Kho2-chhi3-choa2 u7 chit e5 bun7-te5 : Ui7-ho5 thau5-mou pi2 chhui3-chhiu khah tai7-seng peh8 ?

1 e5 thian-chai5 hak8-seng e5 tap-an3 si7 : Thau5-mou pi2 chhui3-chhiu khah cha2 15 ni5 hoat- -chhut-lai5 , khah lau7. Sou2-i2 seng peh8.

Ian3-hoe7 tiong 1 e5 lang5-kheh tui3 keh-piah e5 lang5-kheh kong2 :

" Hit e5 thai3-thai3 chhiuN3 he koa kiam2 e7 thiaN- -tit ? U7 kau3 lou2 ! Li2 bat- -I -bo5 ?"

" Hit e5 si7 Goan2 bou2 ."

" O3 , phaiN2-se3, Goa2 m7-si7 kong2 I e5 siaN-im bai2, Goa2 e5 i3-su3 si7 koa-khek bai2. Ki5-koai3, chiah bai2 e5 khek si7 siaN2 lang5 sia2- -e5 ?"

" To-sia7 chi2-kau3, Goa2 sia2- -e5 !"

( Chian5-gian5 : Hian7-kim e5 siau3-lian5-lang5 sou2 kong2 e5 oe7-gi2, long2 si7 Pak-kiaN-gi2 kap Tai5-gi2 lam7-lam7 cho3-hoe2 kong2. Chit e5 hian7-siong7 chin chhu3-bi7, ia7 chiaN5 sim-sek. M-ku2 ma7 nau7 chhut chiaN5 choe7 chhio3-khoe tai7.)

Na7 khi3 koe3 gin5-hang5 e5 lang5, chiu7 oe7 chai-iaN2: an-choan5 bo7-a2 kap " 口罩 " long2 be7-sai2 ti3- -jip8-khi3. In-ui7 lang5 kiaN Li2 si7 phaiN2-lang5 beh lai5 chhiuN2-kiap- -e5. Sou2-i2 chiah u7 chit8-hang7 kui-teng7.

Chit8-e5 lau7 a-peh- -a m7-chai chit e5 kui-ki2. U7 chit8 pai2 I kam2-mou7 to ka7 "口罩 " kat- -leh beh jip8-khi3 gin5-hang5 nia2 chiN5.

" A-peh- -a ,chhiaN2 Li2 thng3 " 口罩 "- -chit8-e5, che si7 goan2 e5 kui-teng7." Gin5-hang5 sio2-chia2 chiaN5 ho2-le2 ka7 I kong2.

Lau7 a-peh thiaN liau2 au7 siuN7 kong2 : chit e5 sio2-chia2 u7 kau2 put-su2-kui2, ham7 Goa2 chit e5 lau7-hoe3-a2 I ia7 beh chiah8 tau7-hu7. Chiu7 an2-ni bo5-i3 bo5-i3, bo5 chhap- -I.

Gin5-hang5 sio2-chia2 khoaN3 I gang7-gang7 khia7- -leh, chiu7 koh tui3 a-peh- -a kong2 :" A-peh- -a chhiaN2 Li2 thng3 " 口罩 "- -chit8-e5."

Chit-si5 a-peh- -a suh chit8-khau2 khui3, na2 siuN7 na2 gek8, tioh8 toa7 siaN tui3 sio-chia2 kong2 :" Goa2 kan-ta chai-iaN2 nia2 chiN5 e5 si5 tioh8 ai3 chah sin-hun7-cheng3 kap in3-a2 na7-tiaN7. Tang-si5 u7 chit tiau5 kui-teng7 koh to7 ai3 thng3 khou3 chau2- -chit8-e5 ? Lin2-pe7 be7 gian3 nia2 - -a3 lah !" Chiu7 an2-ni oat8-thau5 choe3 I khi3.

Goan5-lai5 chit e5 sio2-chia2 si7 kong2 :" ChhiaN2 li2 thng3 口罩- -chit8-e5.(請你把口罩脫下一下子) A-peh- -a soa3 ka7 hut tui3 :請你脫褲子跑一下 !

