台灣人e5 面子今仔日趁了上富裕，『鷹揚八卦』自按呢揚名國 外。
「阿公！你今仔日上蓋歡喜- -houN ！」 欲暗仔鷹仔族安營好勢，八卦山頂回復恬 靜，chhun 遐e5 細隻鷹仔猶leh 無時閒，ki -ki ka7-ka7 一直吵總領隊Eng5 - -a3 叔公著愛講古hou7 In 聽：「定著有故事beh 講予阮聽- - e ，阿公！阿公！阮beh 閣 聽你講古啦！…逐家phok8-a2 聲扑hou7 響，阿公beh 講古hou7 咱聽- -a ！」
phok8 ！phok8 ！phok8 ！phok8 ！phok8-a2 聲扑無停…
「好！好！好啦！beh 講就來講：
古早古早，咱e5 祖先toa3-tiam3 北方真遠真遠e5 所在，為著beh hou7 咱e5 囝孫有 卡好e5 生活環境，每年攏ti7 秋天時ui3 咱e5 故鄉起程，飛向南旁beh 去南洋度假， ka7 恁遮e5 序細飼hou7 大隻閣健康，教恁生活e5 才調，hou7 您家己會凍獨立，ti7 隔轉年e5 春天，chiah 閣chhoa7 恁轉去故鄉，ka7 恁完成婚事，生湠咱e5 族群，保 持咱灰面鵟鷹（Butastur indicus）e5 傳統kap 特質。
每一年ti7 落南抑是上北e5 路上，咱攏愛借台灣chit 塊 Formosa 土地暫時歇睏，習 慣上落南歇ti7 屏東恒春一帶，chiuN7 北就歇ti7 咱chit-mai2 歇睏e5 八卦山頂。」
「阿公！阮卡愛歇ti7 彰化e5 八卦山頂，無愛歇屏東kap 恒春。」
「為啥麼？」
「八卦山頂有人歡迎，好sng2 好chhit-tho5 ，屏東恒春遐誠危險，有鳥仔tah ，嘛有 網仔會予阮be7 tin2 動，有夠驚死人- -e5 neh ！」
「恁囡仔人m7 知影鳥仔tah kap 鳥網仔有外厲害，kan-na7 知影會hou7 恁be7 tin2 動，無thang sng2 ，無thang chhit-tho5 - -nia5 ，he.是beh - tih8 咱e5 生命， 恁敢知？」
「有影- -ou3 ！ah ti7 半線八卦山頂，哪會攏無鳥仔tah kap 鳥仔網？閣有hiah 濟 人來欣賞咱e5 飛行，按呢m7-chiah 有趣味好chhit-tho5 。」
「是時代leh 進步，人類已經有保育e5 觀念，知影保護咱遮歹命鳥，古早時代咱e5 祖 先就無chiah-nih8 好運，見若飛來到台灣停腳暫歇睏，就去hou7 In 剿kah giong7 -beh 斷種，恁敢知？南路鷹，一萬死九千…唉！」突然間，Eng5 -a2 叔公煞 目箍紅紅，目屎一大滴一大滴流落來…
「阿公！你哪leh 流目屎？」
「想著祖先e5 扑拼，為著生存，為著尊嚴，無惜生命，甘願犧牲認命，唉！攏是人e5 無知，煞hou7 咱lian5-hoe5 歹命。
古早古早，咱e5 祖先就教咱愛隨節氣搬徙，寒天時，咱e5 故鄉寒sih-sih，誠歹徛 起，m7-chiah 隨人組隊，趁冬季猶未到e5 秋天，千里迢迢飛過海洋到南洋度假，順紲 教恁技藝，ka7 恁chhiaN5 大漢，chiah 閣趁熱- -人beh 到晉前e5 春天，搬徙轉來去 故鄉，hou7 恁少年- - e5 完婚生湠，che 著是祖先留落來e5 傳統，每一kai2 經過 Formosa 地界，就會去遇著「南路鷹，一萬死九千」e5 災厄，嘛是宿命無奈，好佳 哉，chit-mai2 e5 台灣人已經覺醒，進入文明社會，有野生動物保育e5 觀念，而且經 過一寡有心e5 愛鳥人kap 彰化縣政府e5 認真宣傳，得著國際保育界e5 重視， m7-chiah 鬧熱chiah-nih8 感心e5 活動，向望明年、後年，一直到以後，咱e5 後代 囝孫，攏會親像今仔日按呢，平平安安，順順序序來過日，無驚惶，無死傷來經過 Formosa chiah-nih8 sui2 e5 地界，免歡迎無要緊， mai3 ka7 咱thai5 ，mai3 ka7 咱掠就真感謝。」
