2 lang5 ti7 ia2-goa7 lou7-iaN5. Bang2-a2 chiok che7, hiN -hiN kio3. In chiu7 ka7 kui seng-khu kap thau5-khak long2 chhang3 ti7 mi5-phoe7 lai7. Koe3 chit8-e7-a2 In tham3 thau5 chhut-lai5 khoaN3, bang2-a2 long2 poe-chau2- -khi3 a. Chit si5, In khoaN3-tioh8 chit8 tin7 hoe2-kim-kou, ki5-tiong chit8 e5 lang5 hoah kong2 :

" Chit siaN bai2- -a. Bang2-a2 koh lai5 - -ah. Chit pai2 In koh chah chhiu2-tian7-a2 !"

Chit8 e5 cha-pou lang5 tui3 31 lau5 e5 thang-a2 khau2 peh- -chhut-khi3. KhoaN3- -khi2-lai5 na2-chhiuN7 beh thiau3-lau5 chu7-sat e5 khoan2. Toa7-lau5 e7-bin7 chiok che7 lang5 ti7 hia khoaN3. Chit8 -e5 keng2-chhat kap chit8 -e5 i-seng kiaN5 oa2-lai5 thang-a2. Hit e5 lang5 toa7-siaN hoah :

" Mai3 lai5 ka7 goa2 tong3, bo5, goa2 sui5 thiau3- -loh8-khi3 !"

Keng2-chhat kong2 :" Goa2 bo5 beh ka7 li2 tong3, chi2-si7, i-seng kio3 goa2 mng7 li2 khoaN3 io-chi2 beh koan- -chhut-lai5 bo5 ?"

Po3-choa2 khan chit8 -phiN ok-i3 kong-kek8 bou2 lang5 e5 bun5-chiuN, kong2:

" Bou2 lang5 e5 chai5-san2 u7 chit8 -poaN3 si7 chhiuN2- -lai5-e5!"

Hit e5 lang5 kho3 I u7 chiN5 u7 se3, kiong5-pek po3-sia7 ai3 keng-cheng3. Te7 -ji7 -kang7, siu-cheng3 e5 bun5-chiuN sia2 :

" Bou2 lang5 e5 chai5-san2, u7 chit8 poaN3 m7-si7 chhiuN2- -lai5-e5 !"

Mark Twain u7 chit8 -pai2 ti7 peng5-iu2 tau koe3 me5. Te7 ji7 kang beh chiah8 cha2-tng3 e5 si5, peng5-iu2 mng7 I khoaN3 " Beh lim- -chit8-poe-bo5?"

" m7-bian2, to-sia7." Mark Twain chin u7 le2-sou3.

" Si7 an2-choaN m7?"

Mark Twain chin cheng3-keng ka7 I kong2 :" 3 e5 li2-iu5 ! Te7 -it, goa2 si7 kai3-chiu2 chu2-gi7 chia2 ; te7 -ji7, chiah8 cha2-tng3 cheng5 goa2 m7 lim-chiu2 ; te7 -saN, goa2 cha2-khi2 i2-keng lim 6 poe- -a !"

Khanijih ( Andrew Carnegie, 1835-1919 ) si7 Bi2-kok e5 kng3-thih tai7-ong5 kap chu5-sian7-ka. I jin7-ui5 ho2-giah8-lang5 e5 chek-jim7 si7 the3 sia7-hoe7 tai7-chiong3 cho7-hok.

I se3-han3 e5 si5 tioh8 chin khiau2. u7 chit8 -pian3 I kap I e5 a-bu2 khi3 chit8 -keng koe2-chi2-tiam3. I khoaN3-tioh8 chit8 -lang2 eng-tho5 chin ang5, chin pa2-tiN7, chiok ho2 chiah8 e5 khoan2. I khia7 ti7 hit -lang2 eng-tho5 hia bak8-chiu kim-kim khoaN3, khoaN3 kau3 kiong7 beh lau5 chhui3-noa7.

Koe2-chi2-tiam3 e5 thau5-ke khoaN3- -tioh8, tioh8 ka7 I kong2 :" Gin2-a2 hiaN, li2 na7 kah-i3, phong2 chit8 phong2 khi3 chiah8, bian2 se3-ji7."

M-ku2, Khanijih kan-ta tiam7-tiam7 khia7 ti7 hia, long2 bo5 tong7-chok. Koe3 chit8-e7-a2, thau5-ke ka7 I mng7 :" Kiam2 kong2 li2 bo5 siuN7 beh chiah8 ?"

Khanijih in3 kong2 :" Bo5- -nouh, goa2 chiok siu7 beh chiah8 !"