Kou2-cha2 kou2-cha2, han-chi5 chiah8 kau3 pa2. Na7-si7 koh khah cha2, han-chi5 ma7 chiah8 be7 pa2. Hit -e5 sun7 -nia5, goa7-kok long2 iau2-si7 hoan-hoan bi7 khai-hoa3, Lan2 ka7 chheng-hou cho3 "hoan-pang".

Kong2 u7 chit8 kang, hoan-pang e5 kok-ong5 chiah8-pa2 siuN-eng5, m7-chai to2 chit8 tiau5 tng5-a2 khi3 siuN7- -tioh8,chiu7 ka7 pou7-ha7 kong2 :

"ThiaN-kong2 tang-hong e5 Khong2 Chu2-kong u7 chiok chin3-pou7 e5 bun5-hoa3, Lin2 tak8-e5 chek-si5 chek-khek pau-hok8-a2 khoan2 khoan2 - -leh kin2 khi3 ka7 Khong2 Chu2-kong "chhu2-keng".

An-ne-seN e5 si5 -chun7 - -nia5, chiong3 hoan-tai7-sai3 chiu7 theng5-hun5 ka3-bu7 ( m7 si7 - -lah, si7 che7 hui-ki .) kin2 kin2 lai5 kau3 Khong2- -ka3 . Tu2-ho2, Khong2-chu2 khi3 chiu-iu5 liat8-kok, kan-ta chhun Khong2-chu2-ma2 ti7 chhu3, ti7 chau3-kha teh chu2-png7、chha2-chhai3. Chiong3 hoan-tai7-sai3 ti7 mng5-khau2 khoaN3 Khong2-chu2-ma2 bo5-eng5 chhih-chhih, toa7-tiaN2 se3-tiaN2 chhi -chhi chha3 -chha3, siuN7 kong2 m7-chai teh che3-cho7 sim2-mih8 ko-teng2 bun5-hoa3, m7-kaN2 ka7 kiau2-jiau2, kan-ta khia7 ti7 chau3-kha mng5-khau2 niau-niau khoaN3, na2-chhiuN7 chin hoN -hian5 e5 khoan2.

Khong2-chu2-ma2 ia7 chit8-si5-tek m7-chai hoan-tai7-sai3 tau3-te2 si7 beh tih8 sim2-mih8, chiu7 ka7 I tu2 chha2 ho2 e5 tau7-chhai3 sang3- -In. Chiong3 hoan-tai7-sai3 sui5-si5 hoaN-hi2 kau3 kiong7 beh lau3-e7-hai5, ma2-siong7 che7 747 tng2-khi3 po3 kok-ong5 chai. Kok-ong5 phiN7-tioh8 phang-bi7 sui5 lau5 chhui3-noa7, to-a2、poaN5-a2 sa- -leh toa7-chhui3 se3-chhui3 chiu7 ka7 sut- -loh8-khi3. Bo5 nng7-e7-chhiu2 chit8 pau tau7-chhai3 sut kau3 chhun bo5 saN chhui3. Chiong3 hoan tai7-sai3 koaN2-kin2 ka7 kok-ong5 kong2 :

" Khe2-pin2 Pe7-ha7 ( Pe7-ha7 chiu7-si7 Pak-kiaN-oe7 e5 陛下Pi2-shia2 ), he7 si7 khong2-chu2-ma2 sang3- -lan2 e5 bun5-hoa3, m7-si7 beh hou7 Li2 chiah8- -e5 !"

Kok-ong5 chek-si5 ka7 chhun- -loh8-lai5 e5 tau7-chhai3 theh8 lai5 khoaN3 -khoaN3 sng3- sng3 - -leh , tu2-ho2 chhun 26 ki , chiu7 chiau3 In e5 heng5 lai5 cho7 bun5-ji7. Che tioh8-si7 tau7-chhai3-ge5-a2 ji7 e5 lai5-goan5 !

