台灣俗語鹹酸甜
1998.04
1998.04.27 三月三，桃仔李仔thin7 頭擔，四月四，桃仔來，李仔去。
1998.04.24 chiN2 瓜無nng5 ，chiN2 囝無肚腸。
1998.04.22 看風水，愛挖墓；看地理，愛拆厝；看醫生，愛食藥。
1998.04.21 好好鱟，thai5 kah 屎流。（好好鼊，thai5 kah 屎流。）
1998.04.19 樹頭徛hou7 在，m7 驚樹尾做風颱。
1998.04.18 做kah 流汗，嫌kah 流 noa7 。
1998.04.16 嫁雞toe3 雞飛，嫁狗toe3 狗走，嫁乞食就揹ka-chi3 走。
1998.04.15 食老三項bai2 ，咳嗽、chhoat 尿兼siam3 屎。
1998.04.13 凊飯m7 食，查某kan2 仔e5 。（新娘m7 食，婆仔giah8 。）
1998.04.12 父母疼歹囝，皇帝疼奸臣
1998.04.11 生食都無夠，那有thang 曝乾
1998.04.10 無賒不成店，賒了店不成
1998.04.09 無話講傀儡
1998.04.08 無話講ka-lo2
1998.04.07 天頂無坎都beh peh khit- -lih8
1998.04.06 囡仔食紅 chim5 ，heng3 -kong2
1998.04.05 大箍pe2 ，好看頭
1998.04.04 耳仔後無sian，查某查甫著會變
1998.04.03 天頂天公，地下母舅公
1998.04.02 頭heng3-heng3，尾冷冷
1998.04.01 一食，二穿，欠錢慢慢仔還
1998.04.30 落崎卡緊，peh 崎卡oh 。
出門chhit - tho5 ，來到惠蓀林場 tng-leh 落大雨，有人匿tiam3 涼亭仔 腳等beh 好天，阮一陣m7 驚雨滴- -e5 ，觀察了遊覽路線，決定beh 去 看水雞石（青蛙石），水雞石離停車場大約2 Km（khi-louh1 ），來回 點半鐘傷有夠- -a3，一路平坦坦，無啥麼peh 崎落崎，空氣好，閣有 雨聲，嘛是一種滋味，老翁老某，閣那親像少年愛人仔按呢手牽手， 也m7 驚人笑kah 無尾溜，忽然間想起匿ti7 涼亭仔遐e5 朋友，chit 陣In m7 知按怎想？無聊？憂愁？
來到北港溪邊，溜落去溪仔底著是水雞石，敢beh 落去？有人按呢問 ，既然來- -lou3 汰會著閣問？m7-koh 落崎敢beh 誠歹行？行看覓咧才 閣參詳！雖然leh 落雨，路be7 滑，彎彎斡斡be7 歹行，逐家有講有笑 一直搖，攏無歇，來到路e5 盡pong7 目睭一下lio2 ，有影- -閣，一隻 chheN-ioh -a2 屈ti7 溪仔底，可惜無牽金巡，看一下真，原來是一粒石 頭，有seng5 無seng5 在人看，行路peh 山運動才是目的，taN 逐家好 來轉翻頭，雨猶原chhap8-chhap8 滴，無行嘛be7 煞得。
『一、二、一、二、一』，『一、二、一、二、一』，才peh 幾步仔 nia5 ，m7 著繼續續落去！
抑有法度，都m7 是leh 落山- -kong？ah 著- -houN ！「 落崎卡緊peh 崎卡oh 。」chit-mai2 著有影事實khng3 ti7 目睭前，tu2 - chiah 落崎逐 家m7 是講誠輕鬆，chit-mai2 peh 崎逐家著peh kah phiN7 -pheN7 喘， 好佳哉，平常時有leh 運動，chit 款e5 路站是無礙著，但是對王校長 kap 呂老師In 兩對翁某，著peh kah 會呼雞be7 pun5 火- -a 。
peh 山運動，對半老老e5 人來講是一項考驗，chit 段路並無崎，所以 落山誠輕鬆，路頭嘛無遠，講peh 崎卡oh e5 人，實在著卡捷運動咧， 若無有一工去peh 著「前嶺未是崎，後嶺卡崎壁」e5 高山時，m7 著 愛喝救人- -lou3 。###
註：
落崎卡緊：loh8-kia7 khah-kin2，[下坡較快]／peh 崎卡oh ：[爬坡較難 ]／ tng-leh ：[正在]／匿tiam3 ：[躲在]／水雞：chui2-ke，[青蛙]，青色 - -e5 叫做「chheN-ioh -a2 」／khi-louh1 ：1000公尺= 1公里 （1khi-louh1 ），1000克=1公斤（1khi-louh1 ）。／平坦坦： peN5-thaN2-thaN2。／愛人仔：ai3-jin5-a2。／北港溪： （m7 是ti7 北港- -ou7 ）／溜落去：liu- -落去。／斡：oat，轉彎。／ 盡pong7 ：[盡頭]／lio2：看，m7 是正式e5 看。 ／牽金巡： khan-kim-sun5。／seng5：[像]／khng3 ti7：[擺在]／無礙著： bo5-gai7- -tioh8 ，無要緊。／會呼雞be7 pun5 火：[上氣接不下下氣]， [可以呼叫雞，無法吹熄燈火]／半老老：poaN3-lo2-lau7。／卡捷：常常。
1998.04.29 入山看山勢，入門看人意。
利用週休兩工e5 假期，學校計劃去惠蓀林場kap 廬山遊覽渡假，食政 府頭路e5 人講做『自強活動』。
出門天氣好好，來到半路煞leh 落雨，到了惠蓀林場e5 時，雷公sih 爁 做一下來，雨點仔tap8-tap8 滴滴無停止，落車後，領隊e5 洪老師宣佈 ti7 chit-e5 停車場解散自由活動，十一點二十分會記得猶原ui3 遮上車 ，beh 去食飯。
時間算算咧有兩點鐘thang chhit - tho5 ，心情放hou7 定，雨幔穿咧， 先去看告示，人講「入山看山勢」，看遊覽e5 路線，是ti7 山內第一 重要e5 代誌，惠蓀林場雖然m7 是誠深山，第一擺來總是感覺卡生疏 ，地形無啥熟似，小張持一下chiah be7 迷路，萬一迷路耽誤逐家e5 時 間，就誠歹勢。
入山著看山勢，chiah be7 gong5 山迷路，「入門著看人意」，chiah be7 得失主人，做一個無受歡迎e5 人客，朋友交陪重情誼，ti7 公司， ti7 辦公室，自由自在無曲無欺，一旦去到人e5 兜，客氣總是愛，伴 手隨身，閣著斟酌主人e5 意思，厝內e5 氣氛是m7 是歡歡喜喜，抑是 有小可hiau 疑，人翁某是m7 是leh 冤家？人是m7 是beh 出門？人是m7 是歡喜你來坐？總是觀人目色，才來決定beh 講偌濟話，beh 坐偌久 才be7 hou7 人chheh ！
「入山看山勢，入門看人意。」攏是做人處事誠要緊e5 一門學問， 攏著oh8 。###
註：
惠蓀林場：hui7-sun lim5-tiuN5。／sih 爁：sih-nah，閃電。／ui3 遮： [從這裡]／放hou7 定：放hou7 輕鬆定著，mai3 緊張怨嘆。／雨幔： hou7-moa，雨衣。／小張持一下：[稍微留意一下]／gong5 山：[暈山] 。／得失：tek-sit ，得罪。／無曲無欺：bo5-khiau bo5-khi。／一旦： it-tan3。／人e5 兜：[別人的家]／伴手：phoaN7-chhiu2，禮物。／斟 酌：chim-chiok，注意。／小可hiau 疑 ：[稍微奇怪嫌疑]／chheh ：怨 嘆討厭。／oh8 ：學，學習。
──Siau Lah-jih
1998.04.28 親兄弟，明算數。
副總統連戰ti7 1993 年借伍澤元三千六百二十八萬做為競選縣長e5 費 用，因為無借據，引起人e5 猜測，是m7 是政治獻金，抑是另外e5 工 程e5 牽溝仔料，閣因為ti7 公務員財產登記閣無申報，煞惹起大風波 。
會惹起大風波e5 原因，是連副總統m7-bat 「親兄弟，明算數」e5 道 理，當時chit 三千六百二十八萬提hou7 伍澤元e5 時，隨時著叫伊簽一 張借條，白紙寫烏字，清清楚楚，嘛be7 hou7 人誤會kah chiah 大條， 閣嘛免怨嘆講m7 知討會凍轉來- -無？當然啦，三千六百二十八萬ti7 In 連- -家來講，算是lan5 - san - -e5 ，連夫人嘛按呢講，chit 種siau3 阮 兜真濟，攏嘛無leh 記。
金錢往來，一定愛「親兄弟，明算數」，千萬m7-thang 糊里糊塗，是 借- -伊抑是beh hou7 伊，攏分be7 清楚，講借- -e5 著愛還，講beh ka7 大兄、小弟tau3 幫忙，十萬、五萬，做你提去開展，兄弟情哪著論 hiah 真。不過若是相借相lui2 ，著m7-thang 放be7 記，為著錢銀扑不 睦，攏是借、送分be7 開，有人ba5-ka，有人剋虧，朋友交陪，兄弟 做夥，錢銀來往，一定愛「親兄弟，明算數」。###
