台灣俗語鹹酸甜
1998.12
1998.12.23 寧可信其有，m7-thang 信其無。
1998.12.21 鉸是樣，做是像。（Ka .是iuN7，cho3.是chhiuN7。）
（19.20是拜六、禮拜，休睏兩工）
1998.12.17 隨人e5 ，隨人好；別人e5 ，生虱母。
（12.13是拜六、禮拜，休睏兩工）
1998.12.09 Poah8- loh8 囝兒坑，am2 糜仔相爭。
（05.06是拜六、禮拜，休睏兩工）
1998.12.04 飼後生、養老衰；飼查某囝，別人e5 。
1998.12.02 seng7 豬gia5 灶，seng7 囝不孝，seng7 查某囝，be7 落人家教。
1998.12.01 屘仔囝屘tiu-tiu ，無疼會夭壽。
1998.12.25 破柴，連砧也續破。
哪會chiah 戇，叫你破柴你續連柴砧仔都ka7 破掉，後日破柴，m7 著閣做一kai5 砧仔 ？有夠條直to-tioh8！
條直人做條直代誌，見講句句是真，一點仔都無hau-siau5 ：
二十年前，一陣囡仔tng-ti7 國校讀冊，人講學琴e5 囡仔be7 變歹，所以用心計較， 儉腸neh 肚，chhan5-chhan5 標兩陣會仔，買一台鋼琴hou7 囡仔彈，斯當時田中賣琴 e5 生理tng 車併，生理人若聽著啥人仔beh 買琴，隨講隨到，有嘴講kah 無noa7 ，只 要你有想beh 買，啥麼條件都敢答應你。
買琴了後無外久，已經有誠十個朋友來探聽，價數俗貴，品質好bai2 ，服務態度按怎 ？攏是買琴者關心e5 項目，chit 時真正是考驗做人e5 本分，講話e5 分 -lou3 ，講好聽話，hou7 人叫是咱leh 做khan-kau5-a2 - - leh ，無哪會一直替生 理人講好話，講賣bai2 無thang 好，無leh gian3 頭搧家己e5 嘴phoe2 - -講，琴 bai2 哪會beh 買？總是價數、服務、kah 啥物件會講chit，品質e5 好bai2 實在歹批 評，一分錢一分貨，在人感覺在人主意to7-tioh8 ，按呢攏be7 得失人。
有一工，同事張老師走來問講，你買hit 台琴彈了感覺如何？
Be7 bai2 啦！感覺滿意滿意。
敢無啥麼欠點e5 所在？
…想講家己e5 同事，kan-na7 講好聽話，一句也be7 -bai2 ，兩句嘛滿意，有影無夠 苛俗無夠朋友情，be7 勘得伊一再問che 問he ，ko2-put-ji7-chiong 才將一sut 仔無 滿意e5 缺點講hou7 伊知。
做老師- -e5 有影卡條直to-tioh8，結局人伊張老師決定琴m7 買，硬硬將送到厝內e5 琴kang5 退倒轉去，而且閣「破柴，連砧也續破」 講，人阮蕭老師嘛leh 嫌恁e5 琴無 thang 好，就是卡俗淡薄- -a3 ，人阮嘛無愛買chit 款琴，歹勢啦！
有影歹勢to-tioh8！伊琴ka7 人退轉去，一聲歹勢無代誌，抑我chit 個重朋友情e5 gian3 頭，煞hou7 人ki2 kap thok，「破柴，連砧也續破」，mai3 講卡be7 一腹火。 ###
【註解】：
一kai5 砧仔：[一個墊仔]／有夠條直to-tioh8！：[對啊！有夠條直]／tng 車併：正 在火拚，競爭kah 誠利害。／khan-kau5-a2 ：介紹人，仲介者。／賣bai2 無thang 好 ：giat8 -khiat-a2 話，[戲謔之語]／gian3 頭：戇頭戇腦。／苛俗：[不見外的意思] ／ki2 kap thok ：[用手指著罵]
***小貧惰一下！hou7 目睭小歇睏一禮拜，moa5 年即閣來！***
──Siau Lah-jih
1998.12.24 家己無看著耳仔。
國小e5 課程按呢排，拜六第一節課單週是週會，雙週是班會，自從每兩禮拜著有一擺 週休二工以後，週會kap 班會著輪流來，頂禮拜又閣輪著開班會，學生囡仔有夠歡喜， 因為真久m7-bat 閣hou7 In 大聲議論，尤其若講別人e5 m7 著，攏kai3 大聲kai3 有 趣味。
主席報告：各位小朋友！真歡喜徛tiam3 遮做主持，希望逐家tau3 相仝，hou7 班會開 khah 輕鬆，有話做恁講，著愛先gia5 手- - ou7 ！
幹部報告：
班長：chit 禮拜e5 表現真好，校長有ka7 咱o-lo2 ，感謝！
風紀股長：放學路隊愛排卡好勢咧，早自修mai3 講話，拜託逐家。
衛生股長：掃地著卡緊淡薄，才be7 掃be7 了。
……
閣來生活檢討，beh 發表- -e5 請gia5 手！
小博士：阿明足愛講話，攏m7 讀冊，希望伊改過。
古錐- - e5 ：金火- -e3 攏愛kang5 giu2 頭毛，人上chheh ，請老師處罰。
Lau3 -chang3 - -e5 ：有e5 小朋友無名牌，hou7 糾察員記去，『要改過。』
叔卿：Lau3-chang3-e5 家己穿衫無整齊，閣愛講別人。
哈！哈！哈！家己m7 好愛講別人！哈！哈！哈！…
Mai3 講話！chit-mai2 beh 請老師指導講話，逐家恬恬聽。
各位小朋友！今仔日班會真鬧熱，開了真成功，這著是民主時代，開會公開，有話逐家 討論，好- - e5 繼續做，歹- -e5 著愛改。老師問恁一句話：啥麼人有看著家己e5 耳仔？
無法度啦！kan-na7 有khoaiN3 別人e5 nia5 ！
正爿一葉，倒爿一葉，家己sian 看都看be7 著！
耳仔！耳仔！
著！恁著是「家己無看著耳仔」啦！tu2-chiah 聽恁生活檢討，攏leh 講別人，無一個 leh 檢討家己，按呢「有嘴講別人，無嘴講家己」m7 著，咱應該先檢討家己，chit 兩 禮拜以來，有啥麼欠點，有啥麼著改進，檢討家己m7-chiah 會進步，像恁按呢kan-na7 講啥人m7 好，啥人m7 著，be7 輸家己真乖真認真咧，這著是「家己無看著耳仔」， kan-na7 看著別人e5 nia5 ，希望以後改進。###
【註解】：
gia5 手：[舉手]／掃be7 了：掃be7 完。／kang5 ：ka7-lang5。／上chheh ：最討 厭。／Lau3 -chang3 ：穿插無整齊e5 模樣。／tu2-chiah ：[剛才]
──Siau Lah-jih
1998.12.23 寧可信其有，m7-thang 信其無。
暗時看TV，看胡瓜、高怡平主持e5 「非常男女」節目，男女相親合意beh 過tiaN7 ， 講著合八字，實在hou7 人感覺人e5 迷信哪會chiah-nih8 不可思議，sian 想都hou7 你想be7 到e5 愚痴。
婚姻e5 代誌，著兩人意愛，兩家序大人看會chiuN7 目上要緊，當然門風相對，學問相 當，嘛是促成美滿婚姻e5 要點，算命、合八字，he 是古早人對命運認識無夠， ko2-put-ji7-chiong 「寧可信其有，m7-thang 信其無」e5 無奈，chit -mai2 是啥麼 時代？火箭飛chiuN7 天，太空梭會當seh8 地球，太空、地球來來去去。著是探討人類 e5 科學、心理學，嘛進步kah 講khit 來hou7 人會接受會了解e5 水準，因何心理學e5 分析人m7 聽，偏偏beh 聽hit-lo7 相命嘴，星相家e5 胡lui3-lui3 ？