Ti7 te7-Ji7 -chhu3 se3-kai3 tai7-chian3 e5 Romania hoe2-chhia lai7 , che7 4 e5 lang5 : Tek-kok kun-koaN, Romania e5 a-peng-ko, Lau7 a-po5 kap Sui2 tang-tang e5 kou-niu5.

Hoe2-chhia kiaN5-jip8 pong7-khang, kui chhia-lai7 am3-bong-bong. Hiong5-hiong5 u7 lang5 teh sio-chim e5 siaN, koh u7 siam3 chhui3-phe2 e5 siaN. Hoe2-chhia sui5 kiaN5 chhut pong7-khang.

Chit 4 e5 lang5 sim-lai7 long2 teh ioh tu2-chiah hoat-seng e5 tai7-chi3.

Tai7-ke long2 u7 khoaN3-tioh8 hit e5 Tek-kok kun-koaN e5 chhui3-phe2 ang5 ki3-ki3.

A-po5 siuN7 kong2 :" Sui2 kou-niu5 u7 chi3-khi3, m7-kiaN Tek-kok kun-koaN."

Sui2 kou-niu5 siuN7 kong2 :" Tek-kok kun-koaN u7-iaN2 a2-tah a2-tah, m7 lai7 chim- -Goa2 khi3 chim lau7 a-po5 ? Hm2 ! Kham-kai hong5 (hou7 lang)sian3 chhui3-phe2 !"

Tek-kok kun-koaN liah8 Romania e5 a-peng-ko siong3- -leh siong3- -leh, sim-lai7 chiok put-boan2 :" Lin2 nia5 - -leh ! Li2 chim sui2 kou-niu5, hai7 goa2 hong5 phah ! Li2 u7 kau3 bo5-khoan2 koh iau2-siu7 !"

Romania e5 a-peng-ko siuN7-tioh8 chiok boan2-i3 koh ai3 -chhio3 :" Goa2 chim goa2 ka-ki7 e5 chhiu2-poaN5 chit8 -e7, sun7-soa3 e7-tang3 siam3 Tek-kok kun-koaN e5 chhui3-phe2 chit8 -e7. Chan2 ! U7 kau3 sui2-khui3 !"

U7 chit8 ke-hoe2-a2 , lau7-pe7 cho3 i-seng, lau7-bo2 ka3 Eng-gi2 . In kan-ta u7 chit8 e5 po2-poe3-a2 cha-bou2-kiaN2. Ang-a2-bou2 pang-keng-lai7 e5 tai7-chi3 long2 kong2 am3-oe7:

"Khan-chhiu2- -e5, Li2 e7 -am3 the3 goa2 pou2-sip8 Eng-gi2."

Boe2-a2, In koat-teng7 beh i5-bin5 khi3 Kha-na2-tah ( Canada ). M-ku2 lau7-pe7 ai3 chiam7-si5 koh lau5 ti7 chia than3-chiN5. Po2-poe3 cha-bou2-kiaN2 hiong5-hiong5 siuN7-tioh8, kong2 :

" An-ne, au7-pai2 a-pa beh an2-choaN2 pou2-sip8 Eng-gi2 ?" In a-bo2 chit8-si5-tek soa3 m7-chai beh an2-choaN2 in3, chiu7 toa7 siaN tui3 In a-pa kong2 :

" Put-chun2 chhiaN3 ka-kau3 ! Be7-sai2-tit khi3 pou2-sip8-pan. Ka-ki7 tiam3 chhu3-lai7 khah phah-piaN3 lian7-sip8- -leh tioh8 ho2 !"

Ti7 iu5-eng2-ti5,"Ma-mi, Goa2 beh khi3 toa7-lang5 khut siu5-chui2 ho2- -bo5 ?"

" m7 -thang ,hia siuN chhim, bo5 an-choan5 !"

" SiuN chhim? Si7 an2-choaN2 pa-pa tioh8 e7-tang3 ti7 hia siu5 ? Kiam2 kong2 toa7-lang5 to7 it-teng7 an-choan5 ?"

