笑話集-1997.07

" Li2 u7 iaN2 u7 kau3 bo5 i3-su3! Goa2 chit-pang phoa3-peN7 toa3 peN7-iN7 beh chit8 ko3 goeh8, li2 long2 bo5 tah8 kha kau3! " TiuN - -e5 an2-ne ka7 Tan5 - -e5 soan7.

Tan5 - -e5 kam2-kak chin pho7-khiam2, kong2:" Goa2 sit8-chai7 u7-iaN2 chiok bo5 eng5. Ah beh siong7-pan, ma7 ai3 jiok saN-tiam2-poaN3, chit8 ke-hoe2-a2 chham7 hou-sin5, ka-choah8 long2-chong2 chiaN5 chap8 -e5, long2 ai3 goa2 khoan2. Goa2 beh na2 e7 u7 si5-kan? Chit8-pang u7 iaN2 sit-le2 - -lah. au7-pai2 goa2 tiaN7-tioh8 e7 tah8 kha kau3! "

1999.07.30　Hip-siong7 Liah8 Lang5 漢羅版

Ui-tioh8 beh ka-kiong5 hak8-seng e5 hoat-ti7 kau3-iok8, lau7-su chhoa7 kok-hau7 it ni5 e5 hak8-seng gin2-a2 khi3 chham-koan Keng2-chhat-kiok8. Ti7 hia in khoaN3-tioh8 kui2 e5 lang5 e5 siong7 tah ti7 kong-po3-noa5. chit8 -e5 gin2-a2 ka7 keng2-chhat mng7:

" Keng2-chhat a-peh, hiah e5 lang5 si7 sim2-mih8 lang5?"

"Toa7 phaiN2 lang5." Keng2-chhat an2-ne in3.

" PhaiN2 lang5 m7 tioh8 ai3 liah8 khi3 lai5 koaiN ?"

" Si7- -a, ka7 in e5 siong7 tah ti7 chia beh hou7 lang5 khoaN3, thang po3 goan2 chai, thang khi3 ka7 liah8 lai5 koaiN."

Hak8-seng gin2-a2 hiong5 hiong5 pu3 chit8 ku3 oe7:" Si7 an2-choaN2 hip-siong7 e5 si5 bo5 beh ka7 liah8- -khi2-lai5? "

1999.07.29　Sio-chiu2-chui3 漢羅版

" Li2 khak-teng7 chit-keng si7 lin2 tau?" Keng2-chhat mng7 poaN3-chui3 e5 chiu2-kui2.

" Khak-teng7. M-sin3 mng5 phah-khui goa2 po3 li2 khoaN3."

" U khoaN3- -tioh8-bo5? Hit tai5 kng3-khim5 si7 goa2 e5. Hit teng2 bin5-chhng5 si7 goa2 e5. Bin5-chhng5 teng2 hit e5 cha-bou2 u7 khoaN3- -tioh8-bo5? He si7 goan2 bou2. I e5 piN- -a u7 chit8 e5 cha-pou, khoaN3 u7- -bo5?"

" U, goa2 u7 khoaN3- -tioh8. I si7 sim2-mih8 lang5?" Keng2-chhat kam2-kak chiaN khun3-jiau2.

" Hit e5 cha-pou- -e5," chiu2-kui2 ho2-le2-a2 hoe5-tap " si7 Goa2!"

1999.07.28　Sin-hun Hu-chhe 漢羅版

1 tui3 sin-hun te7 5 kang e5 hu-chhe ti7 png7-tiam3 e5 chhan-thiaN. Bou3-ih ( waiter) koe3 lai5 mng7 khoaN3 beh chiah8 sim2-mih8.

Sin-niu5 chin saiN-nai ka7 sin-long5 kong2:" Li2 chai-iaN2 goa2 beh tih8 saN3, tioh8- -bo5?" Kong2 oan5 koh ka7 chim chit8 e7.

Sin-long5 bo5 saN2 khui3-lat8 ka7 in3 kong2:" Goa2...goa2...goa2 tong-jian5 ma7 chai. M-koh lan2 chong2-si7 ai3 chiah8- -chit8-sut-a2 , tioh8- -bo5?"

1999.07.27　20 Khou chit8 ko3-goeh8 漢羅版

Sian-siN ka7 chap8-chi3 khng3 - -leh, tui3 thai3-thai3 kong2:" Ti7 Pa-se, cha-pou-lang5 na7 kap cha-bou2-lang5 siong-ho2 (cho3-ai3 ) liau2, cha-bou2- -e5 ai3 hou7 cha-pou- -e5 10 khou Bi2-kim. Chan2! Tan2 - -leh goa2 beh khi3 hia."