人e5 落塗時敢有影hiah 呢重要？仝年仝月仝日仝時生e5 人，何止你、我、伊，敢正 實有影遮e5 人命運攏一致？無可能，人e5 命運好歹有牽礙- - e5 ，m7 是kan-na7 ti7 八字而已，遺傳e5 因素，後天e5 教育，攏是影響一個人e5 前途。既然恁查某囝 （查某囝）都合意，恁兩老- - e5 嘛看了歡喜，哪著閣相信八字有合無合，有夠三 八，有夠八卦。
既然無相信八字影響命運，阿姆- -a3 ！ou-ba-sang2 ！請問你哪著閣去chhoe7 相命 仙- -e5 問疑問- -neh ？
問一個放心- - nia5 ！「寧可信其有，m7-thang 信其無」，你敢m7-bat 聽人講過？
抑若ka7 恁否認講m7 好，你beh 按怎？
人In 少年- - e5 若好著無問題，照少年人e5 決定著好勢啦！
實在有夠矛盾，其實是失去信心，台灣人欠缺主宰，著是因為按呢e5 迷信，講伊迷信 伊閣m7 信，講伊m7 信又閣beh 問，講是beh 問一個心安- -nia7-nia7，欺騙自己，欺 騙家己，be7 凍怪相命仙，be7 凍怪落塗時，應該著怪家己三八無藥醫，圓纏閣欠主 意。莫怪hou7 人koaN7 leh seh8 ，beh 也m7 ，攏是家己ko5-ko5 纏。
Chit 款心理，kap 咱台灣國人e5 圓纏仝一樣，hong5 thong2 .阮無愛，統一別人無 才調，喝台灣獨立講be7 使？中華民國在台灣，這是啥麼名？圓纏e5 話阮無愛聽，既 然李總統倡聲咱是新台灣（人），敢免看板另外換一個名，進入聯合國，全世界e5 人 m7-chiah 知影你是siang2 。到時In 中國仔若閣講咱是In e5 省份，抑是用hit-lo7 飛彈ka7 咱haN2 ，咱著免閣「寧可信其有，m7-thang 信其無」來驚kah gi7 -gi7 -chun3 。
人e5 命運mai3 靠運氣，人e5 婚姻m7-thang 相信八字，台灣新國家無beh hou7 外人 統治，台灣國愛有家己e5 名，台灣人民愛有獨立e5 志氣。###
【註解】：
胡瓜：ou5-koe。／高怡平：ko i5-peng5。／過tiaN7 ：訂婚。／看會chiuN7 目：[看 得上眼]／太空梭：thai3-khong-so。／落塗時：出生時辰。／koaN7 leh seh8 ：[騙 得團團轉]／beh 也m7 ：[要或不要]／圓纏：iN5-tiN5，有理分be7 清，beh kap m7 猶疑歹決定，ti7 圓圈內ko5-ko5 纏。／hong5 thong2 ：hou7 人統一，hou7 人 thong2 去食。／倡聲：chhiang3 聲。／siang2 ：啥人，[誰]／haN2 ：恐嚇。
──Siau Lah-jih
1998.12.22 囡仔人，跳過溝，食三甌。
囡仔e5 活動力，實在驚死人，透早到學校，就開始phut-phut 跳，有夠無時閒，你若 mai3 ka7 約束，話是講be7 了，比手畫刀連腳tio5 腳倉仔gio2。
透早到學校，一人chah 三包，正手koaN7 飲料，倒手提兩粒肉包，抑是phang2 kap 漢 堡，腳脊 phiaN 才phaiN7 一kai5 大包仔大包e5 冊包，一路chong5 入教室，開始sut 兼畫山畫水，一目nih 仔食了了，講beh 早自修閣無想beh 看書，突然間聽著鐘聲歡喜 kah ，隨時掃帚、畚箕sa-leh 起步走，beh 去樹仔腳掃土腳閣會當順紲車糞斗，走相 掠、跳hit 條溝仔，爽快ni-ni，歡歡喜喜。
才上一節數學，著等be7 得想下課，起立、敬禮聲boe7 煞，人已經走出門口去，咱叫 是In beh 去運動庭歡喜，結果m7 是，攏走toeh 福利社入去，牛乳、饅頭、包仔、麵 包、餅仔，隨在家己揀，揀揀食食咧，隨時就beh 閣去車跋反。
老師教In m7 著入去教室食！
ou2 ！腹肚真枵- -neh ，老師mai3 ka7 阮講啦！
想khit 來有影真古錐，「囡仔人，跳過溝，食三甌」 ，有影to-tioh8！
會食才會大，會食運動量當然嘛卡大，食會落去，續落去著是跳來跳去，閣會放屁，成 長定著健康，囡仔e5 gau5 大kai3-seng5 leh pun5 風，「囡仔人，跳過溝，食三 甌」，囡仔e5 活動m7-thang ka7 禁止，著教伊注意安全se3-ji7 ，若是tng7 著 kan-na7 愛食m7 tin2 動e5 囡仔兄，做父母- -e5 著斟酌se3-ji7 ，『小胖哥、小胖 妹』已經真濟，臭肥、垃圾肥m7 是好看頭，he 是無健康e5 前兆，用減食儉食來減 肥，不如培養運動e5 趣味卡嬴，何況約束囡仔mai3 食減食，m7 但無可能，嘛是m7 甘。###
【註解】：
三甌：saN-au ，茶甌。／腳倉仔gio2：[扭屁股]／chah 三包：帶三包。／正手： chiaN3 ，[右手]／倒手：to3 ，[左手]／phang2 ：麵包。／腳脊 phiaN ：[背]／ phaiN7 一kai5 ：[背一個]／大包仔大包：[非常大包]／chong5 入：[衝進]／sut ： sYt ，食。／sa-leh ：[拿著]／mai3 ka7 阮講啦：[不要跟我們講這些話啦]／臭肥、 垃圾肥：[痴肥]／好看頭：表面好看。／何況：ho5-hong2。
──Siau Lah-jih
1998.12.21 鉸是樣，做是像。（Ka .是iuN7，cho3.是chhiuN7。）
自從剃頭店漸漸變色了後，十幾年來就罕得hou7 剃頭師傅剃頭，攏是靠牽手hit 雙手 kap 一支鉸刀，鉸鉸剪剪咧，面mai3 修，鬢邊mai3 chaN2 ，十外分鐘久，就鉸kah 好 勢好勢，任啥人都m7 知是外行人整理e5 頭毛，厲害- -houN ！
頭毛又閣傷長去- -lou3 ，著閣勞煩厝內這個大師傅一下，師傅chim-mih 鉸chim-mih 講，遮傷長著剪卡短，噯喲！你e5 白頭毛哪會愈來愈濟？我講鬢sui 白白e5 部分著鉸 寡掉，卡be7 hou7 人感覺hiah 臭老，tin-tin -tong-tong， si-si -siak8-siak8， 五、六分鐘著已經有新型。
好- -a3 lah ，頷頸仔活beh chiuN7 - -死，我beh 來去洗頭毛！
哪有hiah 緊？「鉸是樣，做是像」，chit-chun7 m7-chiah 鉸一個形體- -nia5 ，毛 腳、後tau2 khok-a2 著愛閣si-a-geh m7-chiah 會看chit。
「鉸是樣，做是像」，講了閣誠有意思！
這是阮老母卡早時常教我e5 話，叫我學裁縫著愛認真學，m7-thang kan-na7 學一個 樣，學一個皮仔著好，講人我to7 有學裁縫，會曉做洋服褲- - a3 ！若kan-na7 按呢 就滿足，著是半籠師，實在無卡choah ；beh 學著愛學hou7 起，會曉量、會曉裁、會 曉車、會曉熨，會曉做歸套，才有seng5 一個師傅。