註：
算數：sng3-siau3，[算帳]／伍澤元：ngou2 tek8 -goan5。／牽溝仔料： [仲介費用]／m7-bat ：[不懂]／chiah 大條：chiah 嚴重，變大新聞。／ lan5 - san - -e5 ：零星的。／siau3 ：[帳目]／hou7 伊：[給他]／開展： khai-tian2，周轉開發。／相lui2 ：抵押借錢，lui2 支票。／放be7 記： [忘了]／扑不睦：phah put-bok8，[鬧翻了]／ba5-ka ：[不認帳，賴帳]
──Siau Lah-jih
1998.04.27 三月三，桃仔李仔thin7 頭擔，四月四，桃仔來，李仔去。
過去科學落伍e5 時代，作穡人種作攏著按照月令節氣來，啥麼時陣 有啥麼菜蔬，啥麼時陣會出產啥麼果子，攏be7 精差傷濟，三月出產 李仔，四月出產桃仔，有果子thang 賣e5 人，攏會無閒閣歡喜。
三月李仔大出，桃仔嘛有出一寡，lam7 leh 李仔擔，相thin7 做夥做一 擔，家己m7 甘食，攏總擔擔出去市場賣，m7-chiah 有chit 句「三月三 ，桃仔李仔thin7 頭擔，四月四，桃仔來，李仔去。」
啥麼叫做「thin7？」，做親成m7 敢kap 人相thin7 ，因為阮e5 竹仔箸 m7 敢挾人e5 雞肉絲；kap 人冤家理論e5 時，對方壓霸m7 講情理，咱 著m7-thang thin7 - -伊。做人e5 情理，平衡真重要，兩方若m7 是旗鼓 相當，能力若無平pang7 ，著愛小心，注意相thin7 交陪e5 藝術，才 be7 扑歹雙方e5 感情，特別是親成相thin7 e5 一寡禮數。###
註：
作穡人／種作：cheng3-choh，種植。／菜蔬：chhai3-se。／大出：當 出產e5 時。／lam7 leh 李仔擔：[混在裝李子的擔子]／平衡：peng5 -heng5。／平pang7：[均衡]
──Siau Lah-jih
1998.04.26 未曾斷尾溜，著會作孽。
掀開報紙實在驚死人，泡沫紅茶店竟然出現hit-lo7 穿插涼快e5 查某囡 仔庀，大膽跳豔舞，調查年齡猶未超過十八歲；另外一個消息，講根 據調查，高中職校e5 學生，有將近一成bat 試過男女e5 性愛，也著是 有過性經驗，未成年- -neh ，是作孽- -a3 ！
莫怪做人父母，飼囝chhiaN5 囝，愛伊嬰仔iN -iN 睏，一暝大一寸， 嬰仔iN -iN 惜，一暝大一尺；chhiaN5 - -a3 chhiaN5 ，養- -a3 養，成長 總是hou7 人歡喜，大漢帶來父母希望，m7 - ku2 飼kah 十五.十六beh 轉大e5 時，煞來驚伊toe3 人去風花，原來著是驚伊「未曾斷尾溜，著 會作孽」，扑歹人e5 囡仔栽。
社會會變kah 按呢，攏是chit-mai2 e5 人貪著虛華，為著beh 享受，串 做hit-lo7 變色koh 樣e5 行業，m7 是露胸露體，著是豔舞bi2-ko-siuN5 ，敗壞家己嘛教歹囡仔大細，m7-chiah 會「未曾斷尾溜，著會作孽」 e5 青少年愈來愈濟，偷生囝，khau 囡仔（墮胎）嘛愈來愈濟。###
註：
未曾：boe7-cheng5。／作孽：chok -giat8 。／斷尾溜：表示成長大漢 。／作孽：[指未成人就有性經驗]／泡沫紅茶店：phau3-boah8 ang5-te5 tiam3。／hit-lo7 ：[那種]／穿插：[穿著]／查某囡仔庀： cha-bou2-gin2-a2 phi2 ，[小女孩]／bat：曾經，有過。／chhiaN5 囝： 栽培子女。／toe3 人去風花：[跟人家去風花雪月]／koh 樣：無共款， 反常。／bi2-ko-siuN5 ：[下流e5 男女調情動作]
──Siau Lah-jih
1998.04.25 家會敗，姊妹做同姒[妯娌] 。
「家會敗，姊妹做同姒。」ti7 chin2 e5 社會，真正是胡說，無chit 款 代誌。
Siau,Lah-jih 有兩位朋友，是親兄弟，就是娶親姊妹做同姒- -e5 ，In 四個人今年歲數攏已經五十外，結婚嘛有二十外冬，子女hap8-hap8 咧七、八個，逐個gau5 讀冊，生活偌呢舒適好過，感情偌呢甜蜜和諧 ，hou7 人e5 印象，呵咾- -e5 有，患嫌- -e5 無。
古早人生活卡艱苦，厝內e5 人為著財產總是卡gau5 計較，姊妹仔做 同姒，若是感情be7 - bai2 ，親上加親，ta - ke 新婦be7 和e5 結果， ta - ke 定著受委曲；如果逐家若為著財產，冤家勞績，親姊妹煞m7 認 仝家，天腳下e5 悲慘代敢有比按呢卡超過。所以姊妹仔嫁仝家做同姒 ，會凍避免著避免。
若m7 是自由戀愛，抑是拄好In 兩對攏互相相意愛，chit 款姊妹做同 姒e5 婚配上好是mai3 ，姊妹仔變同姒，兄弟變大細sian7 ，互相beh 按怎稱呼，頂oe - -e5 mai3 論，kan - na7 講In e5 序細，是beh 按怎叫序 大啥麼名分，阿伯抑姨丈，阿姆抑阿姨，實在oh 得分，好佳哉chit 兩 位朋友是大- -e5 娶大- -e5 ，細- -e5 娶細- -e5 ，若無，顛倒反，大兄叫 細叔，大姊煞變做細嬸，花ko5-ko5，敢m7 是？反對e5 理由kan - na7 ti7 倫理輩分oh 得分別，m7 是beh 拆散人e5 好姻緣。###
註：
同姒：tang-sai7。／chin2：chit-mai2。／胡說：hou5-soah。／ hap8-hap8 咧：[合併一下]／和諧：ho5-hai5。／印象：in3-siong7。／ 患嫌：惹人嫌棄，受人批評。／be7 - bai2：[不錯]／ta - ke：婆婆。／ 新婦：sim-pu7。／冤家勞績：oan-ke lo5-che3，吵吵鬧鬧。／mai3： m7 愛e5 合音，[不要]／大細sian7：連襟（lian5-kin ）／頂oe - -e5 mai3 論：[上一輩的不要說]／序細：子女姪孫，晚輩。／oh：難。／細叔 ：[小叔]／細嬸：se3-chim2。／花ko5-ko5：[眼花撩亂]
──Siau Lah-jih
1998.04.24 chiN2 瓜無nng5 ，chiN2 囝無肚腸。
Hit 日阮學校慶祝兒童節，舉辦園遊會，Siau,Lah-jih 開店賣碗粿，園 遊會結束了後：
* 老師愛請！老師愛請！
& 是按怎老師愛請？
* ah 老師今仔日有趁錢- -a ，賣真濟碗粿neh ，老師趁真濟錢，愛請 阮啦！
& hou3 ！按呢- -ou3 ！恁做我e5 查某囝- -kong？
* 人chia5 beh ！
& ah 抑m7 是阮查某囝，是按怎著請恁咧？
* 人m7 咧！愛請- -阮著是愛請- -阮！
& 那有人chiah - nih8 番e5 囡仔？
* 抑無老師攏趁hiah - che7 錢- -kong，（愛請！愛請！愛請！愛請 ！…）
& 好- -a3 啦！明仔載老師買糖仔請- -恁！
* 『謝謝老師！』老師多謝！老師勞力！『老師萬歲！』
「chiN2 瓜無nng5 ，chiN2 囝無肚腸」，chiah 可愛e5 囡仔。###
阿吉- -a3 ！昨昏你那無來讀冊？
阮阿爸kap 阮阿娘冤家！
抑有相扑無？
有- -a ！阮阿爸用手搧阿母，阿母gia5 棍仔槓阿爸，扑kah 真厲害， m7 -chiah8 無來學校。
「chiN2 瓜無nng5 ，chiN2 囝無肚腸」，講kah 誠實在，m7 - ku2 hou7 人聽著誠悲哀。###
*老師！王小慧kap 黃淑芬tu2 - chiah leh 相chim - -ou7 ！
&胡白講，In 兩個leh 講細聲話啦！
&著啦！老師問恁一個問題，假使今仔日恁轉去厝裡，雄雄看著爸爸 kap 媽媽mou h -leh 相chim ……
*老師chhiu 、chhiu 、chhiu ，be7 見笑，講leh 相chim 啦，be7 見笑。
&聽hou7 清楚，mai3 胡白講話！老師是leh 問恁一個問題，假使今仔 日恁轉去厝裡，雄雄看著爸爸kap 媽媽mou h -leh 相chim ，恁感覺歡 喜抑是感覺受氣，講爸爸媽媽『不要臉』？
&真歡喜- -e5 gia5 手。（全班四十個，gia5 手- -e5 四十個）
&班長！你講啥麼理由。
*爸爸愛媽媽- -kong，按呢阮會足歡喜- -e5 neh ！
&著！爸爸若愛媽媽，咱e5 家庭著幸福。（性教育ui3 遮教起，因為 「chiN2 瓜無nng5 ，chiN2 囝無肚腸」，幼chiN2 純潔e5 時陣，教正確 e5 觀念，上快吸收。）###
註：