" Na7 an2-ne li2 iau2 teh kheh-khi3 sim2-mih8 ?"

Khanijih iu5-goan5 bo5 chhut chhiu2 khi3 theh8. Soa3-boe2, thau5-ke ka-ki7 chhut chhiu2 phong2 chit8 toa7 phong2 hou7 I. Khanijih ka7 soeh-sia7 liau2 chiu7 kap In a-bu2 choe3-tin7 tng2- -khi3.

Kau3 chhu3 liau2-au7, In a-bu2 mng7 I si7 an2-choaN2 na2 e7 iau-kui2 ke2 se3-ji7 ?

Khanijih ka7 In a-bu2 an2-ne hoe5-tap :" Goa2 bo5 iau-kui2 ke2 se3-ji7. Goa2 chai-iaN2 thau5-ke e5 chhiu2-poaN5 pi2 goa2 e5 khah toa7 chin che7, I e5 chit8 -phong2 siong7-chio2 ma7 u7 goa2 e5 3 phong2 hiah che7 !"

Cha2-cheng5 e5 Tai5-oan5-lang5 chiok san3-chhiah. u7 bi2-png7 thang chiah8 chiu7 sng3-si7 be7 bai2- -lah. Beh u7 mih8 thang phoe3-png7 koh khah han2- -tit. Na7 u7, ma7 long2-si7 chhai3-pou2, kiam5-hi5 hit lui7 e5 kiam5-toa5. oah8 beh kiam5- -si2.

Kong2 u7 chit8 ke-hoe2-a2, piah-teng2 tiau3 chit8 boe2 kiam5-hi5. Chiah8 png7 e5 si5, lau7-pe7 chiu7 ka7 in nng7 e5 kiaN2 kong2 :" Lin2 na7 bo5 mih8 phoe3 png7 chiah8 be7 loh8- -khi3, tioh8 khoaN3 chit8 e7 piah-teng2 e5 kiam5-hi5, chiah8 chit8 chhui3 png7. An-ne, lin2 e7 kam2-kak png7 khah ho2 chiah8."

Koe3 chit8-e7-a2, sio2-ti7 tioh8 kheng5-hun kong2 :" A-pa, a-hiaN chin iau-sai5, I long2 khoaN3 nng7-e7 chiah chiah8 chit8 -chhui3 png7."

A-pa tui3-chhui3 ka7 in3 kong2 :" Mai3 chhap- -i. Hou7 i oah8-oah8 kiam5- -si2."

10 hoe3 e5 siang-seN-a2 hiaN-moe7 teh oan-ke, chha2 kau3 chiok chho3-lang5-hiN7 .Sio2-moe7 kong2 :

" Goa2 leng5-kho2 bo5 li2 chit e5 a-hiaN !"

A-hiaN ka7 ge, kong2 :

" Na7 m7-si7 u7 goa2, li2 kiam2 chai-iaN2 li2 e7 seN-cho3 siaN2-khoan2 ? Li2 e7 u7 2 liap8 thau5-khak !"

1 e5 khit-chiah8 ka7 1 e5 cha-pou lang5 chah8- -loh8-lai5, beh ka7 pun chiN5 be2 mih8 chiah8.

Cha-pou lang5 :" Goa2 chhiaN2 li2 lim 1 poe chiu2."

Khit-chiah8 :" Goa2 be7 lim chiu2."

" Goa2 chhiaN2 li2 chiah8 hun."

" Goa2 bo5 chiah8 hun."

" ThiaN kong2 5 ho7 e5 be2 un2 iaN5. Lan2 cho3-hoe2 lai5-khi3 sai3-be2-tiuN5. Goa2 chhut pun2-chiN5.Na7 poah8-iaN5, hia e5 chiN5 long2 hou7- -li2."

" Goa2 bo5 siuN7 beh poah8-kiau2. Goa2 kan-ta beh tih8 kui2 khou-gin5 thang be2 mih8 chiah8 tioh8 ho2."

Chit si5, cha-pou-lang5 toa7-siaN kong2 :

" KiaN5, lai5-khi3 goan2 tau. Goa2 e7 chhiaN2 li2 chiah8 1 tng3-a2 ho2-liau7- -e5. Sun7-soa3 po3 goan2 bou2 khoaN3, khoaN3 1 e5 be7 chiah8-hun, bo5 lim-chiu2 ma7 be7 ai3 phoah8-kiau2 e5 lang5, kiat-kiok8 si7 an2-choaN2 ! "

" Li2 kong2 li2 kai3 chiu2 si7 ui7-tioh8 I ?"

" Si7, bo5 m7-tioh8 !"