「阿公！哪會ka7 咱叫做南路鷹- -leh ？」
「這是In e5 祖先，看咱逐年都愛飛向南洋去，m7-chiah 按呢ka7 咱稱呼，無歹意啦 ！taN 誠暗- - a3，toe3 阿公祈禱了後著愛去睏，bin5-a2 早起著愛閣上路，無，會 peh be7 khit 來：
感謝天！感謝上帝！賜hou7 咱平安，賜hou7 咱歡喜，過去- - e5 mai3 閣鬱卒，未 來- -e7 ，著愛扑拼se3-ji7 。感謝台灣人，感謝半線e5 兄姊，恁e5 仁慈，恁e5 疼 心，阮會記得，望beh 恁嘛會凍平安快樂，免受恐嚇，免受壓霸，khioh 回尊嚴，著愛 家己拚！感謝！感謝！感謝！」###
【註解】：
鷹揚八卦：eng-iong5 pat-koa3。／thiam2 頭：疲勞。／chheng3 卡koan5 ：[衝高一 點]／三角翼：三角sit8 。／鳥仔踏：chiau2-a2-tah。／來去！：laih - - 去，走， 離開。／斡倒轉：oat 倒轉，越倒轉（oat8 倒轉）。／紮營：chat -iaN5。／ hu - - 落去：[滑下去]／koh 樣：[異樣]／狀況：chong7-hong2 。／唱歌lah8 曲： 唱歌拉曲。／iap-thiap ：[隱密]／chhap-chap8 ：參雜。／凊汗：chhin3-koaN7，冷 汗。／sau 聲：破聲。／chhai7 旗仔：[豎旗子]／ki2-ki2 指指：[比比指指]／ khian3-thian khian3-thian ：[看天張望]／無好空：m7 是好代誌。／張持： tiuN-ti5，斟酌，小心。／khoaN 辦：免緊張，慢慢辦。／thian2 開：展開。／穿插 ：[穿著]／面腔目神：面容眼神。／phiat8 ：[晃動]／hiau-pai ：驕傲。／thian2 sit8 ：展翼。／iap 尾：[縮尾]／chong5 ：跑，衝。／kek khong ：[裝傻，賣弄傻 相]／chak-cho7 ：[打攪]／才調：能力。／上北：chiuN7 北。／beh - tih8 咱e5 生 命：[要我們的命]／剿：chau5 ，斬草除根。／giong7 ubeh5 ：[快要]／lian5-hoe5 ：無停e5 歹命，苦e5 輪迴。／遇著：gu7-tioh8 ，拄著。／災厄：chai-eh。／宿命 ：siok-mia7。／peh be7 khit 來：[爬不起來]／khioh 回：[拾回]
─Siau Lah-jih
1999.04.13 搖人無才，搖豬無thai5 。
「又閣leh 搖- -a7 ，坐，m7 恬恬坐，讀，m7 認真讀，兩支腳khok8-khok8 搖， khok8-khok8 chun3 ，是顫beh chiuN7 童- -a7 hiouh1 ！
坐hou7 好，坐hou7 正！…按呢m7-chiah 著。」
坐hou7 好，會hong5 o-lo2 ；坐hou7 正，才會得人疼。各位小朋友，親像紀奇圳按呢 坐，m7 恬恬坐，讀，m7 認真讀，兩支腳親像an 發條，不時都sim3 一下sim3 一下， 無時閒，m7 但歹看相，閣會讀無冊，恁講好也m7 好？