chiN2 ：幼稚，未成熟。／nng5：[瓜囊]／chiN2 瓜無nng5：[未成熟的 瓜瓜囊很少]／園遊會：oan5 -iuh"e3。／人chia5 beh ！：[人家誰要？ ]sai - nai 話。／人m7 咧！：[人家才不要呢]sai - nai 話。／chiah - nih8 番：[這麼不講道理]／好- -a3 啦！：[好了啦！]／冤家：oan-ke，[吵 架]／搧：sian3 嘴phoe2 。／tu2 - chiah：[剛才]／相chim：親嘴，接吻 。／雄雄：無意中突然。／m* h -leh 相chim：[抱著擁吻]／gia5 手： 舉手。／ui3 遮：[從這裡]／幼chiN2 ：幼稚，未成熟。
──Siau Lah-jih
1998.04.23 聽王錄仔嘴，轉- -去大心氣。
王錄仔嘴kap 相命仔嘴、sian - -e5 e5 嘴攏共款真 gau5 講話，真 gau5 界，m7 信你ka7 聽看覓：be7 ho2 e5 kou ioh8 ，kou5 liau2 liap8 a2 siau，lang5 bo5 - -khi3！
賣瓜- -e5 講瓜芳，賣花- -e5 講花紅，本成著是真自然e5 宣傳廣告， m7 - ku2 你ka7 看chit-mai2 e5 各種廣告，啥麼瘦身減肥、壯陽藥品… 滿滿是，生理人掠著查某人愛sui2 ，查甫人愛勇e5 心理，In 著是有法 度講kah 嘴瀾全波，講kah 有影好處多多，你若一時失注意，百票千 票著一張一張so5 出來。總是逐家互相甘願，一個beh 賣，一個願買， 人亦無ka7 汝強迫，亦無ka7 汝囉嗦，你若是物件看無清楚，價數算 無拄好，hou7 人貴- -去，買著害仔貨，了錢一層代，hou7 人騙戇閣 hou7 人笑song5 ，著有影「聽王錄仔嘴，轉- -去大心氣」，氣leh 幾若 工，鬱卒幾若kou2 月。
明明知影王錄仔嘴胡lui3 -lui3 ，thai2 會有人beh 中計，有人beh ka7 買 ，大概是有人m7-bat 貨，抑是生理人賣假貨，用褒獎帶威脅，用做手 參恐嚇，hou7 你閃be7 開煞來頭le5-le5，隨在人chui5 ，隨在人賣。「 聽王錄仔嘴，轉- -去大心氣」，beh 知嘛mai3 hiah 好玄，帶來麻煩 gia5 -ke5 。
其實好玄猶m7 是中計e5 主要原因，貪小利hou7 人失了人e5 純真， m7-chiah 愚愚戇戇去hou7 人騙leh long7-long7 seh8 。###
註：
王錄仔：ong5-lok8-a2，走江湖- -e5。／大心氣：凝ti7 心內，[心悸]／ gau5 講話：[善於說話]／ gau5 界：gau5 話仙。 ／be7 ho2：賣好， be7 好[不好]／so5 出來：自動提出來。／害仔貨：歹貨色。／了錢一 層代：[花了錢是一回事]／song5：無見識。／幾若kou2 月：[好幾個 月]／好玄：houN3 -hian5 ，好奇心愛鬧熱e5 個性。／gia5 -ke5 ：gia5 枷，找麻煩。／long7-long7 seh8：[團團轉]
──Siau Lah-jih
1998.04.22 看風水，愛挖墓；看地理，愛拆厝；看醫生，愛食藥。
人愛有信仰，m7 管你是信基督，抑是信媽祖，是佛教抑是天主教、 道教攏總好，有信比無信卡會安定咱e5 心，不過愛正信m7-thang 迷信 。正信hou7 人生活自在，有期待有將來，若是迷信一定害，害人了錢 財，家庭be7 和諧。
啥麼是迷信？求功明求發財，求beh 名利雙收，正經e5 扑拼m7 去做 ，kan - na7 beh 靠神明保庇，sian - -e5 e5 指點天機，天機若會凍漏洩 ，天公m7 著愛聽伊e5 話，請你用肚臍ka7 想看覓，thang 信m7-thang 信？看命仔嘴胡lui3 -lui3 ，看地理牽風水，共款ti7 平安、順序、添 丁、發財；路沖、煞氣、凶神、致蔭chit 箍圍仔e5 利害做文章，你若 是相信chit 套e5 說法，ah 「看風水，愛挖墓；看地理，愛拆厝；看醫 生，愛食藥。」著無啥麼稀奇- -lou3 。
信仰在人，信- -者講有，無信- -者講無hit-lo7 事，路沖、對人厝角， 本來著hou7 人看著be7 順眼，墓仔浸水，抑是有老鼠孔，總是hou7 序 細看著be7 自在，只要符合人道，有道理e5 工課，著愛處理，實在m7 免聽候sian - -e5 講了才知厲害，tin2 動著就beh 請sian - -e5 來排解， beh 請sian - -e5 晉前，上好錢銀準備便便來等待，因為「看風水，愛 挖墓；看地理，愛拆厝；看醫生，愛食藥。」攏是著開錢才會使chit 。
尾仔句，「看醫生，愛食藥」，che 是必然e5 代誌，為著家己e5 健康 ，無病身體檢查，有病看醫生（hou7 醫生看）食藥治療，che 是最新 e5 觀念，不過m7-thang 去chhoe7 赤腳仙仔才好，若是正牌e5 醫生m7 看，khan-na2 beh 去hou7 赤腳仙仔醫，按呢你又閣犯著迷信e5 苦難- -lou3 。###
註：
挖墓：oe2-bong7，o2-bong7。／和諧：ho5-hai5。／sian - -e5：仙- -e5 ，師父，師傅，專家。／肚臍ka7 想：表示道理真簡單。／胡lui3 -lui3：胡言亂說。／牽風水：看風水，因為愛用尺量，用線牽。／箍 圍仔：範圍內。／無hit-lo7 事：無hit 種代誌。／khan-na2：偏偏，刁 持故。
──Siau Lah-jih
1998.04.21 好好鱟，thai5 kah 屎流。（好好鼊，thai5 kah 屎流。）
前幾日厝邊林- -先生ui3 王功（ong5-keng）買轉來一隻鱟（hau7 ）， 問我敢食- -bou5 ！噯喲！he . thai2 會敢- -neh ！看伊（鱟）ngiauh8 -ngiauh8 nng3 ，生做hiah 呢無共款，是罕得看著e5 生物，beh 叫我食 伊e5 肉，扑死嘛m7 敢。
詳細看，鱟生做圓圓e5 盤仔形，是伊e5 殼，一支尾溜那柴仔枝長長 翹翹，ka7 peng2 過來看腹肚，生五對e5 腳爪，kap 毛蟹腳共款，腹肚 嘛有薄膜幾若重，嘛kap 毛蟹e5 膜共款。聽林- -先生講，thai5 鱟無簡 單，鱟殼內底e5 肉膏膏，無小心若去hou7 漏掉，就無彩leh thai5 - -a ，尤其是處理腹內e5 時，若是去hou7 屎ko7- -tioh8，規隻鱟就臭mi - m* ，無人敢食，聽講鱟e5 屎非常臭。（m7 知有影無？）
「好好鱟，thai5 kah 屎流」，原來著是按呢- -ou3 ！
逐家是好厝邊，就ka7 林- -先生講一個滾笑：林- -先生！舊年你紹介 hit 層親成，攏是你厚話，加講一寡無路用話，chiah 會講kah 開花去， che 著是「好好鱟，thai5 kah 屎流」啦！
都是按呢- -m7，頇顢講話實在有卡輸，其實我嘛無歹意，啥知In 會 ka5 誤會，無彩一段好姻緣，嘛無彩一包紅包，煞趁無著。
「好好鱟，thai5 kah 屎流」，嘛有人講做「好好鼊，thai5 kah 屎流」 ，大概thai5 鼊kap thai5 鱟共款歹thai5 e5 款。###
註：
鱟／thai5／ui3／he . thai2 會敢- -neh／ngiauh8 -ngiauh8 nng3／ peng2 過來／膏膏／ko7- -tioh8：沾著。／講kah 開花去／ka5／
──Siau Lah-jih
1998.04.20 老人囡仔性。（老人seng5 囡仔）
想起三十年前阮阿姑食老起反形e5 故事，就感覺非常對表兄be7 過心 。
故事是按呢：
斯當時做兵拄好退伍，表兄好意beh 請- -我，順紲紹介幾個朋友kap 我 熟似，當leh 食飯lim 燒酒，互相詼諧呵咾紹介e5 時，啥知阿姑ti7 隔 壁房間大聲喝哀，m7 知為著啥麼代，hou7 逐家感覺真be7 自在，煞 hou7 人客ka7 咱關懷。表兄講：mai3 管- -伊，阮阿母是「老人囡仔性 」，連鞭就無ti7 代，做咱食，免掛礙。
老實講，當時氣ti7 心內，表兄嘛是讀冊人，哪會chiah 不孝？咱是阿 母生，阿母這陣已經chiah 年老，m7 有孝beh 等何時，自按呢不孝e5 表兄、不孝e5 表兄khng3-tiam3 心肝內，khng3 到幾年前，才知一遍道 理，是阿姑「老人囡仔性」，m7 是表兄做人無正經。