" Kai3 hun ma7 si7 ui7-tioh8 I ?"

" Tioh8!"

" Ah kai3 kiau2 ma7 si7 ui7-tioh8 I ?"

" Si7. Cheng3-khak."

" Na7 si7 an2-ne, li2 na2 bo5 chhoa7 I cho3 bou2 ?"

" Goa2 i2-keng pian3-kau3 chiah ho2 - -ah. Eng3-kai e7-tang3 chhoa7-tioh8 koh khah ho2 e5 bou2 chiah tioh8 !"

Bou2 : Li2 iu5-koh lim kau3 poaN3-chui3 chiah tng2- -lai5 !

Ang : Long2 ma7- li2 !

" Goa2 an2-choaN2 ?"

" Li2 ka7 goa2 lak-te7-a2 e5 chiN5 jim5 khi3 1 poaN3. Na7 bo5, goa2 e7 lim kau3 choan5-chui3 !"

1 e5 chiu2-kui2 chui3-bang5-bang5 ti7 kip-chin2-chhu3 khok8-khok8-hoe, kong2 I thun 1 chiah be2 loh8 pak-tou2 te2. I-su koat-teng7 beh kap I kun2-sng2-chhio3. Ka7 i chu3 sia7 hou7 khun3. Khan 1 chiah peh8-be2 lai5 I e5 sin-piN.

Keh-tng2-kang chiu2-kui2 chheN2, khoaN3-tioh8 peh8-be2, chiu7 toa7-siaN hoah:" M-tioh8 - -lah.Goa2 thun-loh8 e5 be2 si7 ou- -e5."

Tai5-gi2 si7 chit8 -e5 u7 siaN-tiau7 e5 gi2-gian5 ( tone language ). SiaN-tiau7 na7 hut m7-tioh8, i3-su3 tioh8 tui3 te7-kiu5 chha kau3 goeh8-niu5 khi3.

Cha2-cheng5 ti7 Tai5-lam5 bou2 chit8 keng tiong-hak8, u7 chit8 -e5 bok8-su niu5 teh ka7 ko-tiong lu2 hak8-seng siong7-kho3. Bok8-su niu5 chin jin7-chin giam5-siok ti7 tai5-a2-teng2 kong2 kau3 chhui3-kak choan5-pho, koh chhui3-noa7-chui2 ma7 phun3 kau3 tai5-a2-kha khi3. I khoaN3 hak8-seng bo5 sim2-mih8 hoan2-eng3, siuN7 beh mng7 khoaN3 in e7-hiau2 - -bo5. m7 -ku2 I e5 siaN-tiau7 liah8-liau2 bo5 saN2 chun2, soa3 mng7 kong2:

" TaN, goa2 ti7 tai5-teng2 u7 chhui3 kong2 kau3 bo5 noa7, chhui3-khou hoan2 nge7, chhui3-chih8 hoan2 ta, lin2 tau3-te2 si7 e7 hiau5 a2 be7 hiau5 ? "

Tai5-kha chap8 chhit peh hoe3 e5 cha-bou2 hak8-seng thiaN-tioh8 chiok ngai7-gioh8, long2 thau5 chhih- chhih, bo5 poaN3 lang5 chhut siaN.

Bok8-su niu5 mng7 oe7 bo5 lang5 in3, soa3 tng2 siu7-khi3, chiu7 khah toa7 siaN kong2:

" Tioh8 ai3 kong2, m7-thang kek tiam7-tiam7, kong2, e7 hiau5 a2 be7 hiau5 ?"

Cha2-bou2 gin2-a2 hak8-seng kau3 chia lai5 sit8-chai7 tong3 be7 tiau5, soa3 hiong5-hiong5 toa7 -toa7 siaN chhio3- -chhut-lai5. Bok8-su niu5 m7-chai in teh chhio3 sim2-mih8, soa3 koh khah siu7-khi3, chiu7 koh khah toa7-siaN jiang2 kong2:

" Be7-sai2 ti7 kau3-sek lai7 chhio ! Beh chhio khi3 goa7-bin7 chhiu7-a2-kha hia chhio ! "

Thak8 it-ni5 e5 cha-bou2-kiaN2 mng7 in a-bu2:" Lau7-su kong2 lang5 chiah8-lau7 chiah e7 u7 peh8 thau5-mou. Si7 an2-choaN2 li2 chiah saN-chap8-thong2-hoe3 chiu7 hoat peh8 thau5-mou? "

Lau7-bu2 in3 kong2:" Gin2-a2-lang5 m7 thiaN oe7 bo5 koai, hou7 a-bu2 siu7-khi3, a-bu2 tioh8 e7 hoat peh8 thau5-mou."