m7 好！m7 好！阮才be7 按呢- -leh ，老師！猶有，陳文豪、高俊秀、林詩娥嘛攏會 phi2-phi2-chhoah - -ou7 。 Che .攏是歹習慣，歹習慣若養成，實在誠歹改，過去有一個學生，kap 紀奇圳共款， 一日顫kah 暗，無法度，In 父母拜託老師，上課中，用索仔ka7 伊e5 腳縛tiau5 - - leh，經過兩禮拜，chiong5 按呢be7 閣顫，紀奇圳，你若beh 改，會使chit 叫恁阿爸 ka7 我講，就用chit 步方法，好無？
「搖人無才，搖豬無thai5 。」人若搖搖擺擺，m7 是lou5-moa5 ，著是無大才，會 hou7 人看輕，hou7 人看無目地，著是會hou7 人『看不起你』啦！聽有無？
老師！哪會講搖豬無thai5 ？
豬仔大隻肥chut-chut，行著路一定tim3-tau2 tim3-tau2 ，著是『很穩重』，若是飼 kah 瘦pi-pa ，行路khok8-khok8 搖， hoaihN 一下hoaihN 一下，敢會thai5 得， thai5 無肉，賣哪會有錢，按呢聽有無？
豬若無肥，be7 使chit thai5 ，人若無tai7-chai5 ，著會腳來手來，無時閒， khok8-khok8 chun3 ，搖無停睏。搖人無才，著改！著改！###
【註解】：
khok8-khok8 搖：[不停的搖]／chun3 ：顫動。／chiuN7 童：童乩起tang5 。／an 發 條：裝發條。／sim3 一下：[抖動一下]／歹看相：phaiN2 -khoaN3 -siuN3 。／讀無 冊：冊讀了無好。／縛tiau5 ：[綁住]／chiong5 按呢：[就這樣]／lou5-moa5 ：流 氓。／無大才：bo5-tai7-chai5，[儀態不夠端莊][缺乏大材之威儀]／tim3-tau2 tim3-tau2 ：[沈著夠重量之貌]／hoaihN ：[左右搖晃]
─Siau Lah-jih
1999.04.12 無牛，駛馬。
「Eh！蕭老師，烏矸仔貯豆油----無teh 看- -lioh？閣也會曉gia5 毛筆寫大字，咱 叫是你kan-na7 是漢學仙仔兼gau5 唱歌- -nia5，真正無簡單！」
無啦！無啦！講khit 來嚥氣，ah -to7 「無牛，駛馬」啦！大國手黃老師無 i7 -leh ，書法家簡老師tng-leh 無閒，劉主任m7-chiah 交待我chhin3-chhai2 chut8 -chut8 - -leh，m7-thang 笑，請多多指教！
「無牛，駛馬」？有chit 款馬著愛罔駛，想be7 夠你e5 毛筆字chiah-nih8 lau2-tau5 。
敢有影？chit 款字敢會見眾- - li3 ？
e7-sai2-chit - -a3 lah ！siang2 敢嫌？
作田著愛駛田，駛田著愛牛犁耙，閣著牛來拖，田土才犁會好勢，無牛thang 駛，改換 駛馬，其實嘛會使chit ，只是咱台灣m7-bat 看著馬leh 犁田，「無牛，駛馬」只是比 論，罔代用，有thang 駛總是比無thang 駛卡嬴。
講著「sai2 」，s.ai.sai2 ，二聲sai2，sai2 In nia5 ，真歹聽；sai2 田、sai2 牛 攏真歹命；放sai2 會臭kouN1 -kouN1 ；駛車soah 變做無人講、m7-thang 講，講是真 歹聽？？？
奇- -lou3 ！奇- -lou3 ！ 這是ui3 toh 講起？哪會咱e5 父母話煞變做按呢生？定 定聽人講「駛車」真歹聽，愛講『開車』才會雅氣，才be7 hong5 笑song5 。oa5 ！ piang3 - -a3 ！咱台灣人已經變戇，已經變khong 。