" Gong7 gin2-a2,Lin2 pa5 u7 be2 po2-hiam2, Li2 bo5 !"

"Cheng7 goa2 seng-li2 sit-pai7 liau2-au7," Lau2 Tan5- -e5 an2-ne oan3-than3 ,"u7 chit8 poaN3 e5 peng5-iu2 long2 bo5 ai3 koh chhap- -Goa2 ."

Lau2 TiuN- -e5 ka7 mng7 kong2 :" Ah leng7-goa chit8 poaN3 - -leh ?"

Lau2 Tan5- -e5 chiok bu5-nai7 hoe5 kong:"In iau2 m7-chai Goa2 seng-li2 sit-pai7 !"

"Si7 an2-choaN2 Goa2 kian3-pai3 na7 teh chhiuN3-koa Li2 long2 chau2 chhut-khi3 iang5-tai5 hia khia7 ?"

"Goa2 beh hou7 chhu3-piN-tau chai-iaN2 Goan2 bou2 teh chhiuN3-koa, m7-si7 goa2 teh phah Goan2 bou2 !"

"Li2 tui3 chit 2 e5 chhi7-tiuN2 hau7-soan2-jin5 u7 sim2-mih khoaN3-hoat- -bo5 ?"

"Ho2-ka -chai3, kan-ta 1 e5 e7 tiau5 (tong3-soan2 )- - nia5 !"

(78)、Cha3-khi

Hoat-koaN :"Li2 na2 e7-sai2 khi-phian3 hiah e5 siong-sin3- -li2 e5 lang5 ?"

Hoan7-lang5 :"Tai7-jin5 - -ah, bo5 siong-sin3- -Li2 e5 lang5 Li2 na2 u7 kho2-leng5 phian3 e7 koe3-chhiu2 - -leh?"

Ti7 hun-in kou3-bun7 tiong-sim lai7-te2, kou3-bun7 choan-ka ka7 chun2-sin-niu5 kian3-gi7 :

" Li2 na7 siuN7 beh po2-chhi5 Lin2 ang tui3 Li2 e5 hoN2 -ki5 kap chhu3-bi7, e7 ki3-tit, m7-thang ti7 I e5 bin7-thau5-cheng5 thng3 kau3 kng-kng-kng ! Put-koan2-si5 to ai3 po2-chhi5 chit8-sut-a2 sin5-pi3 e5 sou2-chai7."

2 ko3-goeh8 au7 beh khun3 e5 am3-me5, " Lin2 tau kiam2 u7 lang5 tai3-tioh8 cheng-sin5 chho3-loan7 e5 sin-keng-peN7 - -sioh ?" Cha-pou7- -e5 teh mng7 .

"Bo5- -a3 , an2-choaN2 - -leh ?" cha-bou2- -e5 mng7 to3-tng2-khi3 .

" Goa2 ma7 siuN7 bo5 - -leh ! Si7 an2-choaN2 Li2 tak8 me5 beh khun3 e5 si5 saN2-a2-khou3 long2 thng3 kau3 kng-kng-kng, khiok ti7 thau5-khak teng2 ti3 1 teng2 bo7-a2 - -leh?"

1 e5 ho2-giah8 lang5 ti7 chhan-thiaN teh chiah8 gu5-pai5. 1 e5 chheN-hun7-lang5 kiaN5 oa2- -lai5, ka7 kong2:

" Oe2, Chin3-chai5 hiaN. Li2 si7 an2-choaN2 ? Li2 pian3 u7 kau3 che7- -e5 ! Li2 pun2-te2 thau5-mou peh8- -e5, na2 pian3 ou- -e5? Goan5-lai5 phiN7-a2 tok-tok, na2 e7 lap- -loh8-khi3. Goan5-pun2 bak8-chiu u7 teng5-sun5, si7 siaN2-tai7 bo5--khi3 ?"