Cha-bou2 gin2-a2 thiaN-liau2, na2-chhiuN7 ngou7-tioh8 sim2-mih8 toa7 to7-li2, bak8-chiu tian2 toa7-lui2, chhui3-kak bi5-bi5-a2 chhio3, toa7-lat8 phah chit8 e7 phok8-a2, kong2:

" An-ne goa2 chai- -a. Goa2 chit-ma2 chai-iaN2 si7 an2-choaN2 a-ma2 e5 thau5-mou na2 e7 long2-si7 peh8- -e5 ! "

Su-ki sai2-chhia long3-tioh8 chit8 e5 lau7 a-peh. Nng7 e5 sio-ko3. Ti7 hoat-iN7 lai7:

Su-ki kong2: Goa2 sai2-chhia beh saN-chap8-ni5, keng-giam7 hong-hu3, long2 m7-bat chhut tai7-chi3. Kho2-kian3 si7 a-peh- -a m7-tioh8 !

A-peh in3 kong2: Li2 phian3 siau2- -e5 ! Goa2 kiaN5-lou7 beh peh-chap8-tang, ma7 long2 m7-bat chhut tai7-chi3, keng-giam7 ma7 ke li2 gou7-chap8-ni5 ! Tau3-te2 si7 siaN2 lang5 m7-tioh8?

Iap8 -peh- -a u7 4 e5 kiaN2. Toa7- -e5 cho3 seng-li2 chin seng5-kong. Ji7- -e5 cho3 I-seng. Lau2 saN- -e5 si7 tai7-hak8 kau3-siu7. Ban- -e5 siong7 m7 chiaN5 -lang5, chham7 ko-tiong ma7 thak8 bo5 pit-giap8, kui-kang si3-ke3 loa7-loa7- so5, beh chiah8 m7 tho2-than3 !

Iap8 peh5- -a kian3-pai2 na7 siuN7-tioh8 chit 4 e5 kiaN2 chiu7 e7 hiau5-gi5 chit8 hang7 tai7-chi3:

Ban- -e5 kiam2 e7 m7 si7 goa2 -e5 ? Chit tiau5 tai7 khun3-jiau2 Iap8 -peh chiok ku2, chiok ku2. Kau3 Iap8 peh5- -a 75 hoe3, phoaN3-peN7 beh si2 e5 si5, mng7 I kiat-hun 50 ni5 e5 lau7 khan-chhiu2 kong2:

" Lau7- - e5, li2 lau2-sit8 ka7 goa2 kong2, Ban- -e5 si7-m7-si7 kap I hiah e5 a-hiaN bo5 kang7 lau7-pe7 ?"

Lau7 khan-chhiu2- -e5 thiaN liau2, bin7-a2 ang5 -ang5, piau2-cheng5 chin ki5-koai3, na2-chhiuN7 phaiN2-se3 koh pho7-khiam2, bak8-sai2 kam5- -leh, ka7 in3 kong2:

" Si7 - -lah ! Ban- -e5 chiah si7 li2 -e5 !"

u7 chit8- e5 lau7 a-peh kha3 tian7-oe7 hou7 I e5 i-su kong2 I khi3 pian7-sou2 u7 bun7-te5.

`` Li2 mui2 cha2-khi2 long2 u7 sio2-pian7- -bo5 ?`` I-su ka7 mng7.

``u7 - -a , long2 ti7 6 tiam2 chiaN3 -chiaN3.`` A-peh an2-ne in3.

``Ma7 long2 u7 tai7-pian7 ?``

``u7 , ti7 7 tiam2 chun2- chun2 !``

`` Na7 an2-ne, li2 e5 bun7-te5 si7 saN3 ?``

`` Bun7-te5 si7, goa2 ai3 khun3 kau2 8 tiam2 chiah peh e7 khi2- -lai5 !``

Eng-kok si7 kui2-a2 siong7 che7 e5 sou2-chai7. u7 chit8 -e5 soan-kau3-su7 toa3 ti7 kau3-iu2 e5 chhu3. Chiah8 cha2-tng3 e5 si5 I ka7 chu2-lang5 kong2 cheng5 chit8 me5 u7 kui2-a2 lai5 bin5-chhng5 piN .

`` Kui2-a2 u7 ka7 li2 an2-choaN2- -bo5 ?`` Chu2-lang5 chin kin2-tiuN.