八、九年前大兄中風，倒ti7 眠床頂，起頭精精，經過三年久，頭殼開 始be7 清，講著話不答不七，厚khi - khiau 閣厚嫌疑，有時講kah 目屎 流，有時閣會笑hai-hai，非常反常無seng5 過去，真正歹侍候，害著一 家大細亂操操，beh chhap ia7 m7 是，m7 chhap ia7 m7 是，日子總是愛 過，敢會凍工課放咧，一日到暗攏leh 侍候伊，不得已，只好像leh 遍 囡仔按呢，有時用呵咾，有時用an7 ，有時ka7 騙leh 戇戇seh8 ，有時 煞用命令，愛按呢做！有影「老人囡仔性」，無命令伊m7 聽，用強 迫伊煞歡歡喜喜閣正經。
「老人囡仔性」，做人子女著認hou7 清，有孝序大人，盡心上要緊， 若是tng7 著父母年老，記持退化，代誌分be7 清e5 時陣，按怎體貼孝 順，著看你e5 變竅kap 真心，有孝嘛是你，不孝嘛是你，別人是無 thang 議論。###
註：
seng5：像。／反形：hoan2-heng5，反常。／be7 過心：[過意不去]／ 順紲：sun7-soa3，seng7-soa3，順便。／熟似：認識。／詼諧： khoe-hai5，應酬話罔講。／mai3 管- -伊：[不要你他]／免掛礙：bian2 khoa3-gai7，[不要放在心上]／氣ti7 心內：[生氣在心裡]／khng3-tiam3 ：[放在]／不答不七：put-tap put-chhit。[不搭調]／khi - khiau：無滿意 ，怪來怪去。／chhap：插手，[處理]／an7：限，寬限。／戇戇seh8： [暈頭轉向]／記持：ki3-ti3，記憶力。／變竅：隨機應變e5 能力。
──Siau Lah-jih
1998.04.19 樹頭徛hou7 在，m7 驚樹尾做風颱。
上梁無正下梁歪，頂司無好樣，部屬自然會看樣，你若無照起工，我 著chhin3 -chhin - chhai2 -chhai2 來濫糝，beh 溜逐家來溜，主管都無要 緊，我一個小職員是leh 驚怎樣。
做頭人，做領袖，做主管，做學校長，統御領導e5 能力真要緊，你 ka7 看，親像王永慶董事長，做代誌攏照步來，生理做hiah 大，嘛是 無hia5 - pai，m7 - na7 無hia5 -pai，連In 家己e5 囝beh 昇級，嘛著一步 一步仔來，每年In 公司e5 運動會，攏會看著伊，一馬當先chhoa7 公 司e5 員工走五千，若m7 是醫生ka7 伊提醒，為著健康愛保惜，相信 明年伊猶原走代先。
莫怪伊e5 公司m7 驚人競爭，「樹頭徛hou7 在，m7 驚樹尾做風颱。 」kan - na7 看著員工e5 扑拼犧牲，著會凍相信In e5 事業一定一日一 日chheng3 ，台塑集團e5 名聲，啥人m7 知是老牌老字號，信用可靠閣 正經，「樹頭徛hou7 在，m7 驚樹尾做風颱。」王永慶三字e5 名聲， 逐家都尊敬。###
註：
徛hou7 在：[站得穩]／風颱：hong-thai，[颱風]／頂司：長官。／濫 糝：lam7-sam2，無照步來，無規矩。／統御領導：thong2 gi7 leng2 to7。／你ka7 看：[你看看]／hia5 - pai：驕傲。／m7 - na7：不但。／ chhoa7：[帶著]／走代先：[跑在前面]／chheng3：chhiang7 - chhiang7 滾，發達。／台塑集團：tai5-sok chip8-thoan5。／老牌老字號： lau2-pai5 lau2-ji7-ho7。
──Siau Lah-jih
1998.04.18 做kah 流汗，嫌kah 流 noa7 。
法務部長廖正豪做官做kah 起倦，ti7 立法院公開講beh 辭頭路，伊家 己講是beh 換一個環境- -nia7 -nia7 ，因為代誌發生傷過突然，閣講kah 目屎si3 -lam5 -sui5 ，煞引起行政院長e5 相當關心，趕緊約見thang 了 解伊e5 本意kap 動機。
Che.是大新聞，逐家開始ioh ，媒體開始採訪，有e5 ioh 講是因為掃烏 （道）傷雄tek-sit 人引起- -e5 ，有人講蕭院長kap 伊有情結，嘛有人 分析是因為選舉鬥爭e5 關係，一人講一款，十嘴九腳倉，嘛m7 知影 啥人講- -e5 卡準。廖部長In 某講伊有委曲，心情真鬱卒，廖阿伯講 kah 真感慨，政治人物假那趁食查某，hou7 人m* h 來tan3 去，一sut 仔尊嚴都無，為著掃烏hou7 In 家庭be7 安定，認真做共款hou7 人嫌 kah 臭臊，真正有影「做kah 流汗，嫌kah 流 noa7 」，做kah chit 款官 是beh 創啥？不如教冊做善事卡快活，mai3 做mai3 做，轉來厝裡著好 ！（伊講beh 放炮慶祝咧！）
講嘛有影，每項代誌做loe3 ，定著有人呵咾有人嫌，廖阿伯！你應該 知影，恁囝e5 名聲是第一名，民意調查真正koan5 ，做代誌又閣有夠 力，咱若良心會凍過，「做kah 流汗，」歡喜著好，管汰伊hou7 人「 嫌kah 流 noa7 」著嫌歹勢，歹勢是在人想，重要是咱愛有主張，主張 beh 為逐家，beh 為台灣扑拼。
「做kah 流汗，嫌kah 流 noa7 。 」有人講- -e5 有影，有人講- -e5 無 影，有人認真為社會奉獻流汗，無人知影，有人用心計較趁私奇，嘛 leh 喝講hou7 人嫌kah 流汗。愚戇e5 老百姓- -a3 ，你敢分別會出叨一 位講- -e5 是真正？###
註：
起倦：khi2-sian7 ，饜煩。／目屎si3 -lam5 -sui5：[淚流滿面]／ioh：猜 。／tek-sit 人：得罪人。／趁食查某：than3-chiah8 cha-bou2，妓女。 ／m* h 來tan3 去：[抱過來，丟過去]／一sut 仔：一點仔。／臭臊： chhau3-chho，腥味。／流 noa7：[流口水]／做loe3：做落去，／管汰 伊：koan2-thai3-i，[管他的]／著嫌歹勢：[著覺得不好意思]／趁私奇 ：than3 sai-khia，本來是[賺私房錢]，[這裡是指中飽私囊]
──Siau Lah-jih
嘛是一種「嫁雞toe3 雞飛，嫁狗toe3 狗走」e5 運命，想當時， Siau,Lah-jih 結婚娶某時，雖然祖家有厝thang toa3 ，為著beh kap 人相 親像，求發展，某chhoa7 咧就chhan5-chhan5 徙來街市徛起，變成一 個無殼e5 露螺。
好佳哉阮某無怨嘆，怨嘆嘛無路用，因為未嫁晉前伊著知Siau,Lah-jih 散赤，伊是合意人才kap 腹內，m7 是貪著厝宅kap 錢財，所以甘願 toe3 翁婿搬徙，食苦拖磨，一句怨嘆e5 話嘛m7 敢喝。自按呢頭擺搬 來街仔尾稅厝徛，chit 間厝細間閣無衛生，勉強toa3 二冬，囡仔出世 會叫人，無徙be7 使chit ，細間換大間，用錢定著卡量 siong7 ，beh 稅 錢銀著m7-thang 傷teng7 ，痛tiuh-tiuh，姑不將，煞hou7 某- -e5 真無閒 ，煮飯洗衫顧囝兼副業趁錢相keng7 ，一目nih 六年過，囡仔beh 讀冊 ，為著教育子弟揀環境，閣徙一遍來到學校邊，toe3 了七八年， khiu5-khiu5 儉儉粒積，用心計較才買chit-mai2 toa3 - -e5 chit 間。
十外年，徙四擺厝，田中街路toa3 透透，講khit 來嚥氣，hou7 牽手 - -e5 誠剋虧，m7 - ku2 嘛有一點仔好處，著是「嫁著無厝翁，搬來搬 去卡bat 人」，有影- -koh，每一擺若是出門seh 街路，相招呼e5 厝邊 朋友閣不止仔濟- -lioh。###
註：
bat 人：熟似人。／相親像：saN-chhin-chhiuN7。[跟人家一般]／ chhan5-chhan5：[不加思考決定]／無殼e5 露螺：[無殼蝸牛]／稅厝徛 ：[租房子住]／量 siong7：浪費。／傷teng7：[太硬，太節約]／相 keng7：互相幫忙，互相扶持。／khiu5-khiu5 儉儉粒積：過份勤儉積 蓄。／嚥氣：[太丟臉]／剋虧：[吃虧委曲]／seh 街路：[逛街]
─Siau,Lah-jih
1998.04.16 嫁雞toe3 雞飛，嫁狗toe3 狗走，嫁乞食就揹ka-chi3 走。
最近大法官會議針對翁某住所問題提出新解說，講翁某住所由查甫人 決定e5 規定是違憲- -e5 ，上慢愛ti7 一年內失效，che.是一項宣示「男 女平權」e5 重大解釋。現行民法規定，翁某共同住所e5 指定權屬於 丈夫，雖然但書為尊重翁仔某設定住所e5 意願，規定ti7 嫁娶時，雙 方會使chit 家己約定，但是翁某若拒絕約定抑是協議不成時，猶是愛 用其中一方設定e5 住所為住所。照按呢ka7 看，住所e5 決定權猶是 lak8 ti7 查甫人e5 手中，因為多數e5 婚姻，攏是查甫- -e5 娶查某- -e5 。