Thai3-thai3 kong2:" Goa2 ma7 beh khi3."

" Li2 beh khi3 hia chhong3-saN3 ?"

" Goa2 beh khoaN3 li2 chit8 ko3-goeh8 20 khou an2-choaN2 koe3-jit8? "

1999.07.26　Bak8-chhiuN7 漢羅版

Bak8-chhiuN7 tioh8-si7 cho3-bak8 e5 sai-hu7, ia7 kio3 bak8-kang. 1 e5 bak8-chhiuN7 the3 lang5 chng mng5-chhoaN3 , soa3 chng ti7 mng5 goa7.

Chu2-lang me7 i " thu5- - ko3 " , i ma7 me7 chu2-lang5 " thui5- -ko3 ",

" Ah bo5, goa2 to2-ui7 thui5?"

" Li2 na7 bo5 thui5 tioh8 be7 chhiaN3- -goa2!"

1999.07.25　Lah-sap-chiN5 漢羅版

Bok8-su iau3-kiu5 hoe7-chiong3 chin7-liong7 koan chiN5 thang khi2 sin kau3-tng5. u7 1 e5 than3-chiah8 cha-bou2 koan 25 khou.

Bok8-su ka7 kong2:" Li2 che si7 lah-sap-chiN5 ,goan2 be7-tang3 siu!"

Au7-piah u7 1 e5 cha-pou..e5 hoah kong2:" Ka7 siu- -loh8-lai5 lah. HoaiN5-tit8 hiah e5 chiN5 pun2-chiaN5 ma7 si7 lan2 e5!"

1999.07.24　Goa2 si7 Lang5-kheh ( Hou5-tou5 Kau3-siu7 ) 漢羅版

1 e5 hou5-tou5 toa7 kau3-siu7, u7 1 ki chiok lai7 e5 chhui3 gau5 kong2 oe7. U 1 pian3 khi3 hong5 ( hou7-lang5 ) chhiaN2. Khai-kang2 kau3 chiok oaN3 iau2 kong2 be7 soah.

Lu2 chu2-lang5 thiau-ti5 ti7 i e5 bin7 cheng5 peh-ha, am3-si7 i2-keng chin oaN3 lou3 . I khiok ke2 bo5 khoaN3- -tioh8. Ki5-sit8 i ma7 chin thiam2 ah.

Soah-boe2 lam5 chu2-lang5 put-tek-i2 chiu7 ka7 i kong2:" Kau3-siu7, chiaN oaN3 lah. Li2 ho2 tng2--khi3 ah. Goan2 bin5-a2-chai3 thau3-cha2 tioh8 ai3 chhut-mng5."

Kau3-siu7 chhoah 1 tio5, " Goa2 tng2- -khi3? Goa2 kio3-si7 lin2 si7 goa2 e5 lang5-kheh- - leh!"

1999.07.23　2 Kha e5-a2 漢羅版

Lang5-kheh:" Chit siang e5-a2 10 khou, goa2 kan-ta u7 5 khou, goa2 bin5-a2-chai3 chiah pou2 ki2 5 khou, ho2- -m7? "

Tiam3-oan5: " Ho2. Cho3 li2 koaN7- -khi3."

Thau5-ke: " Li2 cho3 tai7-chi3 na2-e7 chiah chhin3-chhai2? Li2 na2-e7 chai bin5-a2-chai3 i e7 koh lai5?"

" An lah! I bin5-a2-chai3 choat8-tui3 ai3 koh lai5! I koaN7- -khi3 hit siang e5 2 kha long2 si7 to3-kha!"

1999.07.22　Bo5-soaN3-tian7 漢羅版

Ai-kip8 lang5 : Kho2-kou2 hak8-ka ti7 goan2 e5 siaN5-chhi7 kap kim-ji7-thah e5 e7-bin7 u7 ou2-tioh8 tian7-soaN3. Kho2-kian3 kui2 chheng ni5 cheng5 goan2 to7 u7 tian7-oe7 thang-iong7.

Pho-su lang5 (Persian) : He bo5 hi-han2! Kho2-kou2 hak8-ka ma7 bat ti7 goan2 e5 kou2-siaN5 ui5-chi2 ou2- -koe3, m7-ku2 long2 ou2 bo5 tian7-soaN3. Kho2-kian3 goan2 kui2 chheng ni5 cheng5 chiu7 iong7 bo5-soaN3-tian7 teh thong-oe7!"