`` Bo5- - a3 ,`` Soan-kau3-su chin khin-sang, chin chu7-chai7 ka7 in3,`` Goa2 chhiaN2 I koan-chiN5 thang khi2 kau3-tng5. I sui5-to7 soan bo5- -khi3-ah.``

Bok8-su teh kong2 se3-kai3 boat8-jit8 e5 cheng5-keng2,`` Hit si5 lui5-kong sih-nah lin3-long3 kio3, hoe2 tui3 thiN-teng2 hahN- -loh8-lai5, soaN-pang te7-lih8 . Hai2-chui2 koan3 khi2-lai5 peN5-iuN5 kau3 soaN-nia2....``

I kong2 kau3 chhui3-kak choan5-phou, chhui3-noa7-chui2 phun3 chit8 si3-ke3, 2 liap8 bak8-chiu chheN-kin3-kin3, kek8-ki5 khiong2-pou3, chit-si5 u7 chit8 e5 gin2-a2 ka7 mng7 kong2:

`` Ah hit chun7 hak8-hau7 kiam2 u7 hong3-ka2 ?``

Chhit-chap8 hoe3 e5 sin-long5 kap ji7-chap8 gou7 hoe3 e5 sin-niu5 khi3 toa3 lu2-sia7. Te7 ji7 kang cha2-khi2 sin-long5 loh8-lai5 chhan-thiaN tiam2 saN-liap8 nng7, nng7 te3 gu5-pai5, nng7 poe gu5-leng. KhoaN3 pan7-se3 I cha-me5 koe3-liau2 chin hiang2-siu7 e5 khoan2.

Koe3 chit8-e7-a2, sin-niu5 ma7 lai5, bin7-au3 bin7-chhau3, cheng-sin5 bo5 ho2. I kio3 chit8 poe ka-pi kap chit8 te3 siok8-phang2 kauh nng7.

Neh-chiang3 (cha-bou2 hok8-bu7 seng)thau-thau ka7 mng7:`` Si7 an2-choaN2 li2 chiah thiam2? I m7-si7 chhit-peh chap8 hoe3- -a ?``

`` I ka7 goa2 phian3 !`` Sin-niu5 chin ui2-khut kong2,`` I kong2 I i2-keng khiam7 20 ni5- -a. Goa2 kio3-si7 I khiam7 e5 si7 chiN5- - leh !``

chit8 - e5 kin7-si7 chin-tang7 e5 lau7 chhu3-lu2 khi3 e5-tiam3 be2 phoe5-e5. Sio lian5-soa3 chhi3 chin- che7 siang long2 be7 hah8.

Tng kng-thau5 (thuh-hiah) e5 cha-pou tiam3-oan5 koh teh ka7 chhi3-chheng7 e5 si5, I ka7 kng-thau5 liah8-cho3 si7 ka-ki7 e5 kha-thau5-u, chiu7 iong7 I chheng7 e5 kun5 ka7 kham3- -khi2-lai5.

I sui5 thiaN-tioh8 kng-thau5 tiam3-oan5 hoah chit8 siaN:`` Oe2, po2-hiam2-si koh tng7- -khi3 ah !

Chit8 e5 lau7-pe7 ka7 cha-bou2 kiaN2 kong2,`` Lin2 cha-pou peng5-iu2 e7 -pou u7 lai5 chhoe7- -goa2, kong2 beh kap li2 kiat-hun e5 tai7-chi3. Goa2 u7 ka7 tap-eng3 - -lah!``

`` m7 -ku2, pa5,`` Cha-bou2 kiaN2 bak8-sai2 lau5 bak8-sai2 tih, `` Goa2 bo5 ai3 li5-khu a bu2 !``

In lau7-pe7 chin cheng3-keng ka7 I kong2,`` Goa2 chai. Goa2 be7 pho3-hai7 li2 e5 heng7-hok8. Li2 thang chhoa7 a-bu2 cho3-tin7 ke3- -khi3.``

Io-chi2-ian2 ( iu3-ti7-hng5 ) e5 lau7-su mng7 tiong-pan e5 chit8- e5 cha-bou2 gin2-a2:`` Lin2 lau7-pe7 kio3-cho3 saN2 mia5?``

`` Pa-pa.`` Gin2-a2 an2-ne in3.

`` m7 -si7 - -lah ! Goa2 beh chai lin2 ma-ma an2-choaN2 ka7 kio3- -e5?`` Lau7-su koh mng7.

Cha-bou2 gin2-a2 bak8-thau5 kat-kat, siuN7 kui-pou, kong2:`` Phong3-tou7- -e5 !``

Chit8 tui3 hu-chhe kiat-hun 10 ni5. Chit 10 ni5 lai7 si7 ia7-ia7 chhun-siau, tak8-me5 long2 hi-bong7 thiN mai3 kng.

u7 chit8 -kang thai3-thai3 sin-the2 bo5 song2-khoai3. I-su khoaN3 liau2 ka7 hoan-hu3 ai3 an-cheng7 liau5-iong2 6 ko3-goeh8, be7-tang3 koh u7 pang5-su7.Na7 bo5, khiong2-kiaN thai3-thai3 e7 u7 seN3-mia7 gui5-hiam2.