chit 聲大法官e5 解說若發生效力，查某人e5 鬱卒應該會得著thau2 放 ，傳統觀念e5 「嫁雞toe3 雞飛，嫁狗toe3 狗走，嫁乞食就揹ka-chi3 走 。」嘛著愛toe3 時代潮流消失，啥麼查某囡仔菜籽仔命，命是掌握ti7 家己e5 手頭，m7 是宿命隨命底來運轉，過時e5 觀念著改正，民主社 會是男女平等，婚姻e5 結合是合作和諧才應該，翁仔某公司若beh 開 市，除了法律上著張持se3 - ji7 ，誠懇做夥poah8 感情著愛排第一，千 萬m7-thang tin2 動著就beh 提出法律是寶來議論，按呢beh 百年合和就 卡無可能。
法律為基礎，翁某相讓，相敬如賓，既然有緣，互相牽手過一生。 ###
註：
toe3：跟隨。／揹：phaiN7。／ka-chi3：[藺草編的袋子]乞食應有的 裝備。／協議不成：hiap8-gi7 put-seng5。／住所：chu7-sou2。／lak8 ：[抓，握]／thau2 放：解放。／掌握：chiang2-ap。／宿命：siok-mia7 。／和諧：ho5-hai5。／張持se3 - ji7：注意小心。／誠懇做夥： seng5-khun2 cho3-hoe2。／poah8 感情：培養感情。／tin2 動著：[動不 動]
─Siau,Lah-jih
1998.04.15 食老三項bai2 ，咳嗽、chhoat 尿兼siam3 屎。
啥麼是老？頭毛嘴鬚白、皮皺皺肉lom2 -lom2 、腳手混沌khu7-khu7 chun3 、gia5 拐仔行路thaiN2 -thaiN2 hoah8 、腳脊 phiaN 曲痀頭tom3 垂、烏乾瘦兼he - ku 喘、老人斑seng5 老人扮、哀哀chap8-chap8 、怨 嘆家己嘛怨嘆別人。
按呢有夠額無？若無夠，閣chan3 一串「食老三項bai2 ，咳嗽、 chhoat 尿兼siam3 屎。」實在kan - na7 驚著害。老人嗽，久年嗽，嗽 kah be7 食飯，嗽kah 倒be7 tiau5 眠床； chhoat 尿是正常，人囡仔是 soan7 過溪，咱是滴著鞋，beh 驚歹勢嘛無法度，che 是自然e5 糊塗， m7 是thiau-i3-kou3 ，原諒阮老歲仔；siam3 屎就卡歹紡，厝內有人鬥 相共，出外就麻煩，若閣患著老人癡呆症，實在著真僥倖，有某囝 ka7 你洗蕩上嘉哉，若無，湠屎連beh 按怎來過最後e5 人生？
食老就哺無土豆，食老實在無奈何？無奈何又閣是beh 如何？無人脫 會過，beh 按怎行過chit-e5 老人階段，值得咱思考，咱做會夠- -e5 是 注意飲食，適當運動，看醫生，做體檢，先預防才是正經。不幸代誌 若發生，只好聽天由命，上帝！阿們！抑是阿彌陀佛！人生無常，只 有不執著，家己修行。
「食老三項bai2 ，咳嗽、chhoat 尿兼siam3 屎。」勸逐家mai3 想hiah 濟，做工課卡要緊，用無私e5 心，奉獻e5 情，為社會加減做一寡好 代誌，你若發心落去，著會發現時間寶貝無夠用，哪有時間thang 煩 惱食老e5 苦楚- -neh 。###
註：
bai2：無sui2 ，無好。／chhoat：溢出來。／siam3：滲出。／肉lom2 -lom2：bah 無結實。／khu7-khu7 chun3：[不停顫抖]／gia5 枴仔：[拄 著枴杖]／thaiN2 -thaiN2 hoah8：慢行兼細步。／腳脊 phiaN ：背部。 ／頭tom3 垂：[頭垂下，沒精神]／he - ku 喘：氣喘。／seng5 老人扮 ：像老人e5 形態。／哀哀chap8-chap8：[滴咕不停嘆氣]／chan3 一串 ：增加一串。／倒be7 tiau5 眠床：[不能久臥床上]／thiau-i3-kou3 ：故 意。／歹紡：歹處理。／僥倖：可憐不幸。／洗蕩：se2-tng7。／湠 屎連：滲屎連連。可憐代。／聽天由命：theng3-thian iu5 beng7。／不 執著：put chip-tiok8。／mai3 想hiah 濟：[不要想那麼多]
─Siau,Lah-jih
宜蘭地區昨昏（4月8日）出現日暈，che. 是一種自然現象，kap 熱天 時西北雨後出虹共款，早起時落雨，虹出ti7 西旁，下晡時落雨，虹出 ti7 東旁，出ti7 東旁是半圓形，有tang 時仔會出現二箍，叫做霓kap 虹 ，出現ti7 西旁面，卡無完全seng5 半箍，叫做半帆，有讀過自然科學 e5 人攏知影，che. 是因為日頭光照著空氣中e5 水氣，經過折射所產生 e5 幻影，是大自然真sui2 e5 光景，值得咱讚歎呵咾上帝e5 榮光。
日圍箍嘛是共款道理，伊會出現ti7 beh 晝時抑是過晝後，日頭直照地 面，土氣水分浮起，經過日光e5 直射反射kap 折射，形成圓箍仔ka7 日頭圍tiam3 中央，因為有經過反射e5 作用，雖然是圓箍仔一lian3 ， 可惜光影色彩卡無霓虹hiah 呢sui2 ，根據先人e5 經驗「日圍箍，火燒 埔」，hit 日e5 天氣一定好天閣熱hom7 -hom7。
嘛是根據古早人e5 說法，m7 - ku2 卡迷信，講啥麼he . 是天然異象， 今年一定有旱災，也因為傳播媒體e5 厲害，咱才知影今年e5 災難特 別濟，閣tng7 著聖嬰現象teh kau2 - koai3 ，m7-chiah 另一款迷信e5 八 卦新聞哪像做風颱，一陣一陣篩無停。###
註：
日暈：jit8-hun7。／虹：kheng7 。／有tang 時仔：有e5 時陣。／霓： ge5。／seng5 半箍：[像半圓形]／半帆：poaN3-phang5。／折射： chiat-sia7。／幻影：hoan3-iaN2。／beh 晝時：午時前。／過晝後：午 時後。／圓箍仔一lian3：[圓圓的一圈]／熱hom7 -hom7：[熱得不得了] ／旱災：han7 -chai。／kau2 - koai3：狡獪，作怪。／篩：thai，搖。
─Siau,Lah-jih
1998.04.13 凊飯m7 食，查某kan2 仔e5 。（新娘m7 食，婆仔giah8 。）
裕鳳，盈暗e5 飯hou7 你煮，媽媽beh 來去台中chhit-tho5 ，欲暗仔才 會轉來，昨昏chhun- -e5 遐e5 凊飯炒炒咧，才閣量寡米落去電鍋煮， 菜，下晡食chhun - -e5 thng7 -thng7 - -leh 著有夠- -a3 ！
母- -a3 ！凊飯無人beh 食，下晡e5 菜湯嘛m7 免 thng7，阮無愛食啦！ 規氣攏煮鮮- -e5 。
hiah 討債，taN，才昨昏e5 凊飯- -nia5 ，下晡e5 菜湯著be7 使chit 食， 講kah 恁chit-mai2 e5 少年人，m7 知影beh chhun 存，實在真扑損。照 媽媽e5 交代去做，凊飯kap 隔頓e5 菜湯，我才來食，「凊飯m7 食， 查某kan2 仔e5 」，做人m7-thang 傷討債。
少年朋友- -a3 ！恁兜有專門leh khioh 凊飯e5 查某kan2 仔『老媽子』 無？若有，咱做人子女- -e5 著三思，m7-thang 好食- -e5 家己先食，食 chhun - -e5 才是婆仔giah8 ，古早人ti7-leh 講，「凊飯m7 食，查某 kan2 仔e5 」，「新娘m7 食，婆仔giah8 」，阿母是咱e5 ，為咱操煩 閣chhiaN5 家，怎thang hou7 伊剋虧食落尾，好食- -e5 父母先食，才是 有孝e5 序細。###
註：
「凊飯m7 食，查某kan2 仔e5 」，「新娘m7 食，婆仔giah8 」：[婢 女侍候阿娘仔，隨嫁婆侍候新嫁娘，母親疼愛子女，所以，阿娘仔、 新娘、孩子不要不吃的，都得由婢女、婆仔、老媽子來承受]／查某 kan2 仔：婢女。／欲暗仔：黃昏時，[傍晚]／昨昏chhun- -e5 ：[昨天 剩下的]／遐e5 凊飯：[那些冷飯]／thng7 -thng7 - -leh：[熱一熱]／規氣 攏煮鮮- -e5 ：[乾脆都煮新鮮的]／hiah 討債：hiah 呢浪費。／khioh 凊 飯：[揀食冷飯]／chhiaN5 家：持家。／怎thang：[怎麼可以]
─Siau,Lah-jih
揀十叢共款平koan5 、平大、平sui2 e5 樹仔栽，種tiam3 厝後花園內 ，共款沃水、下肥、khau 草，共款用心照顧十年以後，有e5 koan5 大 健叢，有e5 普通普通，有e5 細叢be7 大，恁想園丁上照顧叨一叢，叨 一叢樹仔上愛感謝園丁e5 疼惜？