Ho2-giah8-lang5 chin tin3-cheng7, chin u7 le2-sou3 ka7 in3 kong2 :

" Goa2 m7-si7 kio3-cho3 Chin3-chai5- -e5 , phaiN2-se3."

" HaN-a2 ! Pian3 hiah che7 - -ou3 ! Chham7 mia5 ma7 pian3- -a3 ou3 !"

Ng5 thai3-thai3 chiah-ku2-a2 chin ut-chut. In ang tu2 ham7 I li7-hun. 1 e5 cha-bou2-kiaN2 32 hoe3, iau2-boe7 ke3- -lang5. SiuN7 lai5 siuN7 khi3, long2 siuN7 bo5 sim2-mih8 ho2 pou7 . Lou7-boe2 chiu7 ka7 In cha-bou2-kiaN2 kong2 :

" Lan2 ti7 po3-choa2 teng 1 phiN tin-hun khe2-su7, ka7 Li2 chhoe7 khoaN3 u7 ho2 tui3 -thau5- -bo5."

Cha-bou2-kiaN2 toa7 toa7 hoan2-tui3. Ng5 thai3-thai3 kong2 mai3 iong7 chiaN3 mia5 tioh8 bo5 lang5 chai.

In e5 khe2-su7 si7 an2-ne sia2.- -e5 " Siok-lu2 32 hoe3, ka-kau3 ho2, u7 tam7-poh8-a2 keng-che3 ki-chhou2, gau5 chu2-chiah8, ai3 im-gak8 kap bun5-hak8, chin-sim seng5-i3 tin-kiu5 lam5-su7, beh kap I kiat-hun."

An-ne,In bu2-a2-kiaN2 chiah khin-sang- -khi2-lai5. Koe3 3 kang, In siu-tioh8 1 tiuN phe. Bu2-a2-kiaN2 sio-chhiuN2 beh khoaN3.

Cha-bou2-kiaN2 kong2 " Che si7 goa2 e5 chiong-sin tai7-su7, tong-jian5 ma7 goa2 seng khoaN3 !" KhoaN3 liau2, soa3 put-chi2-a2 siong-sim, ka7 phe tu hou7 In a-bu2. A-bu2 khoaN3 oan5, soa3 teh khau3. Tang-si5-a2, sia2 phe- -e5 si7 A-pa !

" Ti7 goan2 tau, toa7 tai7-chi3 goa2 cho3-chu2, sio2 tai7-chi3 goan2 bou2 koat-teng7." Peh8-chhat8 I- -a an2-ne kong2.

" Ah siaN2 lang5 koat-teng7 toa7 tai7-chi3 kap sio2 tai7-chi3 e5 khu-piat8 ?" Ngiau2-chhu2-a2 Ge7- -a an2-ne mng7.

I- -a kong2," He si7 sio2-su7, goan2 bou2 koat-teng7 tioh8 ho2 ."

" Goan2 bou2 u7 kau3-iong2, hak8-bun7 pa2." A-Kok kong2," Li2 na7 hou7 I 1 e5 te5-bok8, I tioh8 u7 hoat-tou7 kap Li2 kong2 beh kui tiam2-cheng, kong2 be7 soah ."

" He bo5 hi-han2 ." A-Hiong5 iong7 khoaN3 lang5 be7 khi2 e5 khau2-khi3 tu2 kong2," Goan2 bou2 e7-tang3 chit8 kong2 kui2-na7 tiam2-cheng , m7-bian2 u7 te5-bok8 !"

Chit8 e5 sui2 kou-niu5 kiaN5-jip8 ioh8-pang5," Thau5-ke, Li2 chia u7 i phah-eh e5 ioh8-a2- -bo5? "

Siau3-lian5 e5 ioh8-su tui3 kui7-tai5 au7 kiaN5- -chhut-lai5, kau3 kou-niu5 e5 bin7 cheng5 khu5- -loh8-khi3, ti7 kou-niu5 e5 toa7-thui2 chim chit8 -e7, kong2 :" Che tioh8-si7 choan-bun5 ti7-liau5 phah-eh e5 pi3-hng. Tan2 leh Li2 tioh8 ho2- -a."