In ang-a2-bou2 chiu7 pun-khui khun3 : ang khun3 lau5-kha, bou2 lau5-teng2. Chu7 an2-ne siong-an bu5-su7. Keng-koe3 3 ko3-goeh8 e5 kim3-iok8 kap kou-toaN ,In ang e5 i3-chi3 soa3 pang- -khi3. I chiu7 kiaN5 tui3 lau5-teng2 khi3. Tu2-ho2, in thai3-thai3 ma7 beh kiaN5 tui3 lau5-kha lai5. Ang ka7 bou2 kong2:

`` Goa2 beh lai5 lau5-teng2 ka7 li2 thai5- -si2.``

Bou2 ka7 ang kong2:`` Goa2 beh loh8-lai5 lau5-kha chu7-sat !``

Chit8 e5 be7 ka-ku7 e5 toa7 lau2-pan2 khi3 Niu2-iok (New york) pou2-hoe3, ti7 lu2-koan2 tng7-tioh8 chit8- e5 Hoat-kok bi2-lu2. In nng7 lang5 gi2-gian5 be7 thong, kou-put-chiong iong7 oe7-tou5 lai5 kong2-oe7. Ka-ku7 siong oe7 chit8 tai5 ke3-theng5 chhia. Hoat-kok bi2-lu2 tim3-thau5.

In sio-chio che7 ke3-theng5 chhia khi3 kong-hng5 thit-tho5. Kau3 tiong-tau3 i koh oe7 chit8 e5 chiah8-png7 e5 toh-a2 kap to-a2, chhiam2-a2. Bi2-lu2 chiu7 kap i khi3 chhan-thiaN chiah8 tau3-tng3.

Beh am3 i koh oe7 nng7 e5 lang5 teh thiau3-bu2. Bi2-lu2 ma7 kap i khi3 bu2-thiaN thiau3-bu2. In sng2 kau3 chiok hoaN-hi2, chiok song2-khoai3. Siong7 boe2-a2, oaN7 bi2-lu2 giah8 pit oe7 chit8 teng2 u7 4 ki kha e5 bin5-chhng5. Ka-ku7 siong toa7-toa7 chhoah chit8 tio5, sim-lai7 siuN7 kong2:

`` Ki5-koai3? Li2 na2-e7 chai-iaN2 goa2 si7 be7 ka-ku7- -e5?``

Bou2 ( chin siu7-khi3 e5 khoan2-sit, siang-chhiu2 chhah -koh) :`` Bo5 - -ah. Li2 chau2 khi3 to2-ui7? Kui cha2-khi2 long2 bo5 khoaN3-iN2 (khoaN3-kiN3) lang5!``

Ang ( chit8 e5 chin kiaN2-bou2 e5 lang5, sio2-khoa2 kin2-tiuN) :`` Bo5 - -lah! Goa2 khi3 chhi7-cheng3-hu2 - -nia5.``

`` Khi3 chhi7-cheng3-hu2 chhong3 saN3 ?``

`` Khi3 chha5 chit8 hang7 tai7-chi3.``

`` Sim2-mih8 tai7-chi3? Kin2 kong2!``

`` Bo5 sim2-mih8 - -lah!``

`` Bo5 sim2-mih8? Li2 kin2 ka7 lin2 thai3-chou2-ma2 lau2-sit8 kong2, na7 bo5, goa2 m7 pang3 li2 soah!``

`` Ho2, li2 chu3-i3 thiaN``, chit e5 kiaN-bou2 e5 ang chin iong2-kam2, chin ang7-siaN kong2:

`` Khi3 khoaN3 lan2 e5 kiat-hun cheng3-su kau3-ki5- -boe7!``

Cha2-cheng5 Tai5-oan5 e5 cha-pou-lang5 tiaN7-tiaN7 long2 kau3 kiat-hun hit me5 chiah khoaN3-tioh8 i chhoa7 e5 bou2 e5 chin bin7 bok8.

u7 chit8-e5 siau3-lian5-ke chhoa7 bou2. Keh-tng2-kang, in lau7-pe7 khoaN3-tioh8 sin-niu5 chhoah chit8 tio5. Ka7 in hau7-seN kio3 lai5 toa7-thiaN se3-se3 siaN a2 kong2:

`` KiaN- -lang5 koh, sin-niu5 na2-e7 seN cho3 chiah bai2! Bak8-chiu thou2-thou2, chhui3-khi2 pok- pok, phiN7-a2 thap- thap, chhai3-chhoah-phiN7 , hiN7-a2 giang3-giang3.....``

In hau7-seN ka7 chhah oe7 kong2:`` A-pa, li2 e7 sai2 tit khah toa7 siaN leh bo5 iau3-kin2- -lah. Sin-niu5 si7 chhau3-hiN7-lang5 thiaN bo5 li2 teh hiam5 - -lah!``

1 e5 ou-kau2-hiaN ti7 1 keng thi3-thau5-tiam3 teh thi3-thau5. Tng teh khau chhui3-chhiu e5 si5, I khoaN3-thoh8 I piN- -a teh siu chng2-kah e5 sui2 kou-niu5. O-kau2-hiaN chit8 si5 chhi5-ko-sin5 khi2 ,chiu7 ka7 hit e5 kou-niu5 hi2-lang7, kong2:

" Sui2 kou-niu5-a2, goa2 tan2 - -leh chhiaN2 li2 khi3 lim ka-pi koh khoaN3 tian7-iaN2."

Kou-niu5 ka7 in3 kong2:" ChhiaN2 li2 khah u7 kui-ki2 - -leh. Goa2 i2-keng kiat-hun- -a."

" Na2 u7 iau3-kin2? Li2 thang khi3 mng7 lin2 ang- -a!"

" Ho2- -a, li2 ka7 mng7. Goan2 ang chit-ma2 chhiu2 gia5 chit8 ki lai7-kiam3-kiam3 e5 thi3-thau5-to tng teh ka7 li2 khau chhui3-chhiu."

1 e5 San3-hiong-lang5, san3 kau3 kui2 kiong7 beh thoa- -khi3. m7 -ku2 I long2 bo5 seng5-jin7 I san3.

u7 1 pai2 I tu2-tioh8 1 e5 chiaN3-kang2 e5 ho2-giah8-lang5 teh tian2 kong2 u7 goa7 che7 chhan5, goa7 che7 hng5 ,goa7 che7 soaN.

I chin put-hok8 chiu7 ka7 hit e5 ho2-giah8-lang5 thuh-chhau3, kong2:" Li2 he na2 u7 siaN2 hi-han2? Li2 kiam2 chai-iaN2 goa2 e5 chhan5-hng5 u7 goa7 che7? Sou2-u7 si2-chiau2 poe be7 koe3- - e5 kap chheN-me5- -e5 khoaN3- -tioh8-e5 long2 si7 goa2- e5!"

1.)

u7 1 e5 chin chhut-mia5 e5 kau3-siu7, i chhut-mia5 2 hang7: hak8-sut8 seng5-chiu7 kap hou5-tou5 !

u7 1 pai2 i che7 hoe2-chhia beh chhut-tiuN. Hoe2-chhia kiaN5 bo5 joa7 ku2, chhia-chiong2 lai5 chha5 phio3. Kau3 chit e5 kau3-siu7 chia e5 si5, kau3-siu7 koaN2-kin2 chhun chhiu2 khi3 lak-te7-a2 jim5 phio3. Jim5 kui pou, long2 jim5 bo5 chhia-phio3. Kau3-siu7 soa3 khai-si2 kin2-tiuN piaN3 chhin3-koaN7 , thau5-hiah8 e5 chhin3-koaN7 toa7-liap8 se3-liap8 ko7-ko7-lin3.

Chhia-chiong2 pun2-te2 tioh8 bat- -i, ma7 chai-iaN2 i chin hou5-tou5, sou2-i2 tioh8 ka7 i an-ui3 kong2:" Kau3-siu7, bian2 kin2-tiuN, khoaN-khoaN-a2 chhoe7, tan2 li2 chhoe7- -tioh8, pat8-jit8-a2 chiah kia3 hou7- -goa2."

Kau3-siu7 ka7 hit e5 chhia-chiong2 kong2: "Bun7-te5 m7-si7 ti7 hia, bun7-te5 si7 goa2 na7 bo5 chhoe7-tioh8 chhia-phio3 goa2 tioh8 m7-chai beh ti7 to2 chit8 cham7 loh8 chhia!"