開（khui），是拍開，開電火、開電視、開門、開店、開kiau2 間、開帳單…；駛，駛 車、駛牛、駛鐵牛、駛火車…有駛m7-chiah 會行路，一定會徙位 ，若無開牛beh 按怎 開。開飛機、開車…是kan-na7 用鎖匙ka7 電門扑開，車伊敢家己e5 行會徙位？語言 是中性，無著、無m7 著，嘛無好聽、歹聽e5 分別，kah 在你按怎講，無仝e5 語言應 該有無仝e5 表達方式，若是beh ka7 北京語e5 「開」kap 鶴佬話e5 「駛」lam7-leh 議論，按呢就誤解閣誤會- - lou3 ，『大便當飯；小便當菜。』如何解說，心內有思 偏，定著有偏見，心內無偏見，尊重無仝族群e5 話，對家己e5 言語嘛m7-thang 失去 信心。
註：最近常聽著人講，「駛車」真歹聽，愛講『開車』才卡幼秀，實在hou7 人感覺台 灣人哪會chiah-nih8 hiau-heng7，chiah-nih8 無知，無讀冊e5 ou-bah-sang2 按呢 講，少年人按呢講，連知識者e5 老師食頭路人嘛按呢講，有夠鬱卒。###
【註解】：
咱叫是：[我以為是]／無ti7 uleh5 ：[不在]／tng-leh 無閒：[正在忙]／ hut8 -chut8 - -leh ：[畫一畫、寫一寫]／lau2-tau5 ：老練。／敢會見眾：[可以亮 相]／oa5 ！piang3 - -a3 ！：[哇！我的天]／無著、無m7 著：[沒有對，沒有不對之 分]／ hiau-heng7 ：可憐代。／ou-bah-sang2 ：婦人。
─Siau Lah-jih
1999.04.02 kaN5 囝，半眠；飼囝，半飽。
邱老師，taN .囡仔我替你抱，趕緊菜湯攪攪咧，pe 一碗飯才be7 枵，人逐家leh 等 咱兩個，車ti7-beh 駛起pong7 - - a7 ！
chhoa7 囝有夠麻煩！食m7 成食，睏m7 成睏，請逐家m7-thang 見怪。
Be7 - - lah ，做你un5-un5-a2 來，小等一下無要緊！講著chhoa7 細漢囡仔，阮是過 來人，「kaN5 囝，半眠；飼囝，半飽。」chit 款寫照有夠合，尤其半暝仔，愛睏kah beh 死，連鞭beh 食奶，連鞭屎kap 尿，mai3 chhap - - 伊ma3-ma3 吼，beh chhap 一暝著khit 來兩三擺，tng7 著翁婿會曉tau3 saN-kang7 ，m7 卡輕鬆，若是tng7 著 大丈夫，大男子，閣嫌你最近哪會m7 chhap 伊，時常beh ko5-ko5 纏，你講愛睏kah beh 死，伊講你變心無愛伊，hit 時beh 按怎辯理？
若是乾家官toa3 做夥，閣卡lian5-hoe5 ，三頓無照起工，人講你不孝，若beh 照起 工，閣beh 上班，oa5 ！上班族e5 女性，tng7 著「kaN5 囝，半眠；飼囝，半飽。」 e5 時期，看破著愛休假卡實在，若無著愛請翁婿著諒解，為著khiN5 家beh 愛有卡好 e5 經濟，逐家會齊，saN-kap 疼痛，忍耐chit 段過渡e5 日子，期待未來e5 歡喜過 日。
「kaN5 囝，半眠；飼囝，半飽。」是事實，做翁婿e5 查甫人著了解，體貼太太才應 該，日- -時工課，暝- -時工課，著幫忙就幫忙，mai3 囉嗦，就m7-thang chhap8-chhap8 唸。###
【註解】： kaN5 囝，半眠：[伴著孩子睡，無法睡飽]／pe 一碗飯：[吃一碗飯]／駛起pong7 ：駛 起行。／chhoa7 囝：[帶孩子]／食m7 成食：[吃不像吃]／Be7 - - lah ：[不會啦]／ un5-un5-a2 來：慢慢仔來。／mai3 chhap - - 伊ma3-ma3 吼：[不管他，哭個不停]／ tau3 saN-kang7 ：tau3 幫忙。／大丈夫，大男子：大男人主義。／逐家會齊：逐家會 齊同心。