有hit-lo7 阿nia5 ，莫怪會教出chit-lo7 查某囝，m7 是Siau,Lah-jih leh pun5 雞 kui ，我chit 個做衫仔牽手，功夫是一流- - e5 ，會量、會設計，會鉸、閣會做，講 一下卡無輸嬴咧，kan-na7 看著你e5 身材，就會當做一軀西裝hou7 你穿kah kah 軀 kah 軀。伊時常講，beh 學做衫，一定先學原形，原形若學會分明，任何人e5 身份， 叨位著增加，啥麼所在著liap -oa2 ，攏嘛無問題，「鉸是樣，做是像」，到底是裁剪 卡重要，抑是車工才是功夫，攏免議論，無一流e5 設計，車工卡gau5 嘛展無路來，做 工會sui2 ，嘛著幕後gia5 尺kap 筆e5 設計師，「鉸是樣，做是像」，m7 是有樣看 樣，無樣家己想，閣卡m7 是鉸kap 做，一人一樣，按呢就m7 成樣，「鉸是樣，做是 像」，著是ka 是iuN7，做是chhiuN7，鉸一個款式，做愛照起工，才會相親像，成一個 模樣。###
【註解】：
chaN2 ：[斬截]／chim-mih 鉸chim-mih 講：[一邊鉸、一邊講]／任啥人：[任你是誰] ／chiuN7 - -死：[癢死了]／後tau2 khok-a2 ：[後腦袋]／si-a-geh：[修飾]／半籠 師：[半生不熟的功夫]／無卡choah ：枉費無效。／學hou7 起：學hou7 頂真，有一個 樣。／阿nia5 ：老母。／hit-lo7 、chit-lo7：[那個、這個]／pun5 雞 kui ：[吹 牛]／kah 軀：合軀。／liap -oa2 ：[捏小一點]
──Siau Lah-jih
1998.12.18 相扑恨無力，相罵恨無話。
Chit 擺看人選舉，鬧熱滾滾，可惜欠水準，逐工kan-na7 聽人teh 相罵，聽人leh sio-cheN3 ，罵kah 無臭無siau5 ，cheN3 kah 頷仔頸筋pheng7 大條，實在誠惡質， 誠無衛生，教歹囡仔大細。
講著相罵，才去hou7 我雄雄想著，chit-mai2 e5 人kai3-seng5 be7 曉相罵e5 款， be7 曉相罵e5 意思是講罵了無夠藝術，無才調一句來，一句去，免草稿，na2 念經按 呢一直續落去。想起細漢時，厝邊阿花- - a kap 菊- -a3 hit 兩同姒[妯娌] 仔，兩 家be7 和，時常徛tiam3 門邊罵chhit-tho5 ，一個ti7 正身，一個ti7 護龍，一句詈 過來，一句戽過去，be7 teng5-taN5 ，be7 大舌，一罵點外鐘，氣be7 喘，心be7 凝，嘴若ta ，小停lim 一嘴茶水才閣teng3 ，「君子動口無動手」 有夠心適。
Chit- mai2 e5 人無共款，意見be7 合，聽了be7 爽，三鋤頭兩畚箕，chhin3-chhai2 戽戽leh ，kan3 x nia5 ，駛x nia5 ，續落去著是beh 相cheng ，tng7 著古意人就真 僥倖，面仔紅紅，嘴仔開開，『你不要這樣嘛？你不要這樣嘛？』chhun - -e5 著是據 在人『你他媽的…』lu7 - lu7 叫，罵kah hou7 你大心氣。你無khoaiN3 ，電視頂e5 kh¢-in3 （call in）節目，m7 管台頂台腳，講著華語，啥款人上精？逐家心知肚 明，你看人講著話實在本頂，有條有理gau5 牽絲，be7 tak 舌，嘛be7 話屎一大堆： hak-ka-ngin 小弟無了解，若是Ho7-Lo2 人to7 有夠害，北京語be7 輾轉，著是會輾轉 嘛是be7 kaN5-nng5，時常會咬舌，若khap8-tioh8 kap 台灣本土有關係，beh 翻譯閣 翻be7 好勢，啥人有水準，隨hou7 人看出出，冤枉- -a3 ，台灣e5 Ho7-Lo2 人，你 e5 語言已經不答不七，你若m7 -sian3 ，以後請斟酌看斟酌聽，m7 是Siau,Lah-jih leh 講無影，Ho7-Lo2 人e5 北京語講kah 會流利- -e5 到底有外濟？
「相扑恨無力，相罵恨無話」 ，m7 是leh 鼓勵啥麼貨，相扑相罵攏m7 是好chhoe7 頭，m7-ku2 社會事oh 講，你m7 khap8 人，人卻beh chhoe7 你piN3 猴弄，你beh 做 好人，人閣m7 hou7 你輕鬆，thiau-kang chhoe7 你相 tak ，所以咱愛有覺醒，tng7 著著kap 人拚koan5 低，sio-cheN3 辯論計較輸嬴的時，你就會了解氣力、語言實在 be7 凍放外外，實在是真要緊的代誌，千萬m7-thang 閣講he會通著好，吞忍著無代 誌。
朋友！逐家請用父母話，既然人聽有，咱著講咱e5 話，免se3-ji7 ，免客氣，若是朋 友ka7 你講歹勢，恁e5 話我聽無，到時咱才用通用話北京語kap In 交陪，Ho7-Lo2 話，hak-fa，原住民話，已經beh 斷種，若無趕緊救回，beh 等ti7 時。
「相扑恨無力」 ，國家愛強，族群著和諧，扑拼為台灣，「相罵恨無話」，才知母語 失落有外濟，挽救母語，上重要是家己扑拼，族群之間，嘛需要互相相keng7 ，做夥來 推sak 。###
【註解】：
sio-cheN3 ：相諍，[抬槓、辯論]／kai3-seng5：[很像]／無才調：無能力。／na2 念 經按呢：親像念經按呢。／同姒仔：tang-sai7-a2，[妯娌]／詈：le2，查某人e5 罵。 ／戽：hou3，用手勢撥- -出去。／嘴若ta ：若是嘴乾。／teng3 ：互相打擊。／相 cheng ：[打架]／真僥倖：真hiau-heng7，[真糟糕可憐]／khoaiN3 ： hoaN3 -kiN3 。／kaN5-nng5 ：[完全，面面俱到]／khap8-tioh8 ：牽涉著。／看出出 ：看著一目了然。／m7 -sian3 ：m7 信。／好chhoe7 頭：[好的帶頭模範]／你m7 khap8 人：你m7 惹人。／piN3 猴弄：變把戲，戲弄你。／放外外：置之度外。 ]
──Siau Lah-jih
1998.12.17 隨人e5 ，隨人好；別人e5 ，生虱母。
拜三下晡，無學生leh chak ，同事心情閒lo-lo ，圍倚辦公桌，泡茶罔話仙，講著咱 台語Ho7-Lo2 話e5 失落，不免使人懷念早前庄腳人，開講hou7 人輕鬆跳弄e5 情景， 原因之一是古早生活卡無chit-ku2 e5 緊張，自然有閑hap-sian ；原因之二是，言語 會投機，be7 講無話，無論老大人囡仔兄，Ho7-Lo2 話有純正，講就聽有，罕得講be7 輾轉，be7 赴人聽e5 阻礙。
講罔講，嘛是有人怨嘆be7 入心，燒茶猶是罔lim ，逐家攏是半e5 國語人，中毒有夠 深，chit 時有人雄雄吟出：『床前明月光，疑是地上霜；舉頭望明月，低頭思故 鄉。』 問講台語beh 按怎吟？
「chhong5-chian5 beng5-goat8 kong，gi5 si7 te7-siong7 song；ki2-thio5 bong7 beng5-goat8，te-thio5 su kou3-hiong。」其實這是漢文音，m7 是Ho7-Lo2 話，咱怨 嘆失落去是Ho7-Lo2 話，m7 是漢文音，啥麼是Ho7-Lo2 話，簡單講著是逐家leh 開講 chit 款父母話。
Ah 若用父母話beh 按怎吟？