1999.07.21　Christmas 漢羅版

2 chi2-moai7 teh tho2-lun7 beh koh kiat-hun e5 a-pa. In a-pa 60 thong2 hoe3. Chun2 sin-niu5 pi2 in 2 chi2-moai7 iau2 khah siau3-lian5.

" Chit khoan2 5 goeh8 kap 12 goeh8 e5 hun-in, u7 saN2 i3-su3?" A-chi2 kong2. " 12 goeh8 e7-tang3 ti7 5 goeh8 chhoe7-tioh8 chhun-thiN e5 khi3-bi7 kap sek-chhai2, a2 5 goeh8 beh ti7 12 goeh8 chhoe7-tioh8 saN3 ?"

Sio2-moai7 siuN7 kui pou, hiong5-hiong5 nauh 1 ku3 " Christmas."

1999.07.20　Bi2-lu2 Iu2-koai2 漢羅版

" I-seng, goa2 chiah-ku2-a2 am3-si5 long2 cho3 chhoa7-jio7-bang(koai73-bang7 ), bang7-kiN3 chiok che7 bi2-lu2 lai5 pang5-keng ka7 goa2 iu2-koai2." 1 e5 tai7-hak8-seng kong2.

" Li2 long2 chaiN2-iuN7 eng3-hu3?" I-seng mng7.

" Goa2 long2 iong7 chhiu2 ka7 sak khui."

" An-ne li2 chhoe7 goa2 beh chhong3 saN3 ?"

" Beh chhiaN2 li2 ka7 goa2 e5 chhiu2 tok-tng7!"

1999.07.19　Chin Tu2-ho2 漢羅版

2 e5 cha-pou-lang5 tang5-che5 haN7 -jip8 chiu2-ka. Lai7-te2 kan-ta u7 2 e5 cha-bou2-lang5. KiaN5 ti7 thau5-cheng5 hit e5 hiong5-hiong5 oat8-thau5 beh kiaN5- -chhut-khi3, se3 se3 siaN kong2 :" Bai2 ah! Goan2 bou2 kap goa2 e5 hoe2-ki3 (cheng5-hu7 )long2 ti7 hia!"

Leng7-goa7 hit e5 tham3-thau5 jip8-khi3 khoaN3 chit8 e7, ma7 oat8-thau5 kin2 soan- -chhut-khi3, chhui3-lai7 liam7 kong2 :" Na2 e7 hiah tu2-ho2, goan2 bou2 kap goa2 e5 hoe2-ki3 ma7 long2 ti7 hia."

1999.07.18　Bi2-kok I-seng 漢羅版

Chit8 e5 Bi2-kok I-seng in tau e5 chui2-chun7-a2-thau5 phaiN2--khi3, kio3 chit8 e5 kang-lang5 lai5 siu-li2. Bo5 5 hun-cheng tioh8 siu-li2 ho2-se3. Beh ka7 siu 50 khou Bi2-kim.

Bi2-kok I-seng chiok bo5 hoaN-hi2 ka7 kong2 " Goa2 cho3 I-seng, khoaN3 chit8 e5 hoan7-chia2 tioh8 ai3 30 hun-cheng, ma7 chiah siu 50 khou, a2 li2 siu-li2 chit8 e5 chui2-chun7-a2-thau5 chiah 5 hun-cheng ma7 ai3 50 khou. Na7 an2-ne goa2 I-seng tioh8 mai3 cho3 ho2--a, goa2 ma7 toe3 li2 lai5 oh8 siu-li2 chui2-to7-thau5!"

Hit e5 kang-lang5 khoaN-khoaN-a2 ka7 kong2 " Li2 kam2 chai-iaN2 goa2 pun2-te2 teh cho3 saN3? I-seng!"

1999.07.17　Khong-kham2 e7 pou7-sou3 漢羅版

Chit8 e5 hoan7-chia2 te7 it pian3 tah8-jip8 chit8 keng chin2-sou2 beh khoaN3 peN7.

" Li2 iau2-boe7 lai5 chin3-cheng5 ti7 to2-ui7 khoaN3?" I-seng ka7 mng7.

" Ti7 hang7-a2 thau5 hit keng ioh8-pang5 hia." Hoan7-chia2 an2-ne in3.

I-seng tui3 bit8-i chiok bo5 ho2-kam2 ma7 khoaN3 lang5 be7-khi2, chiu7 mng7 hoan7-chia2 kong2 " Ah hit-khou gian3-thau5..e5 u7 ka3 li2 sim2-mih8 khong-kham2 pou7-sou3- -bo5?"