「父母疼歹囝」，因為伊歹，因為伊頇慢，父母才會費心來拖磨，驚 伊細漢be7 曉想，大漢會變成m7 成樣，到時父母若年老，看伊beh 靠 啥人ka7 伊牽教？天腳下e5 父母心著是按呢煩惱In 囝be7 大。
「父母疼歹囝」，抑乖囝m7 著無得著父母e5 疼？雖然m7 是按呢siN -a2 講，不過卻是有人按呢想，講In 父母大細心，小弟歹囝浪蕩m7 教 示，kan - na7 嫌伊 chit-e5 乖囝不孝伊，實在無道理。
父母心最深沈，歹囝歹教卡用心，聽會著e5 呵咾，看會著e5 錢銀， 攏是hou7 父母卡費神；抑若是飼著好囝，歡喜khng3 在心，隨伊發展 ，出在伊自由，敢講按呢著是父母疼無入心？錯！錯！錯！m7 著！ m7 著！絕對m7 著！
請你想看覓，樹仔栽，正常ia7 肥，正常沃水，順順仔大，寬寬仔sui2 ，哪著雞婆過分ka7 『揠苗助長』，hou7 伊縛腳縛手來剋虧，「無教 示e5 教示」，m7 是真正父母無用心，In 是khng3 -ti7 內心leh 關心， 所以頭前講e5 hit 十叢樹仔，上愛感激園丁- -e5 著是hit 叢sui2 閣高大 e5 第一名。
「父母疼歹囝」是有影，m7 - ku2 kan - na7 著一半，因為父母疼囝永 遠都無分sui2 、bai2 ，gau5 、頇慢，查甫抑查某。
「皇帝疼奸臣」，he . 是無道昏君耳孔輕，愛聽好話才會來疼奸臣， he .是戲leh 搬，搬beh hou7 恁逐家看，看講耳孔輕聽小人話語，結果 是按怎，勸逐家著m7-thang 學皇帝chiah 戇獃。「父母疼歹囝，皇帝 疼奸臣」lam7-leh 講，只是一種比論，重點猶是ti7 「父母疼歹囝」 chit-e5 議論。###
註：
平koan5：[一樣高]／沃水：ak-chui2，[澆水]／khau 草：[拔草]／健叢 ：kiaN7-chang5。／be7 大：[不會長大]／園丁：oan5 -teng。／m7 是 按呢siN -a2 講：[不是這樣講的]／ia7 肥：施肥。／揠苗助長： at-biau5-chou7-tiong2。／剋虧：食虧。／無教示e5 教示：仿[無用之用 ]／khng3 -ti7 ：[放在]／sui2 、bai2 ，gau5 、頇慢：美麗、醜陋、賢能 、笨拙。／小人：siau2-jin5。
─Siau,Lah-jih
又閣禮拜二，崁頂社區e5 bat 字班，盈暗出席煞無一半，大概是因為 看著In 孫leh 放春假，叫是免讀咧。無要緊，逐家小等一下，咱先來 無話講ka-lo2，pho3 - tau7 - -一時仔。
有人hoe7 講庄裡頂日割香e5 代誌，有人講清明培墓真無閒，In 囝台 北轉來，ti7 高速公路頂塞車七八點鐘，無話講ka-lo2，嘛是誠趣味， 有人煞問老師有leh sng2 股票無？
「生食都無夠，那有thang 曝乾。」beh thai2 - tho2 有hit-lo7 量 siong7 錢，sng2 股票？動著數百萬，最無嘛著二三十萬，老師月俸四五萬 ，也beh 生活，也beh 納會仔，人情世事陪toe3 ，哪有可能chhun 錢買 股票？無啦！無leh sng2 啦！
股票投資是正常，若是講「sng2 」就卡投機無惜本分，「生食都無 夠，那有thang 曝乾」e5 腳數，上好m7-thang sng2 ，標會仔借錢，買 入賣出，起起落落，傷精神閣無一定會照準。若是有chhun 存，買長 期趁股仔囝，分紅利總是有卡穩。###
註：
生食：chheN-chiah8。／曝乾：phak8-koaN。／盈暗：eng-am3，[晚 上]／叫是：kio3-si7，[以為]／hoe7：會，對談。／塞車：that-chhia。 ／sng2：[玩]／beh thai2 - tho2 有：哪會有，[哪兒有]／量 siong7 錢：[ 多餘的錢]／動著：[動不動]／陪toe3：[禮尚往來的紅白包]／腳數： kha-siau3，角色。／chhun 存：儲蓄存錢。
─Siau,Lah-jih
隔壁kam2 仔店做e5 生理是大盤商，出入貨色真濟，頂手見若落貨著 是一車閣一車，周老闆才割hou7 庄腳店仔賣，每日chhiaN3 工人送貨 ，無閒chhih-chhih ，生理真gau5 做，趁be7 少錢。
頭家- -a3 ！生理be7-bai2 - -hoN ！看恁逐日都chiah 無閒。
抑有卡choah8 ，景氣bai2 chiaN5 歹做- -neh ？
敢有影？恁生理人攏嘛按呢講，會haiN 才有醫。
無ka7 汝騙啦，時機chit8 -e7 bai2，庄腳店仔厚賒欠，自然店頭家beh 結賬著無hiah asalih，歸尾煞來欠賬賒著阮。
「無賒不成店」，che 是做生理e5 道理，哪著掛意。
「無賒不成店，賒了店不成」，若周轉不靈就僥倖- -a7。
無可能e5 代誌，chit-mai2 e5 人攏嘛現金買賣，恁做大賣割貨e5 生理 ，無現金嘛有支票，哪有可能用賒- -e5 。
無現金hou7 伊an7 ，上無隔轉kou2 月就會清siau3 ，上害著是開支票 ，一開m7 是半年著是三四kou2 月，頂手一下落貨，上權限是一kou2 月e5 票，你ka7 想看覓，是m7 是比用賒- -e5 閣卡慘。
自古以來，kam2 仔店本成著「無賒不成店」，「賒了店不成」he 是 leh 講sng2 笑，哪著掛心。
都按呢- -m7，罔講罔笑，罔消遣，無嘛做著卡輕鬆。###
註：
kam2 仔店：雜貨店。／chhiaN3 工人：[雇工人]／生理be7-bai2 - -hoN ：[生意不錯吧]／抑有卡choah8：[哪有屁用]／haiN ：[哼聲]／chit8 -e7 bai2 ：[一難做]／厚賒欠：賒欠傷濟。／asalih：日語，[乾脆]／欠賬 ：khiam3-siau3。／僥倖- -a7：[糟糕了]／hou7 伊an7：[讓他寬限幾天] ／都按呢- -m7：[就是這樣嘛]
─Siau,Lah-jih
「無話講ka-lo2。」另外有一說，講做「無話講傀儡。」意思共款， 典故來源無仝。
話講擔工ti7 茄荖庄歇睏食晝後，就閣起行，潦過ba5-lo5 溪，一路看 見ta3 濛陰險e5 傀儡山，山內toa3 有生番會搶劫thai5 人，咱逐家著卡 小心。傀儡山著是chit-mai2 霧峰鄉e5 九九峰，山頂時常ta3 濛霧，ui3 茄荖行到埔里攏有khoaiN3 ，所以擔工一路腳頭重，嘴閒閒，罔pho3 - tau7 「無話講傀儡。」
Siau,Lah-jih 寫鹹酸甜，嘛是時常ti7-leh 「無話講ka-lo2」，m7 是無聊 ，只是beh 加講寡純正e5 Ho7-Lo2 台語- -nia7-tiaN7，優美雅氣e5 Ho7-Lo2 話，若無借開講來講出嘴，是會因為北京語e5 惡勢力來扑m7 見，Siau,Lah-jih 感覺真見笑，過去對咱台灣e5 歷史文獻了解真少， 若是ti7 「無話講傀儡」中間講了有teng5 - taN5 ，請逐家愛指出錯誤 ，m7-thang 客氣，按呢才be7 誤了咱對台灣e5 認識。###
註：
傀儡：ka-le2 ，家禮，牽線傀儡戲。／ta3 濛：[罩著霧氣]／toa3 ：住 。／生番：chheN-hoan，日本人對原住民e5 稱呼。／thai5 人：殺人。 ／khoaiN3 ：看見。／腳頭重：腳食力沈重。／pho3 - tau7 ：開講。 ／扑m7 見：[丟掉，失去了]／teng5 - taN5 ：[重複錯誤]
─Siau,Lah-jih
Ka-lo2 是一個地名，ti7 彰化縣kap 南投縣隔界e5 八卦山脈頂峘，分頂 ka-lo2 、下ka-lo2，著是chit-mai2 e5 芬園鄉啦。Ka-lo2 漢字寫做「茄荖 」，看著「茄荖」會曉念做Ka-lo2 e5 人，除了在地人以外，可能無濟 。
聽講古早一府二鹿三bang2-gah e5 時代，有hit-lo7 生理人，In ui3 鹿港 擔鹽、海產去內山埔里賣，才閣買山產香菇鹿皮來鹿港出口，雖然擔 擔艱苦路頭又閣遠，m7 - ku2 來.去.雙choah8 趁，卡艱苦嘛算會ho5 。
透早ui3 鹿港出發行到Ka-lo2 庄頭，上無嘛著四五六點鐘，拄好歇睏 食下晝，然後才閣起程，到埔里交貨、買貨，歇睏一暗，天光早起才 閣ui3 埔里擔貨回鹿港，共款愛經過Ka-lo2 庄歇睏食下晝，Ka-lo2 庄 變成中途歇睏站。（Siau,Lah-jih 對chit 方面無研究，只是推論e5 假設 ）