試看覓咧！「chhng5-cheng5 beng5-goeh8 kng，gi5-si7 te7-siong7 sng； gia5-thau5 beng7 beng5-goeh8，ke7-thau5 su kou3-hiong。」
哪會無kat-goa7 好聽，親像欠啥麼韻味e5 款。
無m7 著，這是唐詩，當然應用中原古音e5 漢文音，才會押韻。chit -mai2 咱ka7 用 咱e5 母語Ho7-Lo2 話改寫一下才來吟：「 床前月光光，叫是leh 落霜；taN 頭看天 頂，想著toa3 田庄。」「chhng5-cheng5 goeh8 kng-kng，kio3-si7 leh loh8-sng； taN -thau5 khoaN3 thiN-teng2，siuN7-tioh8 toa3 chhan5-chng。」感覺如何？
有影be7-bai2 to-tioh8，白話閣押韻，免解說，有家己e5 鄉土味，攏是過去庄腳e5 記持。
著！這著是解救母語，推銷台語文e5 宗旨，中國e5 文化雖然好，咱嘛ka7 khioh 真 濟，漢字漢文化oh-tit ka7 放離，m7-ku2 若一直著倚靠伊，m7 甘放be7 記，嘛是be7 使chit ，按呢咱著無法度建立家己主宰e5 台灣文化。有人嫌咱台灣欠缺高水準e5 文 化，這假那有影嘛假那無影，有影- -e5 是咱看著- -e5 攏是低層農工兄弟e5 話語， 有知識bat 字e5 鄉親，親像你我，攏toe3 統治者e5 腳步向前行，講日語，講華語， 莫怪咱e5 子弟，有e5 已經將華語當做是In e5 母語。無影- -e5 是有水準e5 台灣文 化，m7 是hou7 人放sak ，著是hou7 人khng3 leh 生菇生虱母，讀冊人、知識者，到 底有外濟人去關心過，beh 愛有氣質e5 台灣話，需要知識者去創造，beh 愛有高尚e5 文化，共款著靠讀冊人去創作。中國文化卡好嘛是別人e5 ，台灣文化好抑bai2 ，著愛 liau5 入去了解才會知，就算講你猶欣賞be7 來，嘛是m7-thang 排斥，敢有人嫌家己 e5 父母bai2 e5 道理，想嘛知。
林老師聽了有同感，隨嘴應講：「隨人e5 ，隨人好；別人e5 ，生虱母」，講去誠 ui3 ，誠著。Beh 愛家己e5 台灣語言復活，beh 愛家己台灣文化會進步，各族群e5 鄉 親，先建立「「隨人e5 ，隨人好；」 e5 觀念，mai3 嫌家己bai2 ，mai3 嫌咱台灣， 用心扑拼才會嬴。若講「別人e5 ，生虱母」 ，咱嘛無必要hiah 無肚量，族群之間， 總是互相相keng7 ，互相鼓勵，合作團結e5 台灣，才有向望。###
【註解】：
隨人e5 ，隨人好：[自己的自己好]／chak ：囉嗦攪吵。／閒lo-lo：閒sian-sian ， 無代誌做。／hap-sian ：話仙。／be7 講無話：[不會無話可說]／講就聽有：[一開口 就聽懂]／be7 赴人聽：hou7 人聽無，hou7 人聽be7 夠氣。／無kat-goa7 好聽：[不 怎麼好聽]／記持：ki3-ti3，[記憶]／khioh ：[撿，拾]／oh-tit ：真困難。／欠缺 ：khiam3-khoeh。／liau5 入去：投入。／猶欣賞be7 來：[還不會欣賞]
──Siau Lah-jih
1998.12.16 囡仔人，腳倉三斗火。
「囡仔人，腳倉三斗火」，確實有影，無ka7 汝騙。
周明華，你猶閣teh 穿短手 ng2 衫，敢be7 寒？你看老師穿幾領，內衫、襯衫、膨紗 裌仔、外套，攏總三領，抑你才穿一領熱天衫，傷少啦！
老師！我be7 寒！
穿一領衫仔e5 人徛khit 來！
一、兩、三、四、五…十一、十二、十三、十四，oa5-a2 ！恁攏be7 感覺寒- -ou3？ 有影「囡仔人，腳倉三斗火」都著。
啥麼是「囡仔人，腳倉三斗火」？ah m7 燒燙燙！
著！著！著！著是講恁囡仔人m7 驚寒啦！無像老師按呢，小可寒 - -一sut a3 ，衫仔 著愛加穿幾若領。
囡仔著是囡仔，血氣旺盛，一日到暗著是真無閒，無閒sng2 ，無閒食，食飽消化，放 屎tou2 枵，tou2 枵閣再食hou7 飽，因為beh 成長，真重食，食量若濟，熱度著用be7 了，體力有足，著四界chau2-chong5 ，活跳跳，「囡仔人，腳倉三斗火」，是好現 象，是健康e5 時鐘。###
【註解】：
手 ng2 ：[袖子]／襯衫：chhin3-saN。／膨紗裌仔：phong3-se kah-a2，[毛線背心] ／燒燙燙：[熱得不得了]／tou2 枵：[肚子餓]／重食：tiong7-chiah8。
──Siau Lah-jih
1998.12.15 八十歲才leh 學pun5 鼓吹。
庄裡e5 老歲仔bat 字班，一禮拜上課點半鐘，教a3 教，讀a3 讀，閣也繼續年外猶閣 be7 想懶，每擺上課攏歡喜kah ，問講敢無愛歇睏一下，閣攏真驚矣m7 ka7 In 教，一 直講m7-thang 歇睏啦！m7-thang 歇睏啦！請老師一定著愛教落去。
想起tu2 開始hit 陣，為著驚In 無趣味，be7 愛來讀，thiau-kang 編台灣唸謠、囡仔 歌hou7 In 唸趣味，結果有影效果be7-bai2，唸kah beh 臭酸- -a，嘛唸kah 笑微 微，chit 學期逐家參詳換口味，試教In 唸台灣民謠，m7-bat 字閣欠音樂細胞，beh 教實在食力，大部分e5 老歲仔人，攏講過去也m7-bat 唱啥麼歌，chit-mai2 雄雄「八 十歲才leh 學pun5 鼓吹」，敢學會曉？
老師！阮若唱he 狗聲乞食喉，著m7-thang 笑- - ou7 ！你若ka7 阮笑，阮是會見笑。
Beh chia3 - e7 會，食kah 老學kah 老，應該著ka7 恁鼓勵，o-lo2 都be7 赴，怎 thang ka7 恁欺負，笑恁食老m7 認輸？be7 - lah！做恁大聲ka7 唱落去，唱hou7 伊 快快樂樂，唱hou7 伊歡歡喜喜，人若o-lo2 是恁gau5 ，人若棄嫌才講老師頇慢教，老 師都m7 驚，恁leh 驚啥？
老師chiah-gau5 講笑詼，按呢阮著beh ka7 唱kah hou7 伊落下頦- -ou7！
「八十歲才leh 學pun5 鼓吹」，人我Siau,Lah-jih 雖然無hiah-che7 歲，不過歲頭嘛 beh 六十，chit 幾年著是抱著「八十歲才leh 學pun5 鼓吹」e5 精神，為著台文e5 工 課，m7-chiah chhan5-chhan5 kap 人學電腦，想beh 利用HOTSYSR e5 軟體，看會凍做 卡濟無！學電腦實在有夠食力，過去讀he 『吃飯睡覺』e5 師範學校，閣欠認真，英語 學無goa7-gau5 ，講.m7 驚人笑，實在是無半撇，英語接近文盲，beh 學電腦有夠 khong ，是好佳哉，後壁有一寡少年leh 牽教，做後靠，閣tng7 著家己實在會o-lo2 chit，拚勢學，雖然到 taN 猶原對電腦e5 概念猶花ko5-ko5 ，歡喜- -e5 是台文e5 工課已經做be7 少。