" Loan7 su2 lai5 ! Phah-eh- -e5 si7 Goan2 ang - -neh. I ti7 chhia te2. Goa2 khi3 kio3 I lai5. KhoaN3 Li2 ka7 i e7 ho2- -bo5?"

Chit8 e5 si3-ke3 chau2 e5 thui-siau-oan5 kam2-kak bo5 goan5-khi3. I-su kiam2-cha kui-pou long2 chhoe7 bo5 goan5-in. Boe2-a2 I-su kong2 :

" Chit-ma2 beh mng7 Li2 pang5-su7 chit8 le2-pai3 kui2 pai2 ?"

" 3 pai2, pai3 it, pai3 3, pai3 5." Thui-siau oan5 lau2-sit8 hoe5-tap.

" An-ne, pai3 3 hit pai3 ai3 lang3- -koe3."

" ouh , be7 sai2- -tit.Goa2 chit8-le2-pai3 kan-ta hit kang u7 ti7 chhu3 nia5 !"

Chit8 -e5 lu2 chok-ka che7 iu5-lun5 tou7-ka2 e5 jit8-ki3 si7 an2-ne sia2:

Te7- it jit8 : Goa2 tu2-tioh8 chun5-tiuN2.

Te7- ji7 jit8 : Chun5-tiuN2 chio goa2 chiah8 am3-tng3. Goa2 chin hoaN-hi2. ChiaN eng5-heng7.

Te7 -saN jit8 : Chun5-tiuN2 chhoa7 goa2 khi3 si3-ke3 khoaN3, ma7 khi3 Ka3-su2-sek chham-koan.

Te7 -si3 jit8 : Chun5-tiuN2 chhoa7 goa2 khi3 khoaN3 I e5 pang5-keng. Ti7 hia I ka7 goa2 iau3-kiu5 kap I sin-hun7 bo5 hah8 e5 tai7-chi3.

Te7 -gou7 jit8 : I koh ka7 goa2 iau3-kiu5 he. Koh kong2 goa2 na7 bo5 tah-eng3, I beh ka7 chun5 cha3 hou7 tim5- -loh8-khi3. An-ne chun5-teng2 700 e5 lang5 e7 long2 si2- -khi3.

Ti7 Pho-lan5 (Polland), 3 e5 lang5 ti7 ke-lou7 teh phah chit8 e5 Kiong7-san2 e5 koaN-oan5.

" Li2 na2 bo5 lai5 tau3-saN-kang7 ?" Hit e5 koaN-oan5 tui3 khia7 ti7 piN- -a teh khoaN3 e5 keng2-chhat toa7 siaN jiang2.

Keng2-chhat kong2 :" Goa2 siuN7 In 3 e5 u7 kau3- -a lah!"

Tang-Tek chit8 e5 po3-sia7 e5 cheng3-ti7 chu2-pit hou7 Sou-lian5 Kiong7-san2-tong2 e5 koan2-che3-koaN tiau3-kian3.

" Li2 peh8-chhat8 oe7 kong2 be7 chio2 - -neh, tong5-chi3," Sou-go5 lang5 ka7 khau, " m7-kiaN lau3 e7-hai5 !"

Chu2-pit thiaN- -tioh8, bin7-a2 ang5-ang5. I kiong5-kek tin3-cheng7, kong2 :" Goa2 chai. Goa2 kam-goan7 chiap-siu7 chhu2-hoat8."

" Chhu2-hoat8 ?" Sou-go5 lang5 toa7-siaN chhio3 kong2 :" Thai2-tho2 chhu2-hoat8 ? Bin5-a2-chai3 Li2 beh seng-koaN cho3 sia7-tiuN2- -a !"

Chit8 e5-pou Ho5-chu5 ti7 pan7-kong-sek kha3 tian7-oe7 hou7 In khan-chhiu2 ,kong2 I i2-keng phah 2 tiuN hi3-phio3.