擔工一路行一路汗流，苦楚無te3 講，路中In beh 如何排解無聊鬱卒e5 心情，只有談說厝內父母、某囝、兄弟，閣來談論男女情愛e5 tap8-tap8 滴滴，做一睏to-ia7 來到Ka-lo2 庄，歇睏- -ou7 逐家來食飯， 故鄉話屎暫時斷，換來議論Ka-lo2 庄，楓仔坑米粉有出名，寶藏寺是 界靈聖，貓羅溪水冷ki-ki 閣chhoah 流，等一下beh 過著se3 - ji7 ，潦過 ba5-lo5 溪著會到草屯，草屯閣行無外遠，著是埔里庄。
Ka-lo2 庄- -a3 茄荖庄，十講八講嘛是阮，敢be7 嫌臭酸，「無話講 ka-lo2。」若無按呢閒話來練仙，長lo2-lo2 e5 時間to7 無thang 消遣。 ###
註：
頂峘：[上面]／Ka-lo2 ：頂茄荖屬南投縣，下茄荖屬彰化縣。／來.去. 雙choah8 趁：[去回兩趟都可賺錢]／ui3：從。／算會ho5：[很划算]／ 苦楚無te3 講：[痛苦無處訴說]／tap8-tap8 滴滴：[瑣碎的點點滴滴]／ 做一睏to-ia7 來到：[一口氣都已經來到]／話屎：閒話。／楓仔坑： png-a2 kheN。／貓羅溪：ba5-lo5 khe。／chhoah 流：急流。／se3 - ji7 ：小心。／潦過：liau5 -koe3 。／十講八講嘛是阮：[每次講都是講我 們]／敢be7 嫌臭酸：[難道不煩嗎？]／練仙：練仙講閒話。／長 lo2-lo2：長時間。
─Siau,Lah-jih
1998.04.07 天頂無坎都beh peh khit- -lih8！
有人按呢講，教囝親像放風吹，外國人是放- -leh 、giu2- - leh ，放到 有一個koan5 度，著愈放愈koan5 ，m7 驚伊斷線無回頭，因為伊有才 調飛hiah koan5 ，已經m7 免閣hou7 人操心；台灣人就無仝款， chim-mih 放chim-mih 擋，放到有一個高度，就m7 敢繼續放，kan - na7 驚去斷線，驚去囡仔無照伊希望，就無彩chhiaN5 囝e5 一遍心chiaN5 ，teN7 驚死，放驚飛，著是chit 款心情。
大概是chit 種心理e5 作怪，做人父母- -e5 ，見若看著囡仔peh koan5 peh 低，就罵講囡仔hiah 呢chian7-kut，「天頂無坎都beh peh khit- -lih8 ！」害著囡仔天真活潑e5 本性，自細漢著ka7 限制tiau5 -tiau5 ，大漢 beh 哪有變竅- -neh ？西洋人就無共款，In 卡注重隨性發展，放hou7 囡仔自由發揮，只要m7 是做歹，安全問題父母會顧hou7 好勢， m7-chiah 外國囡仔攏加真活潑，敢講話閣敢冒險。
chit-mai2 請逐家拍開TV 看覓，chun7 報運動e5 hit 台，越野腳踏車、 機車peh chiuN7 山崎，高空彈跳ui3 天頂跋落來，飛行sit8 、拖曳傘、 lak-kah-sang2、ti7 空中leh 倒頭栽，滑板e5 特技表演車跋反……等等 ，若hou7 老一輩- -e5 看khit 來，一定講遮e5 少年人食飽閒閒，連「天 頂無坎都beh peh khit- -lih8！」實在僥倖。
「天頂無坎都beh peh khit- -lih8！」是人.對家己e5 一種挑戰，除了趣 味嘛是鼓勵咱愛有奮鬥e5 人生，愛冒險愛刺激e5 少年朋友，若beh 做 chit 款運動，請恁著事前做好安全e5 準備，m7-thang 倉倉磅磅就beh 表演，才be7 危險發生。###
註：
坎：kham2 ，[階梯]。崁（kham3 ）。／peh khit- -lih8 ：[爬上去]／放 風吹：[放風箏]／放- -leh 、giu2- - leh：[邊放邊拉住]／koan5 度：[高 度]／有才調：有辦法。／chim-mih 放chim-mih 擋：[邊放邊煞住]／驚 去斷線：kiaN-i3 斷線。／chhiaN5 囝：栽培囝。／teN7 ：[用力抓住] ／chian7-kut ：賤骨，無時閒愛sng2 。／變竅：pian3-khiau3。／chun7 ：鏇。／越野：oat8-ia2 。／peh chiuN7 ：[爬上]／高空彈跳： ko-khong toaN7 跳。／sit8 ：[翅膀]／拖曳傘：thoa -i7 -soaN3 。／ lak-kah-sang2：降落傘。／滑板：kut8-pang 。／僥倖：hiau-heng7，怨 嘆無可奈何e5 歹代誌。／
─Siau,Lah-jih
1998.04.06 囡仔食紅 chim5 ，heng3 -kong2 。
chim5 分紅蟳、青蟳kap 紅kong2 蟳，是一種誠名貴e5 海產，kap 一 般e5 毛蟹、chhih8-a2 無相仝，chim5 -a2 肉食著卡teng7 腹，仁卡濟， 台灣人ka7 看做是一項補品，所以價數嘛加足koan5 - -e5 。
beh 食蟳，上好揀卡teng7 閣飽仁- -e5 ，剖做四hou3 ，chham 蔥頭、 雞卵來青炒，抑是bun 紅蟳米糕，抑是chham 蒜頭、hiam 椒仔、蔥、 薑、酒等，chheng3 五味紅蟳，攏是hou7 人流嘴瀾e5 上頂料理，當然 口味好bai2 ，kap 總舖師e5 功夫真有關係。
有人興燒酒，有人興土豆仁，食chim5 -a2 料理，大人重氣味，囡仔 愛chhng2 蟳管腳，人講「囡仔食紅 chim5 ，heng3 -kong2 」，實在有 影。昨昏牽手炒一盤蟳仔腳，Siau,Lah-jih kan - na7 食二支就嫌麻煩， ti7 厝裡hit 二個囡仔就無仝，In 是一直chhng2 一直呵咾好食，一目nih 仔ka7 sut 了了。
「囡仔食紅 chim5 ，heng3 -kong2 。」是一句歇後語，heng3-kong2 著是興講，heng3 講話e5 意思，heng3 講話並無啥m7 著，國會議員若 be7 heng3 講話，著無才調kap人辯論，咱選伊是beh -ni5 ？m7 - ku2 做 人若kan - na7 heng3 講話，見講攏是一寡無衛生e5 話題，kan - na7 講 hou7 家己歡喜，管汰人去死e5 厚話愛thi7 ，就be7 得人e5 呵咾鼓勵。 ###
註：
kong2：管子。／毛蟹：mou5-he7，[螃蟹]／teng7 腹／仁／價數／ teng7／剖做四hou3 ：切做四塊。／chham：[加上]／hiam 椒仔：番仔 薑，[辣椒]。／bun：[悶燒煮食]，bun - png7 ，bun 米糕。／chheng3 ：蒸煮。／chhng2：[骨縫內取食的動作]／昨昏：[昨天]／sut 了了：[ 吃光光]／歇後語：hiat-hou7-gi2。
─Siau,Lah-jih
一間舊厝家己無leh toa3 ，稅一個羅漢腳仔leh khia7 家，chit-e5 少年 人真古意，可惜將近四十猶無某無猴，家己趁錢家己煮食。查甫人著 是查甫人，亦be7 曉整理內底，據在伊厝內垃圾生蜘蛛絲，最近搬徙 位無閣稅，才發覺chit 間厝無閣整理拚掃一遍be7 使chit 。
朋友紹介二個清潔工人，漢草be7 - bai2 ，生做大叢閣四正，In 講 m7 - na7 會曉拼掃洗土腳，嘛會曉拆厝頂、油漆、抹壁，chit-mai2 工 人誠歹倩，規氣hou7 In 兩人總貿。
做去一工了後，問講三樓鎮塊遐e5 舊眠床舊家私，敢著拚掉？
當然愛- - lou3 ！
抑無貨車，beh 叫阮車去叨位hiat - kak8 ？
……
壁堵油漆好- -a3 ，天房hiah koan5 ，敢著漆？
當然愛- - lou3 ！無漆敢會看得？
抑無梯，抑無搭架，是beh 按怎漆？
……
oa5-a2 ！原來是「大箍pe2 ，好看頭」- -nia5 ，- -無二步七a3 也敢想 beh 賺食，taN 按呢好- -a3 啦，恁做會來- -e5 趕緊做做咧，土腳閣掃 掃咧著好，chhun - -e5 阮才家己來收煞。
人.若m7 學一半步仔趁食e5 功夫，允著工課趁人be7 倒，實在冤枉， 看是一祀chiah 大祀，做著工課那龜，莫怪會hou7 人笑大箍呆。###
註：
大箍pe2 ：[身高馬大]／好看頭：[好模樣，有看頭]／無leh toa3：[沒 有在住]／稅：soe3 ，租。／khia7 家：[居家]／無某無猴：無某無囝 。／整理內底：[整理屋內]』／據在伊：[任其]／搬徙位：搬厝。／漢 草be7 - bai2：體格真好。／生做大叢閣四正：[長得人高馬大又端正] ／In：[他們]／誠歹倩：[不容易雇]／規氣：[乾脆]／總貿：chong2 -bauh8 ，[全部包下來]／鎮塊遐：[佔位置的那些]／拚掉：[清理丟掉] ／hiat - kak8：[丟掉]／天房hiah koan5 ：[天花板那麼高]／oa5-a2 ！： [糟糕！]／賺食：choan2-chiah8，m7 是趁食。有投機e5 意思。／做會 來- -e5：[可以做得到的]／chhun - -e5：[剩下的]／收煞：收尾。／允 著工課：[找到工作]／趁人be7 倒：無法度完成工作趁人e5 錢。／看 是一祀chiah 大祀：[看起來是長得那麼高大，好像很有做為的樣子]祀 ：chhai7 神。／那龜：像龜hiah 呢慢。