「八十歲才leh 學pun5 鼓吹」e5 精神著學，老人歲頭有卡濟，體力會卡老衰，食老m7 認老是警告你體力m7-thang beh kap 少年仔比，但是精神方面，活kah 老學kah 老， 千萬m7 好喝停止，認真做會hou7 人精神爽快，Siau,Lah-jih 家己o-lo2 ，有影好模 樣。###
【註解】：
pun5 鼓吹：[吹嗩吶]／狗聲乞食喉：真歹聽e5 意思。／見笑：kian3-siau3，[害羞] ／Beh chia3 - e7 會：[哪兒會呢]／o-lo2 都be7 赴：[誇獎都來不及]／怎thang ： 哪會使chit 。／落下頦：笑到[掉下巴]／chhan5-chhan5 ：[索性、乾脆]／有夠khong ：有夠[傻瓜]
──Siau Lah-jih
1998.12.14 菜若無蟲，世間就無人。
Toa3 ti7 庄腳祖家e5 四嫂，出來街路hak 貨，順紲koaN7 一pe2 白菜來hoa7 ，特別 交代講：屘叔仔！che 是無choaN7 農藥- -e5 ou7 ，是ti7 咱兜hit 塊園仔家己種- - e5 ，做你放心食，不過有卡歹看樣淡薄仔。
噯喲！阿母！有蟲neh！阿姆送來e5 白菜有蟲，ngiauh8-ngiauh8-so5 ，我m7 敢洗， ka7 tan3 掉好無？
Heh a7 -thang ！「菜若無蟲，世間就無人」，你無聽阿姆講，彼是無phu7 農藥e5 青 菜，有菜蟲是當然e5 代誌，洗hou7 清氣著好，菜蟲無毒，著是食入去腹內嘛無要緊， 有choaN7 農藥- -e5 才是be7 使chit 食。
天地養飼萬物，順其自然無私偏，有人就有蟲，為著生活，大自然e5 生物形成食物鏈 kap 食物網e5 平衡關係，相剋又相生，維持地球頂萬物生湠，鬧熱滾滾，充滿希望。 因為人類e5 過度開發智能，煞變成奸巧無智慧，kan-na7 為著貪食享受，用盡各種科 學技術，消滅表面上對人類有害e5 生物，結果續來家己害家己，帶來真濟無方便，生 存e5 危機。
有人就有蟲，「菜若無蟲，世間就無人」，che 是自然現象，非常正常，維護大自然e5 生態平衡，著靠逐家有正確e5 觀念，愛護大自然，免破壞著盡量mai3 陷害，萬物是平 等- - e5 ，為著生活，愛存有向大自然討食e5 謙虛態度，人定勝天，he 是人類e5 愚 戇，m7 是本頂。###
【註解】：
hak 貨：買貨。／順紲koaN7 一pe2 白菜來hoa7 ：順便提一把白菜來hou7 我 。／屘 叔仔：ban-chek-a2，[最小的小叔]／choaN7 ：濺，噴。／Heh a7 -thang ：[那怎麼 可以]／phu7 ：phun3 ，噴。／相剋：siong-khek，sio-khek。
──Siau Lah-jih
1998.12.11 若beh 學問好，需要問三老。
Chit 七、八年來，認- - e5 師父特別濟，有台文老經驗e5 前輩，李勤岸、陳永寶、 陳明仁、陳豐惠、陳雷、呂興昌、張學謙、楊青矗、洪惟仁、鄭良偉、鄭良光kap 台語 網e5 眾兄姊，蘇芝萌HOTSYSR 高手群，黃勁連，林央敏…等等，遮e5 先覺教我認bat 台語聲韻、台語文、彙音寶鑑、ㄅㄆㄇ、白話字kap 漢羅lam7 寫、白話字輸入法，台 灣俗語…嘛有基督教友e5 指示，宋澤萊e5 佛陀道理，hou7 我心安定，為著台文來扑 拼。 另外故鄉e5 序大老歲仔，有In純正e5台語，台灣e5 古早味，tau3 幫忙才be7 hou7 台 灣俗語鹹酸甜漏氣，老歲仔人記智上古芳，現代e5 資訊雖然m7-bat 外濟，古早時代e5 孔孔縫縫，若m7-bat ，請教 In 就be7 chhoe7 m7 著人，捷問老大人，卡嬴家己 chhoe7 資料歸半工。Bat 人卡好bat 銅，老歲仔人是回復台灣文化e5 向望。
老實人be7 講hau-siau5 白賊話，若beh 問正經道理，問老實人一定無問題，In be7 曉烏講白，講m7 著氣嘛be7 kap 你gou7-ma2-hoe。若是kan-na7 有嘴sui2 ，無實在 gau5 pun5 雞 kui e5 胡lui3 - lui3 ，千萬m7-thang 請教才be7 食虧，學問beh 好，著愛好正道，若he o-li2-o-cho ，烏白話亂亂ko5 ，就m7-thang toe3 伊sng2 chhit-tho5 。老實人講e5 道理m7 是真深，卻是可靠，be7 hou7 人行去烏暗路。
「若beh 學問好，需要問三老」，家己e5 學問m7 敢o ，不過家己會知，chit 幾年有 影真進步，攏著感謝各位老經驗，老歲仔kap 古意人e5 指點，才hou7 Siau,Lah-jih e5 經驗一日一日成長。
「若beh 學問好，需要問三老」，研究台灣文化e5 三老，第一老是老經驗，第二老是 老大人，第三老是古意e5 台灣人，有純正，有經驗，be7 ka7 汝騙hou7 你sa 有總， 學khit 來誠輕鬆。###
【註解】：
三老：sam-lo2。／古芳：kou2-phang，[古色古香]／孔孔縫縫：hkang-khang phang7-phang7，[大大小小，瑣瑣碎碎]／捷問：chiap8-mng7 ，常常問。／ gou7-ma2-hoe ：強辯。／gau5 pun5 雞 kui ：[善於吹牛]／胡lui3 - luI3 ：[胡扯] ／o-li2-o-cho ：o-cho，a-cha ，骯髒。／亂ko5 ：[亂攪亂說]／sng2 chhit-tho5： [玩好玩的]／m7 敢o ：m7 敢o-lo2 。／sa 有總：sa-u7-chang2，[有頭緒可循]
──Siau Lah-jih
1998.12.10 弄鬆假重，猴囡仔騙大人。
吳嘉禾、許登科，來，過來老師遮！（Beh 創啥？）
將糞埽桶續koaN7 過來！（hou3 ！）
按呢leh 創啥貨？閣假kah 有影有跡，假那重oaihN - oaihN 咧，都無半桶垃圾，就 beh 扛去倒，老師按怎ka7 恁講，垃圾仔著te2 hou7 tiN7 才扛去倒，恁按呢「弄鬆假 重，猴囡仔騙大人」，敢著？閣去te2 hou7 tiN7 ，土腳掃好，入去教室烏枋頭前遐罰 徛。
……
各位小朋友，吳嘉禾、許登科哪會hou7 老師罰徛？
In 無聽話！
In 無認真掃土腳！
In 兩個冤家！
攏m7 是，In 兩個leh 「弄鬆假重，猴囡仔騙大人」。
啥麼是「弄鬆假重，猴囡仔騙大人」？
Tu2-chiah 掃土腳e5 時，吳嘉禾、許登科兩個人beh piaN3 糞埽，糞埽桶內e5 糞埽才 te2 一屑仔，In 就用樹枝ke2 -to3 頂面假hou7 tiN7-tiN7，按呢兩個著beh 假倒糞 埽，thiong3- a2 lok8-to5 去chhit-tho5 ，按呢騙老師，好也m7 好？
M7 好m7 好！「弄鬆假重，猴囡仔騙大人」！「弄鬆假重，猴囡仔騙大人」！吳嘉 禾、許登科是歹囡仔。……
「弄鬆假重，猴囡仔騙大人」，有影be7 使chit ，著愛教示，囡仔有時總是會刁持故 意，若m7 是惡意扑人，抑是有危險e5 piN3 - khang，做老師- -e5 抑是序大人，著 愛看做真平常來處理教示，m7-thang ka7 看做真嚴重，「愛」 e5 教育有卡無輕鬆。 ###