" U7 -iaN2- -ou3 ! Chan2 ! Goa2 sui5 oaN7-saN." In bou2 chiok hoaN-hi2.

" Sui5-chai7- -li2, hoaiN5-tit8 he phio3 si7 bin5-a2-chai3 - -e5."

Keh-piah Ng5- -e5 tiaN7-tiaN7 chhe gin2-a2 lai5 ka7 goan2 chioh chhou3 . Goan2 sui-jian5 m7-si7 chin cheng5-goan7, m7-ku2 ma7 phaiN2-se3 ka7 ki7-choat8. Chong2-si7 chit8 pai2 koh chit8 pai2 sit8-chai7 hou7 lang5 lu2 lai5 lu2 bo5 hoat-tou7 jim2-siu7.

Cha-hng In koh lai5 :" A-peh, Goan2 a-pa kong2 beh chiah8 mou5-he7 khiam3 chhou3 , beh koh ka7 Lin2 chioh- -chit8-sut-a."

Kin-a2-jit8, a-pa hiam3 goa2 khi3 Ng5- -e5 In tau :" A-chek, Goan2 a-pa kong2 Goan2 beh chiah8 chhou3 , khiam3 mou5-he7, beh lai5 ka7 Lin2 chioh mou5-he7 !"

Goa2 kiat-hun 5 ni5 long2 bo5 gin2-a2. I-seng kong2 goa2 ai3 lian5-soa3 chu3-sia7 3 ko3-goeh8 chiah u7 ki-hoe7. Thau5 2 e5 kiaN2 tioh8 si7 an2-ne chiah chhut-si3- -e5.

Koe3 1 ni5 long2 bo5 chu3-sia7 chiu7 koh u7 -sin. Goa2 chiok hoaN-hi2. Goan2 ang thiaN-tioh8 goa2 ka7 peng5-iu2 kong2 e5 oe7 liau2, pak-tou2 lam2 leh chhio3, hiam2 hiam2 tioh8 ka7 pak-tou2 chhio3 phoa3- -khi3. In-ui7 Goa2 ka7 Goan2 peng5-iu2 kong2 :

" Goa2 koh u7 sin- -a. Chit pai2 si7 goa2 ka-ki7 u7- -e5 !"

Chit8 e5 khian5-seng5 e5 ki-tok-tou5, si7 bok8-chai5 seng-li2-lang5, chiok ho2-giah8. 4 e5 kiaN2 long2 kiat-hun- -a, m7-ku2 bo5 tau3-tin7 toa3.

Chit8 kang, I ka7 4 e5 kiaN2 kio3 tng2-lai5 chu7-hoe7. I soan-po3:

" Goa2 taN lau7- -a, chiok siuN7 beh kin2 pho7 sun. Tan7-si7 lin2 long2 bo5 eng5 thang seN. Goa2 chit-ma2 beh ka7 lin2 kou2-le7. Bin5-a2-chai3 goa2 beh chhiaN2 lut8-su lai5 sia2 ui5-siok8, khoaN3 lin2 siaN2 lang5 seng seN sun hou7 goa2 pho7, goa2 chai5-san2 beh ke chit8 hun7 hou7- -I. TaN Lan2 lai5 ki5-to2 kam2-sia7 Siong7-te3. " Kong2 oan5, chiu7 aN3 thau5 ki5-to2.

Ki5-to2 soah, taN-thau5 khi2-lai5 beh chiah8-png7. 4 e5 kiaN2 long2 bo5- -khi3-ah !

Sam hoat-kak sin-sui2 te7-a2 lai7 ke chit8 chheng khou, chin hoaN-hi2, tioh8 bo5-siaN bo5-soeh tiam7 -tiam7 ka7 siu- -khi2-lai5.

Te7 -ji7 ko3-goeh8 nia2-chiN5 e5 si5 ,soa3 hoat-hian7 khiam3 chit8-chheng khou . I khi3 chhoe7 chhut-lap8 hoe:

" Li2 sng3 khoaN3 mai7. Khiam3 chit8 chheng khou ." Sam chin bo5 kheh-khi3 ka7 soan7.