" u7 - -a, i kio3 goa2 lai5 li2 chia!"

1999.07.16　au7 -hoe5 Ho2-un7 漢羅版

chit8 tui3 sin kiat-hun ang-a2-bou2 teh him-siong2 chhin-chiaN5 peng5-iu2 kia3- -lai5 e5 kiong-hi2 ho7-khah.

ki5-tion u7 chit8 tiuN si7 an2-ne sia2..e5 : Chiok au7-hoe5 ho2-un7!

1999.07.15　Gau5 Thoa-soa e5 San2-hu7 漢羅版

Chit8 e5 san2-hu7 in-ui7 gau5 so5 gau5 thoa-soa , soa3 ka7 eN-a2 seN ti7 peN7-iN7 e5 tian7-thui lai7. Su7-au7 kam2-kak phaiN2-se3, kian3-siau3 soa3 hau2- -khi2-lai5. Hau2 kau3 chiok toa7 siaN.

I-seng chai-iaN2 liau2, kin2 an-ui3 kong2:" Mai3 siong-sim. Ku7-ni5 u7 chit8 e5 san2-hu7 koh khah ham3, ka7 eN-a2 seN ti7 pe7-iN7 e5 mng5-khau2! "

San2-hu7 thiaN oan5, hau2 koh khah toa7 siaN, kong2:" Hit e5 tioh8-si7 goa2 - -lah! "

1999.07.14　Hou7 Goa2 ChhiaN2 漢羅版

chit8 e5 khok8-a2-thau5 put-si5 teh hou7 lang5 chhiaN2. KiN3-na7 to2-ui7 u7 lang5 chhiaN2 lang5-kheh, i it-teng7 kau3. Ui-khau2 koh tek8-piat8 toa7, si7 chit8 e5 toa7 piah-hoN .

Kau3 u7 chit8 pai2, cheng3-lang5 sit8-chai7 jim2-be7-tiau5- -a, chiu7 ka7 mng7 kong2:" Li2 kui-ni5 thang3-thiN long2 teh hou7 lang5 chhiaN2. Sim2-mih8 si5-chun7 chiah oaN7 li2 chhiaN2- -lang5? "

Khok8-a2-thau5 siuN7 chit8-e7-a2, kong2: " Kin ni5 ji7 goeh8 saN chap8 lai5 hou7 goa2 chhiaN2! "

1999.07.13　Ban7-chhiaN2 HoaN-hi2 漢羅版

Chit8 e5 hoan7-chia2 khui-to liau2 ti7 peN7-pang5 kong2:" Chan2! Goa2 e5 sin-the2 bo5 bun7-te5- -a."

Keh-piah-chhng5 e5 hoan7-chia2 kong2:" Ban7-chhiaN2 hoaN-hi2 leh! Hoan7-se3 li2 e5 pak-tou2 te2 u7 lau5 chit8-te3 gah-jeh, li2 tioh8 koh khui chit8 pai2! "

Leng7-goa7 chit8 chhng5 e5 hoan7-chia2 kong2:" To tioh8 m7. Goa2 tioh8-si7 ui7-tioh8 chit8-ki giap-a2 koh hou7 lang5 khui chit8 pai2, ti7 pak-tou2 te2 ka7 goa2 la7 kui-pou."

Tng in tho2-lun7 kau3 nau7-jiat8 phut-phut e5 si5, in khoaN3-tioh8 hit e5 khui-to e5 I-seng chheN-chheN kong5-kong5 chau2-jip8 peN7-pang5, chin kin2-tiuN ka7 in mng7 kong2:" Lin2 kiam2 u7 khoaN3-tioh8 goa2 e5 phoe5-e5?"

1999.07.12　3 e5 Iu5-eng2-ti5 漢羅版

Chit8 e5 pok8-hoat-hou7 teh khi2 sin chhu3. I kau-tai3 kian3-tiok8-su ai3 ka7 ou2 3 e5 iu5-eng2-ti5. Koh kiong5-tiau7 3 e5 iu5-eng2-ti5 ai3 1 e5 pang3 leng2-chui2, 1 e5 sio-chui2, leng7-goa7 1 e5 bo5 chui2.

Kian3-tiok8-su ka7 kong2:" Goa2 chai-iaN2 leng2-chui2 kap sio-chui2 e5 chok-iong7. M-ku2 bo5 chui2 hit khut beh chhong3-saN3 ?"