【註解】：
猴囡仔：著是講囡仔，無歹意。／續koaN7 過來：順便提過來。／重oaihN - oaihN ：真重。／te2 hou7 tiN7 ：[裝滿]／烏枋：¢-pang ，[黑板]／Tu2-chiah ：[剛才] ／piaN3 糞埽：倒垃圾。／ke2 -to3 頂面：[橫放在上面]／thiong3- a2 lok8-to5： [可以開小差]／piN3 - khang：[促弄]
──Siau Lah-jih
1998.12.09 Poah8- loh8 囝兒坑，am2 糜仔相爭。
「Chho2 、chai3 、toan7 、iam7 、thiam ，khah-chuh 、mah-chuh、tiong-kai3 、 hian5 、ban 、ho2 。」
m7 是leh 唸經，是leh 唸囡仔時代e5 一段唸謠，內容是阮厝邊福- -a3 In 一koaN7 肉粽koaN7 後生查某囝e5 名，草- - e3 、再- - e3 、緞- - e7 、炎- -e7 、 - -e，khah-chuh- -e3 、mah-chuh - - e3 、中界- - e3 、阿賢、阿屘、 - -a3 。攏總幾個？一打十二隻sui2-sui2 欠一個，oa5 - -a2 ！哪會生chiah 濟， 驚死人，福- -a3 In 翁仔某有影「Poah8- loh8 囝兒坑」 ，sian 拚嘛bo5-chhai2 工，mai3 講beh chhun 錢hak 財產，kan-na7 為著三頓，beh hou7 十一個頭嘴食kah 飽，嘛搶槽，「am2 糜仔」一定「相爭 」，無ka7 汝騙。
講khit 來著嚥氣代，會hong5 流目屎，福- -a3 In 翁某，一世人著是為著十一個囡仔 e5 食穿，拖磨kah 真無閒。古早人早嫁娶，二十歲結婚，兩年生一個，生十一個著愛 生到四十外歲，會生生kah be7 生，生一個囝落九支花，身體堪be7 去，四十歲外beh 閣做啥麼大工課，敢有伊法，趁錢拚生活完全著福- -a3 家己一個nia7-nia7，也m7 是 大富戶，穡頭才二分外，二支腳giap8 一粒lan7-pha ，姑不將拚硬仔猶是無法度hou7 十一個囡仔食kah 飽，有夠僥倖。
「Poah8- loh8 囝兒坑，am2 糜仔相爭」chit 款悲情苦憐代，三siap 年前e5 趁食人 滿四界，時機bai2 ，趁錢頇慢，閣be7 曉節育，生囝順其自然，台灣天氣，台灣水 質，生囝ka2-na2 蕃藷生湠，台灣人像蕃薯仔命，chhin3-chhai2 種chhin3-chhai2 ia7 ，甚至chhin3-chhai2 phiaN 伊都會活。kan-na7 活是beh 創啥？無教育，無好e5 文化，逐日bok8-bok8 泅，到當今四百冬，猶hoan5-na2 無家己自主e5 文化，據在人 蹧躂，據在人誤解，就連家己e5 子弟嘛m7-bat 台灣文化。
時代leh 變，觀念leh 改，「兩個tu2-tu2 好，一個無算少」e5 精兵養育之下，已經 免擱遭遇「Poah8- loh8 囝兒坑，am2 糜仔相爭」e5 可憐，咱著愛注重家己文化，臺 灣e5 歷史地理著讀，台灣人e5 語言著講hou7 通，an2-ni 台灣e5 前途才有向望，若 無，kan-na7 be7 「Poah8- loh8 囝兒坑」 ， 「am2 糜仔」be7 「相爭」，無文化 be7 自主e5 台灣，共款是悲哀。###
【註解】：
Poah8- loh8：[跌落]／am2 糜仔：稀飯。／相爭：sio-cheN。／肉粽koaN7 ：[綁肉粽 的繩子]／一打十二隻sui2-sui2 ：比論囝濟像生豬仔囝。／chhun 錢hak 財產：儲蓄 置產。／頭嘴：人口。／搶槽：chhiuN2 -cho5，豬仔相爭食。／嚥氣代：[失面子，丟 臉的事]／生一個囝落九支花：女人生囝，母體受損真厲害。／二支腳giap8 一粒 lan7-pha ：一個查甫人。／僥倖：hiau-heng7，可憐代。／三siap 年前：三四十年 前。／ia7 ：[撒種]／chhin3-chhai2 phiaN ：[隨便丟棄]／bok8-bok8 泅：[水深火 熱中掙扎]／猶hoan5-na2 ：[仍舊]／據在人：ku3-chai7-lang5，[任人]
──Siau Lah-jih
1998.12.08 疊草一點訣，hiat 草是師傅。
草pu5 草pu5 ，真久m7-bat kap 你相拄，今仔日又閣看著你e5 形影，ti7 門口埕一 pu5 一pu5 ，煞hou7 人想著囡仔時陣：
Hit 當時阿爸叫我kap 阿兄，相招koaN7 稻草，一chang2 一chang2 tan3 hou7 阿爸， 講beh 疊草pu5 ，無一tah 久，阿爸e5 身軀已經離地到我am7-kun2 。草總繼續拖，拖 hou7 阿兄tan3 hou7 阿爸，阿爸ti7 草pu5 頂真無閒，實在誠本頂，疊kah koan5 抵 天閣圓型圓型，一點仔都無走精，逐家看著攏o-lo2 ，講阿爸e5 功夫是真本領。
阿爸歡喜kah ，一時煞be7 記得thang 客氣：「疊草一點訣，hiat 草是師傅」 ，beh o-lo2 著o-lo2 阮後生，恁看伊leh hiat 稻草，相準準，ui3 地面haiN3 khit 來hou7 我，一點仔都無teng5-taN5 ，若m7 是伊e5 好功夫，kan-na7 我gau5 嘛無效，ka7 阮 後生鼓勵一下才應該。
攏是家己人，阿爸才會chiah-nih8 大面神展家己，不過聽阿爸按呢講，嘛感覺真有道 理。幕前e5 表演者，若無幕後- -e5 tau3 相仝，一定真歹紡， gih 磚仔師傅boe7 是gau5 ，下面hit-e5 小工才是厲害，一塊磚、一khat 紅毛土，攏是準確無比送到師 傅e5 身邊，莫怪疊磚仔師一直leh o-lo2 伊e5 師仔工e5 功夫，原來著是kap 阮老父 有共款e5 意思，「gih 磚仔一點訣，tan3 磚仔是師傅」，「疊草一點訣，hiat 草是 師傅」，攏是師傅o-lo2 師仔e5 功夫。台北市長阿扁- -a3 leh o-lo2 市府團隊e5 gau5 kap 合作，嘛是做師傅e5 真功夫，be7 稱功be7 佔權，是一個好主管。###
【註解】：
hiat 草：[丟擲稻草]／草pu5 ：[疊成陀螺形的大草堆]／koaN7 ：[提有把柄的物品] ／一chang2 ：一束。／tan3 ：[丟擲]／am7-kun2 ：頷頸。／草總：草束。／本頂： 能力。／koan5 抵天：[高入雲霄]／走精：chau2-cheng，失去準確性。／haiN3 khit 來：[晃動起來]／teng5-taN5 ：錯誤。／大面神：[愛現]／gih 磚仔：[砌磚]／boe7 是gau5 ：[還不算好]／一khat 紅毛土：一杓水泥。
──Siau Lah-jih
1998.12.07 選前一陣風，選後無影無蹤。
選舉又閣leh 發飆，台頂講kah 嘴瀾全波，台腳聽kah 花ko5-ko5，有人講好就加減 o-lo2 ，有人消毒嫌kah 臭臊，嘛有人聽kah nga-nga ，我哪會聽攏無。