" Teng2 ko3-goeh8 ke chit8 chheng khou ,Li2 na2-e7 bo5 kong2 ?" Chhut-lap8 ma7 bo5 se3-ji7.

" Tioh8 ! Khak-sit8 u7 an2-ne ! Teng2 pian3 si7 Li2 te7 -it pai2 m7-tioh8. Goa2 goan5-liong7- -li2. Chit pian3 si7 te7 -ji7 pai2 m7-tioh8. Goa2 bo5 beh goan5-liong7- -li2 !"

Lu2 :" Li2 beh ju5-ho5 cheng3-beng5 Li2 ai3- -goa2?"

Lam5 :" Goa2 na7 siuN7 tioh8 Li2, am3-si5 tioh8 khun3 be7 khi3."

Lu2 :" He be7-tang3 cheng3-beng5 Li2 ai3- -goa2 ! Goan2 lau7 pa5 na7 siuN7-tioh8 Li2 ma7 khun3 be7 khi3 !"

" Li2 khoaN3 ! Lim5 thai3-thai3 tui3 In ang u7 kau3 ho2, u7 kau3 chhin ! Tak8-kang na7 khoaN3 In ang tng3- -lai5 to7 ka7 chim - -chit8 - e7 !"

" Si7 be7 bai2 - -lah. m7 -ku2 bo5 li2 siuN7 e5 hiah ho2."

" ChaiN2-iuN7 kong2 ?"

" I si7 beh kiam2-cha khoaN3 In ang u7 ti7 goa7-khau2 lim-chiu2- -bo5 !"

Chhu3-piN e5 lang5 :" Lin2 hau7-seN iong7 chioh8-thau5 khian goan2 e5 thang-a2 mng5 !"

Lau7-pe7 :" Kiam2 u7 khian- -tioh8?"

" Ho2 -ka -chai3, khian bo5 tioh8."

" He m7-si7 goan2 hau7-seN. I chu7-lai5 long2 pek-hoat pek-tiong3."

Siau3-lian5 lang5 chhiong-jip8-khi3 thau5-ke e5 pan7-kong-sek, beh chheng2-ka2 1 tiam2-cheng.

" Goan2 bou2 beh seN kiaN2 !" I an2-ne kai2-soeh.

" Ho2, kin2 khi3." Thau5-ke bo5 lo5-so.

1 tiam2-cheng au7 I tng2-lai5 siong7-pan. Thau5-ke chin koan-sim ka7 mng7:

" SeN cha-pou- -e5 a7-si7 cha-bou2- -e5 ?"

Siau3-lian5- -e5 chhio3-chhio3-a2 ka7 in3 :" Chit-ma2 m7 chai. Ai3 koh tan2 9 ko3-goeh8 !"

Li2-koan2 e5 thau5-ke teh ka7 A.B.C 3 e5 lai5 eng3-tin hok8-bu7-seng e5 cha-pou- -e5 khau2-chhi3. Bun7-te5 :

Li2 bo5-i3-tiong sak-khui pang5-keng mng5, khoaN3-tioh8 cha-bou2 lang5-kheh thng3 kng -kng bo5 chheng7 poaN3 nia2 saN, ji5-chhiaN2 lang5-kheh ma7 u7 khoaN3-tioh8 li2. Li2 beh an2-choaN2 ?"

A: Kong2 chit8 siaN " Sit-le2 " kin2 koaiN mng5, the3- -chhut-lai5.

B: Kong2 chit8 siaN " Sit-le2, sio2-chia2 !" kin2 koaiN-mng5, the3- -chhut-lai5.

C: Kong2 chit8 siaN " Sit-le2, sian5-se2 !" kin2 koaiN-mng5, the3- -chhut-lai5.

Hou7 li2 ioh siaN2 lang5 pi7 liok8-chhu2 ?

C !