─Siau,Lah-jih
今年chit 班三年仔生，不止仔古錐幼chiN2 ，天真活潑愛sng2 ，尤其 是查甫囡仔，下課e5 鐘聲若tan5 ，著相爭m*h 球落樓腳 i7 siang3 痛- -e5 ，每一擺攏是sng2 kah 歸身軀tang7 汗，到下晡放學e5 時陣，已經 歸身烏so5-so5，嘛無想beh 洗洗拭拭咧，咱kan - na7 看著就艱苦，人 In 猶原是笑微微，有thang sng2 著好，上煩惱- -e5 著是驚我禁止In chhit - tho5 。
初中囡仔著無啥共，大部分e5 學生，m7 管伊查甫查某，逐個開始愛 sui2 愛庄，查甫囡仔穿插beh 激大人氣口，頭毛loa7 kah 真整齊，查某 囡仔閣卡愛打扮，會曉注意內衫e5 樣式，若m7 是學校有限制，頭毛 可能會電kah khiu5-khiu5-khiu5 閣染色，哪會按呢？是m7 是In leh 叛逆 m7 聽話，m7 是，是因為In 已經進入青春期，囡仔leh 轉大人- -a ，做 老師做父母e5 人，若無小可體貼遮e5 少年人e5 想法，叫是In leh 變歹 ，按呢著差大碗- -lou3 。
奉勸各位做人父母e5 家長，恁兜若有hit-lo7 愛扑咯雞e5 少年家，抑 是有hit-lo7 『吾家有女初長成』e5 少女，恁著注意，「耳仔後無sian ，查某查甫著會變」，chit 句俗語就leh ka7 汝提醒，看學生囡仔e5 身 軀有生sian 無生sian ，阮老師有卡無方便，請恁著家己關心，當然 chin2 .e5 時代卡衛生，beh 看生sian 卡無可能，教恁一步，恁兜少年 查甫後生查某囝，若是入去浴室歸半晡，洗身軀tau7-tau7-a2 bong ， 恭喜，che.是In 大漢e5 開始，恁著關心se3 - ji7 。
註：
sian ：[身上的污垢]／著會變：[就會改變打扮]／幼chiN2 ：幼稚。／ 愛sng2 ：[好玩]／tan5 ：響。／mouh 球：[抱球]／ i7 siang3 痛- -e5 ： [玩打痛的遊戲]／歸身軀tang7 汗：[滿頭大汗]／烏so5-so5 ：[髒兮兮的 ]／kan - na7 看著就艱苦：[光是看了就不舒服]／有thang sng2 著好： [有得玩就好]／激大人氣口：[妝扮大人模樣]／loa7 ：[梳頭髮]／叛逆 ：poan7-hek8。／叫是：kio3 - -si7，[以為是]／差大碗- -lou3 ：差真濟 ，傷離譜。／hit-lo7 ：[那種] ／扑咯雞：[小公雞學啼]／chin2 ： chit-mai2，現在。／tau7-tau7-a2 bong ：慢慢仔洗，[東摸西摸的]／se3 - ji7 ：小心。
─Siau,Lah-jih
一件hou7 人怨嘆e5 事情，親兄弟為著財產起相爭，cheN 來cheN 去 be7 分明，beh 如何- -neh ？扑官司，父母猶ti7-leh，無hiah khok-heng5 ，無beh 按怎？歸尾In 老母請出In 母舅，代誌才自按呢喝停，「天頂 天公，地下母舅公」，母舅e5 權威chiah 好用。
天頂上大是天公，beh 敬天公著齋戒沐浴，清香四果，功夫- -e5 閣著 排雙層桌，che. 是敬畏天敬畏大自然e5 心意，值得呵咾。凡間上大- -e5 是母舅，母舅著是老母In 兄弟，外公e5 後生，你敢敢無尊敬伊， 不孝父母be7 使chit ，無尊重阿舅嘛是逆天理，你知無？
chit -mai2 e5 人可能卡無注重遮e5 道理，若是卡早，外甥外甥女仔beh 結婚，吊聯食桌母舅一定是大位，若無.hou7 母舅無歡喜，包領你會 失氣，敬老尊賢尊重母舅上好m7-thang hou7 伊剋虧，以後分財產抑是 老母百歲年老，有代誌著愛靠母舅來解圍。「死查甫扛去tai5 ，死查 某等候外家來」，死查某著是講死老母e5 意思，老母若過身，外家母 舅若m7 來弔喪，he .喪家e5 子弟就歹看- -a3 。
註：
相爭：sio-cheng，爭吵冤家相扑。／cheN 來cheN 去：[爭來爭去]／父 母猶ti7-leh ：[父母還健在]／無hiah khok-heng5 ：[沒有那麼過分]／In ：[他們]／chiah 好用：[這麼管用]／齋戒沐浴：chai-kai3 bok8-ek8。／ 清香四果：chheng-hiuN su3-ko2。／功夫- -e5 ：照起工- -e5 ，[慎重其 事的]／雙層桌：頂下桌，二百張桌相疊，頂桌拜天公。／你敢敢： Li2 kam2-kaN2 ？／若是卡早：[如果過去的時候]／吊聯食桌：[掛喜 幛吃喜酒]／若無：[否則]／失氣：sit-khui3，漏氣無面子。／死查甫 扛去tai5 ：男人死了直接辦理喪事著好。／死查某等候外家來：查某 人若死去，著愛後頭厝來奔喪，無疑問才會使chit 出山。／he .喪家e5 子弟就歹看- -a3 ：[那喪家的子女就不好處理了]
─Siau,Lah-jih
阮田中鎮鎮立圖書館，後禮拜beh 開一班鄉土語言研習班，對象是鎮 內國民中小學e5 老師，叫 Siau,Lah-jih 擔任講師，有chit 種推銷台語、 研究台語e5 機會，hou7 人歡喜，著事先編寫一寡教材，才be7 hou7 來研究e5 老師失望。
公文傳到學校，有老師歡喜beh 報名參加，黃老師招林老師來去報名 ，林老師按呢講：好是好，食老- -a 才leh 車拼，m7-thang 「頭 heng3-heng3，尾冷冷」著好，kah 是老蕭- -e5 beh 做e5 工課，咱一定 ka7 捧場才be7 失禮。
政府為著本土化，已經開放母語教育，可惜彰化縣政府並無用心推 sak ，致使參加母語研習e5 老師，有真濟人煞「頭heng3-heng3，尾冷 冷」，實在真可惜。親像chun5 - -年hit 擺研習，參加e5 人120 外個， 每擺出席攏有七、八成，m7 - ku2 經過年外到taN，並無看著有人leh 做chit 方面e5 工課，無趣味無目標e5 工課，是無功效- -e5 ，母語e5 研 究是本土文化e5 根本，政府若無重視，老師哪會投入，相信若來開一 班股市分析研究班，一定客滿閣興趣飽足，功利主義e5 社會使人怨嘆 。
希望chit 次e5 研習會無共款，想看覓咧，看beh 按怎ka7 In siaN5 入來 台語世界。 ###
註：
頭heng3-heng3 ：開始真趣味。／kah 是：既是，既然是。／chun5 - - 年：[前年]／到taN ：到現在。／siaN5 入來：吸引進來，引誘過來。
─Siau,Lah-jih
下課時間來到訓導處tng-leh 看報紙，tng7 著李老師嘛到位，看著桌頂 khng3 一盒雞卵糕，伊真kho3-siok8 拍開盒仔蓋著提khit 來食，嘛提一 塊tu - -過來，因為m7 知影是啥麼人買- -e5 ，所以客氣m7 敢隨接手， 李老師硬tu-kah 手- -裡講：「一食，二穿，欠錢慢慢仔還」，食啦！ 驚阿爸，管伊啥人e5 ，khng3 - tiam3 遮著是beh hou7 人食- -e5 ，免客 氣。
又閣是食，食食叫，國以民為本，民以食為天，食、穿、toa3 、行， 食是排頭名，講著食m7 是見笑代，無食無營養，無食哪有氣力做工 課。過去e5 年代，逐家生活卡艱苦，辛苦扑拼第一著是為著食， kan-taN 求食一個粗飽，管汰伊衛生禮節，chit-mai2 時代進步，物資 充足，食e5 生理塞倒街，逐家食kah 傷富裕，傷量 siong7 嘛傷討債， 實在有需要節約，講究衛生禮節，食e5 文化著提昇，食卡有氣質咧， 「一食，二穿，欠錢慢慢仔還」，食是真重要無m7 著。###
註：
tng-leh：拄好，[正在]／tng7 著：拄著，[遇到]／khng3 ：[放]／ kho3-siok8 ：／tu - -過來：[送過來]／驚阿爸：[怕甚麼]／khng3 - tiam3 遮：[放在這裡]／hou7 人食- -e5 ：[給人吃的]／食、穿、toa3 、行： 食、衣、住、行。／管汰：[管他的]／塞倒街：[到處都是]
─Siau,Lah-jih
|
|
|