2.)

u7 1 e5 toa7 hak8-chia2, cho3 lang5 chin hou5-tou5, cho3 tai7-chi3 ma7 chiok ham3.

u7 1 pai2 I chhut-goa7 bo5 chah so2-si5. Tng2- -lai5 e5 si5 i2-keng saN-keN poaN3-me5 - -ah, tai7-ke ma7 long2 teh khun3 - -lah. Bo5 hoat-tou7 thang jip8 khi3 chhu3 lai7, I chi2-ho2 jih8 tian7-leng5. I tian7-leng5 na2 jih8, na2 ti7 hia seh8 seh8 liam7:

" Kiam2 e7 long2 bo5 lang5 ti7 - -leh?" Koe3 chit8-e7-a2, toa3 ti7 3 lau5 e5 cha-bou2-kan2-a2 peh- -khi2-lai5, kiaN5 kau3 thang-a2-mng5 piN, bak8-chiu sa-bui sa-bui khoaN3 tui3 e7-bin7 khi3, kan-ta am3-so-so, khoaN3 long2 bo5 lang5, tioh8 phah khui thang-a2-mng5 hoah kong2:" Kau3-siu7 bo5 ti7 - -leh!"

Chhui3 lai7 koh teh seh8-seh8-liam7 e5 hou5-tou5 toa7 hak8-chia2 tioh8 toe3 lang5 kong2:" Bo5 ti7 - -leh, bo5 iau3-kin2. Li2 ka7 i kong2 goa2 bin5-a2-chai3 chiah koh lai5!"

2 e5 tiong-lian5 hu7-jin5-lang5 sio tu2 thau5 teh khai-kang2. In i2-keng u7 15 tang bo5 kiN3-bin7.

" Lin2 hau7-seN choe3-kin7 ho2- -bo5?"

"Ho2? Ho2 1 khou ou7-a2 han-chi5 - -leh!"

" An-choaN2 kong2?"

" An-choaN2 kong2? Li2 ka7 siuN7 khoaN3 mai7- - leh: I chhoa7 1 e5 bou2, na2 ti-bo2 - -leh! Kui-kang kan-ta bih ti7 pang5-kang lai7 chiah8, khun3, khoaN3 chheh, thiaN im-gak8. Chhu3 -lai7 e5 tai7-chi3 long2 m7 chhap. e7 -sai2 kong2 chhiu2 put tang7 sam-po2!"

" Ah lin2 cha-bou2-kiaN2 ho2- -bo5? "

" O, na7 i u7 kau3 chan2! Chin-chiaN3 e7 hou7 lang5 o-lo2 kau3 tak-chih8. I ke3 1 e5 ang, ka7 i sioh mia7 mia7, kui-kang ka7 i hok8-sai7 ti7 pang5-keng lai7 chiah8, khun3, khoaN3 chheh, thiaN im-gak8. Chhu3 lai7 e5 tai7-chi3 long2 bian2 i chhap. Chin-chiaN3 si7: Ke3 tioh8 ho2 ang, kui ni5 thang3-thiN long2 khin-sang. Li2 kong2 tioh8- -bo5?"

Soa-bou5 e5 kong-lou7 u7 chit8 e5 lang5 khia5 lok8-to5, tu2-tioh8 chit8 e5 lang5 sai2 kiau5-chhia lai5, chiu7 ka7 kong2:

" ThiN-khi3 chin joah8, goa2 kiam2 thang che7 li2 e5 kiau5-chhia, chhoe chit8-e7-a2 leng2-khi3 - -leh? "

Chhia-chu2 chin tai7-hong in3 kong2:" Bo5 bun7-te5, m7-ku2 lok8-to5 beh an2-choaN2? "

" He li2 bian2 hoan5-lo2, i e7 toe3 chhia kiaN5. "

Chhia-chu2 chiu7 ban7-ban7-a2 sai2, chap8, ji7-chap8, saN-chap8 kau3 sok-tou7 si3-chap8 mai ( miles ), lok8-to5 long2 toe3 tiau5-tiau5. Chhia-chu2 siuN7 beh chhi3 khoaN3 lok8-to5 tau3-te2 chau2 u7 joa7 kin2, chiu7 chhui kau3 lak8-chap8 mai, lok8-to5 iu5-goan5 toe3 e7 tioh8!

Khi2-mou-bai2 ka7 chhui kau3 peh-chap8, chhia-chu2 tui3 ma-khu2-nih-a2 khoaN3-tioh8 lok8-to5 teh thou2-chih8, chiu7 ka7 lok8-to5 chu2-lang5 kong2:" Li2 e5 lok8-to5 teh thou2-chih8 neh, u7 iau3-kin2- -bo5? "

" Thou2-chih8? Thou2 tui3 to2 chit8 peng5? "

" To3-peng5, an2-choaN2--sio7? "

" Kin2 ka7 chhia sai2 khah chiaN3-peng5 - -leh. I beh tui3 to3-peng5 ka7 li2 chhiau-chhia!"