─Siau Lah-jih
1999.04.01 暗時巡田水，驚人m7 驚鬼。
濁水溪，台灣人e5 生命線， poaN5 山過嶺lo3-lo3 長， 養飼台灣人e5 囝孫， 千年無斷；
八堡圳，彰化人e5 活水泉， 彎彎斡斡牽真遠， 滋養半線縣e5 田園， 大遍久長。
八堡圳ui3 二八水鼻仔頭水門，就分做兩條圳，一圳負責八卦山邊e5 田園，ui3 田中 內彎另外分出一條中圳，負責山腳地勢卡koan5 e5 所在，卡倚大線路邊e5 水溝仔，是 ui3 內安國小附近khioh --來，一路經過塚仔埔流到社頭hit 旁，為著中圳kap 小水溝 仔會凍相thang3 ，ti7 塚仔埔南旁設有水門相通做調節，看大小水路e5 設計，彎彎斡 斡，keh8-keh8 ko5-ko5，事實是一領灌水網，灌遍所有e5 彰化平原，可見咱祖先e5 智慧，有夠飽學。
上天e5 庇佑，先民e5 開墾扑拼，雖然感恩不盡愛惜福，m7 敢怨嘆，可是事實e5 無 奈，共款一大堆，親像choh 著水尾田就真lian5-hoe5 ，播田期若tih-beh 到，為著田 水未im 煩惱kah be7 食tau3 ，水頭若是食有chhun ，半路人就相爭分，哪有你水尾e5 份。光天白日無我份，只好等候暗暝昏，十二點過後，鋤頭giah8 - - leh ，ui3 大溪 水門開始，水溝仔e5 am5 孔一直巡，若有leh 淹田- -e7 ，就ka7 塞掉，溝底若有 choh 壩，就ka7 掘隙，向望一路水順流，thang 流到阮水尾e5 田頭，會凍hou7 乾庀 庀e5 田土食hou7 飽，日後才有濁水米thang 止枵。
野外是暗眠摸，chit 條水溝仔兩三公里遠，閣著經過一公里長e5 墓仔埔，水雞仔聲， tou7-un2-a2 聲，參著溝仔水si-si-a2 流，阮無心情欣賞，嘛無時間驚惶，「暗時巡 田水，驚人m7 驚鬼。 」才是chit-chun7 e5 寫真，若tng7 著共款半暝khit 來巡田水 e5 鄉親，只好saN-kap 相分，夭壽若tng7 著壓霸e5 水頭田主，相扑都會發生，總是 「暗時巡田水，驚人m7 驚鬼。 」嘛是為著生活才著按呢生，作田人e5 鬱卒，作穡人 e5 無奈，sian 講嘛講be7 chhun 。
濁水米實在真好食，食e5 時陣請恁著感恩，無台灣作穡人e5 付出拚命，哪有今仔日e5 富裕好命？###
【註解】：
半線縣：彰化縣。／二八水：二水。／一圳：it-chun3 ，八堡一圳。／大線路：鐵路 縱貫線。／khioh --來：keng2 --來，[水從主流分到支流]叫khioh。／塚仔埔： thiong2-a2-p¢，墓仔埔。／相thang3 ：互相通透。／彎彎斡斡，keh8-keh8 ko5-ko5 ：[彎彎曲曲，參錯交插]／choh ：作田，種田，m7 是做田（cho3-chhan5）。／ lian5-hoe5 ：歹運連連。／im ：淹，淹田水。／be7 食tau3 ：中晝飯食be7 落去。 ／有chhun ：有剩。／am5 孔：涵洞。／掘隙：[挖孔隙，缺口]／tou7-un2-a2 ：[蚯 蚓]／si-si-a2 流：[細水長流]／寫真：寫照。／saN-kap 相分：互相分pheN 。／夭 壽：[糟糕]／講be7 chhun ：講be7 chhun-chhia ，講be7 分明。
─Siau Lah-jih
|
|
|