一票一世情，講kah 誠好聽，選後煞be7 記得你是啥麼碗粿。（哪會差hiah 濟，有可 能是感情騙子！）
選戰phoe5-thai3 膨風，選舉後m7 是be7 tiau5 ，就是漏風。（無tiau5 上好，漏氣 就bo5-chhai2 leh 選hou7 伊！）
選前ia7 銀票，選後才來紅包一包一包khioh 。（當選是我用錢買- -e3 ，無收紅 包，某囝beh 寄啥人飼？）
選前聲聲句句愛台灣，選後山坡地又閣ou2 - kah 一孔一孔。（開發利用，紅布袋仔 7 -chiah 會phong3-phong3 ！）
選前胡白choaN3 ，講若hou7 我當選to7 beh 按怎，選後百姓煞niau-niau-khoaN3。 （白賊騙阮無影chit8-jiah ！）
選前支票一直開，老農年金、社會福利…選後講無錢難為。（是支票亂開，抑是地方 kap 中央有是非？）
選前拜託拜託，望你牽成，選後lou2-lat8 lou2-lat8 ，我leh 好khui3 。（原來王錄 仔嘴， 胡lui3 - lui3 ！）
選前用台語，我e5 鄉親，我e5 序大，講kah 會牽絲，選後連鞭be7 記tit ，共款國語 國語，講kah beh 斷氣。（chia5 叫你m7 講母語，講kah he 北京語，咬舌閣be7 順 序。）
選前撐布袋戲，金光戲，鬧chhai-chhai ，選後搬入籠，恬chih-chih。（撐尪仔chia5 be7 曉，為民服務有卡費氣。）
加話免講，總講一句：
「選前一陣風，選後無影無蹤」。
你講！你講！有通？無通？
禮拜日去嘉義，走台三線公路，一路看著- -e5 是競選e5 旗仔滿滿是，ka7 人講chit 擺e5 選戰有夠食力，候選人、智囊團逐家親像十二月屎桶按呢----盡拚落去，有夠鬧 熱，有夠了錢財，台灣人e5 粗氣kap 愛面子，拚人氣閣輸人m7 輸陣e5 性格，表現kah 無臭無siau5 。
來到古坑地界，雄雄看著白底寫紅字e5 布旗仔，寫了二choa7 字「選前一陣風，選後 無影無蹤」，感覺誠趣味，m7 知影叨一位候選人chiah有心，沿路行沿路影，沿路閣插 be7 少，看詳細kan-na7 一個mark m7 知啥意思，嘛m7 知啥機關抑是啥民間團體，結 果一路到嘉義攏有chit 種旗，一直leh 對chit 次e5 選舉抗議，有夠諷刺。
台灣e5 選舉，雖然公開，雖然民主，雖然有知識，可惜欠公理，欠義氣，白賊話免面 紅，空殼支票管伊渡不渡，抹烏、khang3 粒仔庀，偷聽、風聲pong3 嬴，kan-na7 為 著選嬴，有- - e5 無- -e5 胡白ou2 ，害阮百姓條直人，煞go5 kah 啥是真、啥是假 攏m7 知影，「選前一陣風，選後無影無蹤」，選to7 選！管伊hiah 濟創啥？###
【註解】：
消毒嫌kah 臭臊：拒絕討厭嫌kah beh 死。／nga-nga：[愣愣的]／phoe5-thai3 膨風 ：皮皮一直講膨風話，[一直吹牛]／ia7 銀票：散發鈔票，買票。／khioh ：揀、拾。 ／ou2 ：挖。／紅布袋仔：[口袋]／phong3-phong3 ：胖胖，[鼓鼓的]／choaN3 ：臭 彈，[吹牛]／niau-niau-khoaN3 ：[翹首盼望]／chit8-jiah ：一個痕跡。／好khuI3 ：好時機，好運氣。／王錄仔：走江湖賣藥學e5 人。／chia5 ：誰。／鬧chhai-chhai ：熱鬧非凡。／恬chih-chih ：[靜悄悄]／chia5 be7 曉：[誰不會]／有卡費氣：比較 麻煩。／有通？無通？：[行不行]／食力：[吃力]／無臭無siau5 ：[過分誇張]／二 choa7 字：[兩行字]／沿路影：一路駛車一路瞄看。／khang3 粒仔庀：[挖瘡疤]
──Siau Lah-jih
1998.12.04 飼後生、養老衰；飼查某囝，別人e5 。
才leh 講老人問題，是此當今上重大e5 社會問題，向望政府官員kap 立法委員做夥來 排解，chit 時m7 重視，等咱食老定著lian5-hoe5 。
做人敢有影chiah-nih8 無奈，一生正經，認真扑拼，經營家庭，結尾tng7 著食老be7 哺土豆e5 時，煞hou7 人giat-lau2 趕出門腳口，toa3 老人院leh khek-khui ，古早 人he. 含飴弄孫e5 趣味，煞變成孤khut8 鬱卒。怨嘆，悲哀；悲哀，怨嘆。啥造成？
「飼後生、養老衰；飼查某囝，別人e5 。」明明著是重男輕女e5 本性，m7 著！m7 是 本性，是查甫人e5 a3-pa3 主義leh 作怪，查甫是囝，查某敢就m7 是？che .實在有影 奇怪，是m7 是父權社會e5 誤解，嫁出著是別人e5 ，娶入敢著有影著卡會bat 老父？ 會啦，當你會hoaN7 家，猶會做傢伙e5 時，he.是老父niu5-le2 ，等到你若老衰老倒 退hit 當陣，「飼後生、養老衰」，你著m7-thang ng3 beh ，ng3 beh 恁囝共新婦， 會ka7 你捧燒捧冷，侍候三頓兼洗蕩。
「飼查某囝，別人e5 」？時到你就發覺m7 是按呢論，當等後生新婦無beh ka7 你洗 蕩，hou7 你心酸無ng3 ，恁查某囝轉來- -a3，收收洗洗、清清掃掃，續落去ka7 汝 問，叨位酸、按怎鬱悶，身軀ka7 你拭拭咧，藥仔侍候你食入腹，勸你放心，發落你倒 落床，才來去轉。敢才按呢- -nia5 ，有e5 連囝婿都合倚來，照顧厝內e5 工課比後生 猶閣卡熟似，半子是半子，kap 查某囝共款有責任，chin2 e5 社會，「飼後生、養老 衰；飼查某囝，別人e5 。」已經be7 準。
查甫著chhiaN5 ，查某共款著疼，平平是囝，m7-thang 受無符合時勢e5 傳統禮教影 響，到時才來反悔，對家己虧待，對查某囝嘛無公平，「飼後生、養老衰；飼查某囝， 別人e5 。」chit 款觀念著改，beh 改量早。###
【註解】：
養老衰：iong2 lo2-soe。／khek-khui ：食虧。／含飴弄孫：ham5-i5- lang7-sun。 ／孤khut8 ：孤獨。／a3-pa3 ：壓霸。／bat 老父：[董得爸爸的…]／hoaN7 家：持 家。／做傢伙：對家庭經濟有幫贊。／niu5-le2 ：母親。／無ng3 ：無向望。／合倚 來：hah8 oa2 - -來，靠過來。／量早：趁早。
──Siau Lah-jih
1998.12.03 飼囝卡快，飼父卡oh 。
Hit 日轉去崁頂，聽講金吉仔兄、阿堂仔嫂，kap 力- - a3 In 某阿珠- -a ，攏去 toa3-ti7 養老院，不止仔使人感慨。若金吉仔兄有卡莫怪，In hit-e5 孤後生歹鐵 仔，在來就浪浪溜溜，會ka7 送去養老院已經算佳哉，若無，toa3-tiam3 厝內，是beh ng3 啥人 ka7 伊奉待？kan-na7 餓就去hou7 餓- -死。
抑若講阿堂仔嫂kap 阿珠- -a ，ka7 送去hou7 人款待，實在誠無應該，In e5 翁婿雖 然無ti7-leh，後生新婦、chau-a2-kiaN2 囝婿歸大堆，論生活逐家攏be7-bai2 ，食 穿liong7-khui3，出門轎車ti7-leh 駛，beh 來款待chit-e5 無方便e5 阿娘，敢講無 才調？倩一個人工侍候，做人囝兒新婦- -e5 ，有閑就kap 伊開講pho3-tau7 ，叫孫仔 來sai-nai ，家己事業嘛顧會著，當然有小可卡無閒，小可無閒嘛是應該，敢m7 是？ 可惜，m7 - - nia5 lah ！