Pok8-hoat-hou7 kong2:" Goa2 e5 peng5-iu2 chiok che7. U chit8 koa2 be7-hiau2 siu5-chui2 - -e5."

1999.07.11　Chok-ka vs IaN2-chheN 漢羅版

Lu2 chok-ka sin chheh hoat-piau2 hoe7. Chit8 e5 lu2 tian7-iaN2 beng5-chheN kiaN5 oa2 khi3 ka7 kong2:

" Li2 e5 chok-phin2 sia2 liau2 chiok chan2, chui2-chun2 chiok koan5! Tioh8 - -lah," IaN2-chheN iong7 chit8 e5 kun2-sng2-chhio3 e5 khau2-khi3 ke3-siok8 kong2," si7 siaN2-lang5 the3 li2 sia2- -e5?"

Lu2 chok-ka kong2:" Khi2-kam2! Khi2-kam2!" Jian5-au7 koh iong7 khau-se2 e5 khui3-khau2 mng7:" si siaN2-lang5 the3 li2 thak8- -e5?"

1999.07.10　Bai2 Siau-sit 漢羅版

Hu7-san2-kho I-seng siong5-se3 ka7 chit8 e5 sui2 kou-niu5 kiam2-cha liau2, chin chhin-chhiat ka7 hoan7-chia2 kong2:

" Li2 thai3-thai3. Ho2 siau-sit beh ka7 li2 kong2."

" O, phaiN2-se3, goa2 si7 Li2 sio2-chia2!"

" Na7 an2-ne, Li2 sio2-chia2, bai2 siau-sit!"

1999.07.09　Hiang-kang2 Hoat-ti7 漢羅版

Chit8 e5 Hiang-kang2 lang5 kiaN5 -jip8 keng2 -si7-thiaN (Keng2-chhat chong2-kiok8 ) tui3 Keng2-tiuN2 kong2 :

" Keng2-tiuN2 sian-siN, goa2 cha-hng u7 lai5 chia po3-an3, kong2 goa2 u7 chit8 phoe hoe3 bo5- -khi3. Kin-a2-jit8 goa2 i2-keng chhoe7-tioh8- -a. Sou2-i2 goa2 lai5 thiat-siau hit e5 an3-kiaN7."

Keng2-tiuN2 thiaN oan5, bak8-thau5 kat-kat ka7 kong2:

" Li2 na2 m7 khah cha2 kong2 leh? E cha2-khi2 goan2 i2-keng liah8-tioh8 chhat-a2. Ji5-chhiaN2 hoat-koaN ma7 i2-keng phoaN3-heng5- -a!"

1999.07.08　Siong7-te3 e5 ChiN5 漢羅版

Le2-pai3-jit8 tai7-ke cho3-hoe2 beh khi3 kau3-tng5 cho3 le2-pai3.

A-bu2 theh8 2 kai5 50 khou e5 gin5-kak-a2 hou7 10 hoe3 e5 A-Koan. Koh tek8-piat8 kau-tai3 chit e5 hou7 i, chit e5 ai3 hong3-hian3 hou7 Siong7-te3.

In hoaN-hoaN hi2-hi2 tau3-tin7 kiaN5 chhut mng5.

A-Koan na2 chhiuN3 koa, poaN3 kiaN5 poaN3 chong5. Bo5 tu2-ho2 soa3 poah8 1 to2. 1 kai5 50 khou e5 gin5-kak-a2 soa3 lin3 tui3 pai5-chui2-kau loh8- -khi3.

I toa7 siaN hoah kong2:" A-bu2, Siong7-te3 e5 chiN5 lak bo5- -khi3 a!"

1999.07.07　Chit8 e5 Ma7 Bo5 漢羅版

Mary chhoa7 6 e5 kiaN2 che7 hoe2-chhia. Chha5-phio3-oan5 lai5 e5 si5, i kong2:

" Chit 2 e5 12 hoe2, choan5-phio3; hit 2 e5 9 hoe3, kap leng7-goa7 hit 2 e5 6 hoe3 poaN3 , long2 poaN3-phio3."

Chha5-phio3-oan5 chiaN5 houN3-hian5, na2 ka-phio3 na2 mng7:

" Hu-jin5, phaiN2-se3, goa2 khah kau7-oe7 chit8- -sut a. Li2 tak8-pai2 long2 seN siang-seN - -siou3?"

" Bo5 it-teng7," Mary ka7 kai2-soeh, " u7 si5-a2 1 e5 ma7 bo5."