倩人工著開錢，侍候著時間，老人老番癲閣會ko5-ko5 纏，不如ka7 送去老人院，無 khoaiN3 著好，錢了人無代。哪會按呢？「飼囝卡快，飼父卡oh 。」chit 句話m7 知 bat 聽過？「飼囝無論飯，飼父母著算頓。」嘛是仝一樣講做一位老人e5 無價值，現 代老人e5 悲哀。你、我、伊，逐家攏會老，逐家攏有份，食老敢正實著按呢老 lian5-hoe5 ，一定著hong5 趕出家，恁chiah 不孝e5 序細- -a3 ，chit 個家曾經是 恁父（母）e5 ，你按呢做，敢be7 傷過火，雖然阮心內怨慼，嘛是無奈何，m7 敢加講 話。
常ti7 按呢想，父母疼囝是天性，囝孝父母是靠文化教養來維持，所以中國文化教咱著 孝順，講hit-lo7 百善孝為先，逐家掠有孝序大是真理，行孝道卡有款式，chit-mai2 e5 人重現實，啥麼人倫義理，我e5 生活要緊，我e5 後生查某囝著教示，補數學，補 英語，也beh 烘肉，也beh 學pc，無些不至，按呢才會得kap 人比，汰會有hit-lo7 美 國時間，侍候你----阿爸kap 阿母，你著原諒才是，攏是為著你e5 金孫玉孫，敢m7 是。
Che .敢是天理？老人問題，請政府、國會議員兄弟，逐家著注意。###
【註解】：
oh ：難。／飼：chhi7 ，有養、育e5 意思。／孤後生：k¢-hau7-seN、獨子。／歹鐵 仔：鐵- -a3 e5 外號。／無ti7-leh ：[不在家或死了]／liong7-khuI3 ：[綽綽有 餘，不欠缺]／sai-nai：[撒嬌]／m7 - - nia5 lah ！：[不做而已]／lian5-hoe5 ： 可憐。／卡有款式：卡有照步來。／無些不至：bo5-se-put-chi3，啥麼攏beh 學。
──Siau Lah-jih
1998.12.02 seng7 豬gia5 灶，seng7 囝不孝，seng7 查某囝，be7 落人家教。
阿母- - o3 ！人m7 知影啦！無論如何，一定beh 叫a-bok8- - a3 伊搬出來外口 oa3 ，阮無愛閣參hit 兩個老歲仔toa3 做夥啦！阿母！你著kap 阿爸講，叫阿爸kap 伊參詳啦！
抑是閣按怎- - hioh ！親家親姆哪會chiah m7-bat 代誌，又閣嫌你睏晏晏是無？街路 人哪像In 庄腳人，hiah 早khit 來是beh 創啥？有夠庄腳song5 。免ka7 恁阿爸講， 叫恁a-bok8- - a3 來，阿母ka7 講就會使chit 。
隔壁阿火嫂- - a3 著是chiah-nih8 seng7 囝，家己m7-bat 事，閣嫌人m7-bat 代 誌，che 是啥麼家教？查某囝嫁人，著是別人e5 ，kap 乾家官be7- hah8 ，煞免先問 因端，是人欺負伊，抑是家己查某囝貧惰，be7 得人疼，嫁人做新婦，總是著食人水 米，toe3 人風俗，符合夫家e5 生活m7-chiah 著，chaiN7 -thang 替查某囝teh 抱不 平- -neh ，是m7 是，先檢討家己，才是道理。
古早人講，「seng7 豬gia5 灶，seng7 囝不孝」，chit -mai2 愛閣添一句「seng7 查 某囝，be7 落人家教」，實在有合時機，seng7 豬gia5 灶，已經過時，seng7 狗仔睏 膨椅，toa3 厝內ko5-ko5 纏是確實，seng7 囝不孝，現世報是滿滿是，細漢m7 教，大 漢就真歹醫。教囝著趁細漢，後生著教，查某囝嘛著教，教做人道理，尤其是查某囝， 雖然m7 免閣toe3 三從四德，上起碼嘛著知，在家會曉敬愛父母，chit-mai2 為著愛伊 嫁伊，敢免為伊來敬愛伊e5 老母老父，我e5 ta-koaN ta-ke 。
做人父母，ti7 厝裡是疼命命e5 查某囝，嫁出著是人e5 新婦，著愛教伊奉待ta-ke ta-koaN 親像家己厝內e5 老父老母，若有小可無順辦，嘛著小忍耐，m7-thang tin2 動著就sai7-thai2 ，吵吵鬧鬧，按呢婚姻路上著會變款，「seng7 豬gia5 灶，seng7 囝不孝，seng7 查某囝，be7 落人家教。」為著子弟e5 幸福，m7 管查甫抑查某，攏 be7 seng7 得。###
【註解】：
seng7 ： [過分溺愛寵愛]，寵？寵物：thiong2 物，m7 是seng7 物。／落人家教： 接受別人e5 教示。be7 落人家教：be7 接受別人e5 教示。／be7- hah8 ：[合不來]／ 因端：in-toaN ，原因。／膨椅：[沙發椅]／sai7-thaI2 ：[耍脾氣]
──Siau Lah-jih
1998.12.01 屘仔囝屘tiu-tiu ，無疼會夭壽。
「屘房出叔公」 ，hou7 人叫叔公，hou7 人感覺真正song2 ？m7-ku2若閣加ka7 thap 一句「屘房嘛出衰微」，做押韻，嘛有淡薄真實，按怎講？
Che 著愛牽拖唐山祖公chah 來中國e5 歹風俗----封建思想。封建思想e5 遺毒有：遺 產e5 處理原則，大孫愛分一份。Siang2 是大孫？著是大囝e5 大後生，亦是捧斗孫， 照中國e5 講法著是嫡長子嫡長孫。哪會講是歹風俗，咱來假設比一個例，一個家庭若 有五個囝，老父若死，財產m7 是愛做六份分，大囝大孫就分兩份，按呢大房就分三分 之一，二、三、四、五房，一房嘛才分六分之一，免外久，三代人著好，財產e5 濟少 大細一定天差li2 地，敢無影「屘房嘛出衰微」？
因為chit 種無合理e5 傳統，hou7 台灣人囝孫m7 敢違逆，煞hou7 做阿公kap 阿 - -e5 卡疼大孫，疼hit-e5 捧斗e5 金孫玉孫，m7-chiah 閣有「父母疼細囝，公媽疼 大孫」e5 俗語出現。好佳哉，父母疼囝是天性，公媽無愛，只好父母家己愛，所以 m7-chiah閣講「屘仔囝屘tiu-tiu ，無疼會夭壽」。
屘仔囝hong5 疼上濟- -e5 ，Siau,Lah-jih 應該算上好運e5 一個，細漢歹命，五歲 無老母，十九歲無老父，好佳哉頂有四個大兄，閣娶四個兄嫂，齊齊攏對chit 個歹命 小弟惜命命， m7 甘伊做粗重工課，鼓勵伊讀冊，儉食儉穿，借錢hou7 小弟註冊， 「屘仔囝屘tiu-tiu ，無疼會夭壽」，序大人無thang chhiaN5 大漢，煞hou7 兄嫂牽 成到會kap 人比 pheng7 ，chit 款e5 福氣無teh chhoe7 ，兄嫂e5 恩情hou7 人感 心，兄嫂e5 感情愛保惜，長兄如父，長嫂如母，尊敬愛有實際，體貼愛親身表明。###
【註解】：
夭壽：iau-siu7，ti7 遮是[糟糕]e5 意思。／thap 一句：加一句話。／牽拖： khan-thoa，[怪罪]／chah 來：隨身帶來。／捧斗孫：壽終正寢後，祀神主牌仔e5 斗，照例由大孫捧。／嫡：tek。／天差li2 地：[天壤之別]
──Siau Lah-jih
|
|
|
